Hub 28 - Hanunuu

Nagbagaw si Hub tungkul sa Kadunungan ag Pag-intindi

¹ “May manga mirinahan nu naan makitan ti manga pilak, ag may manga rugar nu naan pag tunawun ti manga gintu.

² Ti baul pagbul-un sa daga, ag ti galang pagtunawun ginan sa batu.

³ Maggamit ti manga tawu sulu hampay balaw madlum nu magkali sida sa basad daga. Magkali sida manga batu sa arabasad.

⁴ Magkali sida lakawan sa mirinahan, sa rugar unman may mag-uli ngatay may maglakaw manga tawu. Magdugsun sida sa panab-anan manga lubid magtablug-tablug.

⁵ Sa babaw daga magtubu ti manga tanum bulul-an karan-unun, dapat sa basad daga ga linakawan apuy.

⁶ Ti manga batu sa daga may sapiru ag ti manga galbuk may gintu.

⁷ Ti manga lakawan sa mirinahan unman mag-akitan manga uwak ngatay manga lapay,

⁸ ag balaw malakawan manga maisug pag manga hayup ngatay liyun.

⁹ Pagkalihun manga tawu ti maganit pag manga batu una waya sa sirung baliwa manga bantud.

¹⁰ Magbuslut sida lakawan sa daraka manga batu, bag-u makitan nida ti tuhay-tuhay pag mahalaga manga batu.

¹¹ Magkali sida sa ulwan manga sapa, ag pagdaran-un nida sa marayaw ti manga nakatagu pag kayamanan.

¹² “Dapat naan nguna pag masampakan ti kadunungan aw ngatay ti pag-intindi?

¹³ Unman alam tawu nu naan inda pag masampakan. Unman inda makitan sitay sa kalibutan.

¹⁴ Balaw diman inda masampakan una sa abasad dagat.

¹⁵ Balaw inda magkabili gintu aw ngatay pilak.

¹⁶ Balaw miparihu kay halaga inda sa lunsay gid pag gintu ngatay sa mahalaga pag manga batu uniks ag sapiru.

¹⁷ Higit waya inda sa gintu ngatay bubug. Balaw inda pangunu gintu.

¹⁸ Kay halaga inda subra waya sa halaga kural, haspi, ngatay rubi.

¹⁹ Balaw inda matupngan tupasyu ginan sa Itiyupya ag balaw inda mabili lunsay gintu.

²⁰ “Malu, naan nguna pag masampakan ti kadunungan una ti pag-intindi?

²¹ Unman may buhi linalang makakit inda una waya manga manuk.

²² Una ti rugar sa kadamhakan, imaw ti ulian manga namatay, hantup-hantup wata kanda nasaydan tungkul inda.

²³ Ti Diyus lang gid ti nakaalam nu naan pag masampangan ti kadunungan.

²⁴ Dahil mag-akitan niya una waya ti pinakaarayu pag bahagi sa kalibutan, ag mag-akitan niya ti tanan sa sirung langit.

²⁵ Katpung pinabaskug niya ti bagyu, ag pagtakalun niya nu kabitay kayamu ti uran mag-idna,

²⁶ bag-u pag-isipun niya nu naan pag midna ti uran ag nu naan lumakaw ti manga kilat may linti,

²⁷ imaw tunda pag udas kay ipinakakit ti kadunungan ag ti kahalagahan inda. Sinubuk niya inda ag napatutuuhanan.

²⁸ Bag-u magkun siya sa manga tawu, ‘May kadunungan kamu ag pag-intindi nu maggalang kamu sa Panginuun ag mag-aman sa kadautan.’ ”