Hub 29 - Hanunuu

Ti manga Papalad Natanggap ni Hub Kaybi

¹ Nagparargu si Hub sa kay magbagaw,

² “Nu maibalik lang mana ti manga nakalawuy pag manga sirang niku katpung pag-alagaan waya aku Diyus,

³ katpung pagrayawan waya niya kang dalan habang maglakaw aku sa madlum.

⁴ Kaybi pag udas mayad waya kang kahamtangan, ti Diyus imaw kang suud pag kakilala, ag kay pagpapaladan niya kang magtal-anakan.

⁵ Pag ibahan waya aku kaybi Makamaskihan Diyus, ag kaibahan waya niku kang manga anak.

⁶ Kaybi pag udas, kang manga baka magkabul-an waya mayamu gid pag gatas, ag kang manga tanum ulibu magkabul-an waya mayamu gid pag lana ulibu.

⁷ Nu mag-atag aku sa puwirtahan banwa ag magkuyug sa manga manugpamahala sa banwa nu magpulung sida,

⁸ magpasaruy ti manga kalay-awan lalaki nu mag-akitan nida aku, bag-u ti manga gurangun magtindug maggalang sa kangku.

⁹ Unman mag-ingay una ti manga takinan

¹⁰ hanggan ti manga may garalangun pag manga tawu nu mag-akitan nida aku.

¹¹ Una si unu ti makakit sa kangku ngatay makadnug sa kang magbagaw, magdayaw sa kangku,

¹² dahil pag-awatan niku ti manga pugri maghagad awat hanggan ti manga unman may madangpan pag manga ilu.

¹³ Pagpapaladan aku hirimatyanun pag manga tawu ti kang inawatan ag magbaya gid ti manga buranday babayi ti kang inawatan diman.

¹⁴ Pagbuwatun niku pirmi ti matadlung ag kang-ud; ga rutay hanggan pantaung inda kang pag-isulung.

¹⁵ Nagbaliw aku mata tawu buta ag lulud tawu pilay.

¹⁶ Nagbaliw aku usa ka ama manga pugri, ag una ti manga day-uhan pag-awatan niku sa kanda kasaba.

¹⁷ Pagduraun niku ti kapangyarihan daut pag manga tawu ag pagpalpasan kanda manga pinakurianan.

¹⁸ “Kang hantup mabuhi aku malawig ag mamatay pagsangputun niku magtal-anakan.

¹⁹ Dahil kaybi parihu aku sa kayu nanlugapgap kay manga gamut sa danum ag pirmi pagtun-ugan kay manga sanga.

²⁰ Pirmi aku mabisug ag pagdayawun manga tawu.

²¹ Nu magpatigayun aku, balaw mag-ingay ti manga tawu ag magpatingi mayad.

²² Pagkatapus niku bagaw, unman yi sida may pag-idugang waya dahil magkabayaan yi sida sa kang pagsabihun.

²³ Pagkaibgan nida kang manga bagaw parihu sa kanda magkaibug sa uran. Gustu gid nida inda patingihan.

²⁴ Ga balaw sida makapaniwala nu magkay-um aku sa kanda; kang masulung uyahun magpabaskug sa kanda.

²⁵ Pagtudluan niku sida nu hintay kanda buwatun parihu sa usa ka takinan. Pagpangunahan niku sida parihu sa usa ka hari magpangulu sa kay manga sundalu. Pagpasulungun niku sida nu magkaruku.