Hub 26 - Hanunuu

Nagbagaw si Hub

¹ Bag-u nagsagut si Hub,

² “Mag-isip kawu naawatan nimu aku ti malumuy ag unman may ikabisug.

³ Mag-isip kawu napaanyuan nimu aku ti unman may alam sa panab-anan nimu masyadu pag kadunungan.

⁴ Naan lugud ginan tunda kanmu manga pagbagawun? Kantapu ispiritu ti nagtudlu sa kanmu sa pagbagaw tunda?

⁵ “Pagtakigan sa kadalaan ti manga namatay sa kanda nagkabugtangan ati sa basad danum.

⁶ Burayhaw gid sa Diyus ti rugar manga namatay. Unman may makatabun sa rugar kadamhakan.

⁷ Pagladladun Diyus ti kanaway pag kalangitan sa marayaw pag rugar, ag ipinauli niya ti kalibutan sa kapawaan langit.

⁸ Pagsaputun niya ti uran sa manga rurum mabiru, dapat ti rurum unman magkagisi una mabuyat inda.

⁹ Pagtakluban niya rurum ti bilug bulan.

¹⁰ Pinaulian niya katugkaan ti langit ag ti dagat, ga katugkaan diman rayaw ag dulum.

¹¹ Sa kay pagtamyaw magkahalu ti manga tulduk langit.

¹² Sa kay kamaskihan pagpahumbakun niya ti dagat, sa kay kadunungan tinalu niya ti daragun si Rahab.

¹³ Sa kay pag-uyup rinmayaw ti kalangitan, ag sa kay kamaskihan minatay niya ti magyapang pag daragun.

¹⁴ Inda basta lang pag manga bagay kay pagbuwatun. Bilang usa lang inda ka yanas kanta nasaydan. Taynguna, si unu nguna ti makasalum kay pagkamakamaskihan Diyus?”