Hub 23 - Hanunuu

Nagbagaw si Hub

¹ Bag-u nagsabi si Hub,

² “Tugka kainda masyadu di gid kang dangup. Pagpakurianan di gid aku Diyus lang madi aku mag-arunghung.

³ Nu alam lang niku nu naan siya paghanapun; nu makaatag lang aku sa kay pag ulian,

⁴ sabihun gid niku sa kanya kang kasaba ag itultul gid niku kang manga katuwiran.

⁵ Gustu niku maalaman nu unu ti isagut niya sa kangku, ag gustu niku intindihun ti pagsabihun niya.

⁶ Ngatay labanan aku niya kamaskihan? Pihu gid unman! Bagkus ngap, patingihan niya kang sabihun.

⁷ Ti matadlung pag tawu ga kangku mahimu makapangatwiran sa atubangan Diyus, kang Manughusay, ag palpasan niya aku tugka aban.

^8-9 “Hinanap niku ti Diyus — sa butlakan, sa isalpan, sa kanaway, ag sa salatan — dapat unman niku siya makitan.

¹⁰ Dapat alam di niya kang pagbuwatun. Pagka nasubukan niya aku, makitan niya malumpiyu aku parihu sa lunsay pag gintu.

¹¹ Pagsundun niku kay manga palakaw, ag unman gid aku nag-aman siti.

¹² Pagtupadun niku pirmi kay sugu, ag paghamnuun niku inda sa kang tagipusuun.

¹³ Dapat pagpasugtan Diyus kay pagbuwatun; unman may makaampara sa kanya. Pagbuwatun niya kay pagkaibgan.

¹⁴ Nakan buwatun niya kay paggayakun buwatun sa kangku, ag mayamu kay gayak sa kangku.

¹⁵ Imaw ngani nakan nadala aku sa kanya. Nu magka-isip niku inda, subra gid kang kadalaan.

¹⁶ Pinalumuy ag pinadala aku Diyus Makamaskihan.

¹⁷ Dapat unman aku nag-apas sa magdangup una ga natabunan yi aku masyadu pag kadudulman.