Hub 3 - Hanunuu

Nagbagaw si Hub

¹ Pagka dugay, nagbagaw si Hub ag sinaadan niya kay sirang kapanganakan.

² Magkun siya,

³ “Pagsaadan gid niku ti sirang iinanak aku.

⁴ Nagbaliw yi lang mana madlum ati pag sirang, balaw yi nasinggitan init. Balaw yi mana inalala Diyus sa langit ati pag sirang.

⁵ Pirmaminti yi lang mana inda madlum aw ngatay natakluban madamul pag rurum, ag mana sinaput yi lang kadudulman ti rayaw sirang.

⁶ Mana binmaliw yi lang madlum masyadu ati pag yabi sa kang pagkalusad, ag balaw yi mana niminsan sa kalindaryu ati pag yabi.

⁷ Balaw yi mana aku iinanak sa ati pag yabi, mana udyi may nakabaya ati katpung.

⁸ Saadan mana ati pag yabi manga mananaad may alam nu kabitay patandugun ti daragun Libyatan.

⁹ Balaw yi mana sinminggit ti kuramnag sa surip ati katpung pag sirang, ag mana balaw yi lang mana rimas-up ti magkasurip.

¹⁰ Pagsaadan niku ati katpung pag sirang dahil unman niya inampara kang pagkalusad, hampay balaw yi mana niku nalakawan ti kainda pag kakurian.

¹¹ “Mayad waya namatay yi lang aku sa tiyan niku ina.

¹² Hayga waya aku inalagaan ag pinasusu niku ina?

¹³ Nu namatay yi mana aku kaybi, mahim-ung yi mana aku kainda magkaturug ag magpahari

¹⁴ kaibahan ti manga hari ag manga takinan sa kalibutan nagpatindug balay hari kuntay nagba yi kainda.

¹⁵ Magpahari yi waydi mana aku kaibahan ti manga takinan kay ulian punu manga gintu ag pilak.

¹⁶ Mayad waya aku parihu sa manga anak namatay katpung iinanak. Ilinbung sida unman nakakit karayawan.

¹⁷ Ati sa ulian manga namatay, ti manga daut pag tawu unman yi magbuwat kadautan, ti manga budlay magpahari yi.

¹⁸ Ati ti manga binihag tawu magpahari yi, balaw yi nida mag-adnugan ti ringgit tawu magpilit sa kanda mantarabahu.

¹⁹ Ati ti tanan pag kalasi tawu, bantug man una unman. Ti manga panawuhun nakalpas yi sa kanda amu.

²⁰ “Hayga waya pag pasnuan mabuhi ti tawu mag-agwanta sa kakurian ag may daut sa kay tagipusuun?

²¹ Magkaibug sida mamatay subra waya sa magkaibug mataguan kayamanan, dapat balaw sida magkamatay.

²² Masulung sida nu namatay ag malubngan yi.

²³ Hayga pagpahintulutan waya Diyus mabuhi ti tawu unman may kasiguraduhan sa kay aratubangun ag itinagka mabuhi may kakurian?

²⁴ Balaw aku makakaun dahil sa masyadu pag karukuan ag ud may apas kang magdangup.

²⁵ Ti pagkadalaan ag pagduyuun niku, nangyari gid ngap sa kangku.

²⁶ Unman aku may kahusayan ag kaariwayahan. Unman aku may paraharyan, lunsay yi lang kaaburiduhan ti magkalakawan niku.”