Hub 24 - Hanunuu

Nagpaingana si Hub tungkul sa Pagparusa Diyus

¹ “Hayga unman itinagka Makamaskihan pag Diyus kay udas magpihu sa daut pag manga tawu? Hayga unman mag-akitan manga magkilala sa kanya tunda pag udas sa magpihu?

² Magpangagaw daga ti daut pag manga tawu sa panab-anan paghalin muhun. Magtakaw sida manga hayup ag pag-ipaamut sa kanda sadili manga hayup.

³ Pagtakawun nida ti asnu manga ilu, ag pagbul-un nida pilinda sa utang ti baka pag-alagaan babayi buranday.

⁴ Pag-apihun nida ti manga pugri, nakan napilitan sida magpatagu.

⁵ Maghanap sida kanda makaun sa pangawakawaan parihu sa talun asnu. Harus udyi sida may iba rugar mahanapan karan-unun para sa kanda manga anak.

⁶ Magpanhirut sida manga nag-anihan sa tanman, hanggan sa taranuman ubas manga daut pag tawu.

⁷ Magkaramig sida nu magkaturug sa yabi, dahil unman sida may kumut ag kurang kanda rutay.

⁸ Magkabasa sida uran ati sa manga kabantudan, ag magpasuksuk sida sa gil-ang manga batu dahil unman sida may pasirngan.

⁹ “Pagbul-un manga daut pag tawu ti anak buranday ag pugri pag babayi, imaw ti bayad sa kanda inutang.

¹⁰ Maglakaw ti manga pugri kurang sa rutay; pagpabab-an sida manga inani tirigu dapat magkalun-us sida.

¹¹ Pagpapug-un sida ulibu hanggan ubas dapat magkauwaw sida.

¹² Mag-adnugan sa banwa ti manga arunghung manga hirimatyanun ag ti maghagad awat manga nabiyagan garabi, dapat balaw gid binalusan Diyus ti nagbuwat daut sa kanda.

¹³ “May manga tawu maglaban sa karayawan. Unman sida maglakaw sa karayawan ag balaw nida inda magkasalman.

¹⁴ Ti manmamatay mag-ipulaw surip waya hampay manmatay manga pugri, ag nu yabi magpanakaw.

¹⁵ Ti magpamabayi mag-alagad dumulum hampay unman may makakit sa kanya. Pagtumungan niya kay uyahun hampay unman may makakilala sa kanya.

¹⁶ Nu yabi magsulud ti manga mananakaw sa manga balay, dapat nu sirang magpatagu sida, dahil mag-aman sida sa marayaw.

¹⁷ Pagbaliwun nida karayawan ti madulum, dahil pagkaibgan nida ti madala pag kadudulman.

Ti Sagut Kakilala ni Hub

¹⁸ “Dapat unman dumugay ti daut pag manga tawu parihu sa bura danum. Ti magkaapu nida pag daga pagsaadan Diyus. Nakan unman may mag-atag sa kanda taranuman ubas.

¹⁹ Nu kabitay ti snow magkatunaw ag magkadura dahil sa init, ti manga makasalanan madura diman sa kalibutan.

²⁰ Udyi sida alalahanun waya nu unman kalimtan yi sida una nida ina. Rurisun sida ga kayu pinukan ag kan-un sida manga sapat.

²¹ Dahil unman mayad kanda magpaminsan sa manga baug pag babayi. Ag unman nida pagkaawaan ti manga buranday pag babayi.

²² “Sa panab-anan kamaskihan Diyus pag-ipaababa niya ti makapangyarihan pag manga tawu. Una marig-un sida, unman may kasiguraduhan kanda buhi.

²³ Mahimu pabay-anan sida Diyus mabuhi unman may mahawag, dapat pagbantayan gid Diyus ti tanan nida manga kimut.

²⁴ Sa ngalay pag udas mag-alwan sida, dapat unman dumugay madura sida parihu sa busang magkalayung ngatay parihu sa uhay ginarab.

²⁵ Nu balaw kang-ud kang pagsabihun, si unu ti makapatutuu kuntay magpudil aku? Si unu ti makasabi kuntay salan aku?”