Hub 27 - Hanunuu

¹ Nagparargu si Hub sa pagbagaw,

² “Magsumpa aku sa buhi ag Makamaskihan pag Diyus, ti nag-irang sa kangku katadlungan ag ti nagpakaun alangan sa kang nabubut-un.

³ Habang mag-arup waya aku, ag pagpahintulutan waya aku Diyus mabuhi,

⁴ unman gid aku mamagaw daut ag unman gid aku mamudil.

⁵ Balaw gid niku pagtanggapun kuntay kang-ud kamu. Ipilit gid niku kuntay unman aku may salan tugka sa mamatay aku.

⁶ Ilaban gid niku kuntay matadlung aku, ag unman gid aku umapas. Habang buhi aku malumpiyu kang tagipusuun.

⁷ “Mana ti manga maglaban sa kangku parusahan Diyus parusa angay sa daut pag manga tawu.

⁸ Dahil unu lugud ti pagsarigan tawu unman maka-diyus nu bul-un yi Diyus kay buhi?

⁹ Mamatingi aw lugud ti Diyus sa kay maghagad awat nu ti kadalaan rumas-ug sa kanya?

¹⁰ Makabaya aw siya sa Makamaskihan pag Diyus? Manawag aw nguna siya sa kanya sa tanan pag udas?

¹¹ “Tudluan niku kamu tungkul sa kamaskihan Diyus. Itultul niku sa kanyu nu unu kay manga pamaraan.

¹² Dapat kamu tanan nakakit inda. Bati, hayga magbagaw waya kamu sa kangku unman may pulus?

¹³ “Imaw inda ti kapaladun itinagka Diyus Makamaskihan sa daut ag mahigpit pag manga tawu:

¹⁴ Una mayamu waya kay manga anak, ti iba sa kanda mamatay sa girahan ngatay sa lun-us.

¹⁵ Ti masawad buhi sa kanda mamatay sa sakit, ag udyi may manhimanglaw sa kanda kamatayan, una kanda manga asawa.

¹⁶ “Una manipun waya mayamu manga pilak ag rutay ti daut pag tawu,

¹⁷ balaw siya ti makakinabang inda. Ti matadlung ag ti unman may salan pag manga tawu ti makasulung kay manga rutay, bag-u huray-hurayun nida kay pilak.

¹⁸ Ti ipinatindug niya pag balay parihu sa matpuk pag puting lawa ngatay sa payag manugbantay taranuman.

¹⁹ Maturug siya mayaman, dapat mimata siya udyi ti tanan niya kayamanan.

²⁰ Rumas-ug sa kanya ti kadalaan ga magpaywas pag baha ag ipayag buhawi nu rumas-ug ti yabi.

²¹ Ipayag siya durus ginan sa butlakan, ag madura siya sa kay pag-ulian.

²² Umuyup inda sa kanya unman may pangaawa habang magpilit gid siya makapalagiw.

²³ May magpalakpak ag magpanitsit magpuya sa kanya dahil nadura siya sa kay pag-ulian.”