Hub 22 - Hanunuu

Nagbagaw si Ilipas

¹ Bag-u nagsagut si Ilipas taga Timan,

² “Unu lugud ti miawat tawu sa Diyus, una ti madunung waya pag tawu?

³ Mapasulung aw lugud nimu ti Makamaskihan pag Diyus nu matadlung kawu? May mab-ul aw lugud siya sa kanmu nu unman may alangan sa kanmu buhi?

⁴ Pagtamyawun kawu Diyus bag-u pagpihuun balaw dahil maggalang kawu sa kanya,

⁵ nu unman dahil subra yi gid kanmu kadautan ag udyi may apas kanmu magbuwat daut.

⁶ Pagbul-un nimu ti rutay nimu kaparihu bilang pilinda sa kay utang sa kanmu.

⁷ Balaw nimu pag-ayawan danum ti manga magkauwaw, ag unman nimu pag-ayawan karan-unun ti manga magkalun-us.

⁸ Pagpalabihun nimu kanmu pagkamakapangyarihan ag pagkabantug sa pag-apu daga.

⁹ Nu maghagad awat sa kanmu ti manga buranday, pagpauliun nimu sida unman may dara. Una ti manga ilu balaw nimu pag asikasuhun sa mayad.

¹⁰ Imaw ngani inda nu hayga pagsangputun kawu manga suduk, ag magras-ug ngap rargu sa kanmu ti kadalaan.

¹¹ Imaw diman inda nu hayga nadluman kawu ag udyi makakit, ag paglapawan waya baha.

¹² “Ti Diyus ati sa pinakaabwat pag langit, abwat man sa pinakaabwat pag manga pamgasan.

¹³ Nakan ngani magkun kawu, ‘Balaw alam ti Diyus sa kang pagbuwatun. Natakluban siya rurum, kabitay siya makapihu?

¹⁴ Pagsaputun siya madamul pag manga rurum, nakan balaw niya kita makitan habang maglakaw siya sa madamul pag rurum.’

¹⁵ “Magparargu aw kawu sa pagsunud sa surundanun dugay yi pagsundun manga daut pag tawu?

¹⁶ Nagkaramatay sida sa balaw waya kanda udas; parihu sida sa patakinan balay inanud baha.

¹⁷ Nagbagaw sida sa Makamaskihan Diyus, ‘Pabay-ani lang kami! Unu lugud kanmu mabuwat para sa kanmi?’

¹⁸ Dapat ti Diyus imaw ti nagpunu sa kanda manga balay manga mayad pag manga bagay. Nakan nu unu man ti itudlu inda pag daut manga tawu, balaw gid aku pumasnu.

¹⁹ “Nu makitan tawu matadlung ag balaw may kasalanan ti kadamhakan manga daut pag tawu, makabaya sida ag masari sa kanda.

²⁰ Sumabi sida, ‘Nidamhak yi kanta manga kalaban, ag kinaun apuy kanda kasiyunan.’

²¹ “Hub, pagpasakup kawu sa Diyus ag pagpakiusa sa kanya hampay papaladan kawu niya.

²² Tanggapa kay manga pag itudlu ag hamnua kay manga bagaw sa kanmu tagipusuun.

²³ Nu bumalik kawu sa Makamaskihan Diyus ag bul-un ti kadautan sa kanmu buu magtal-anakan, ibalik niya kanmu mayad pag kahamtangan.

²⁴ Danga pagpakan-i halaga kanmu manga gintu; ipaparihu nimu ga sa baras lang ngatay ga manga batu lang sa sapa.

²⁵ Bag-u ti Makamaskihan Diyus bumaliw kanmu kayamanan. Subra sa pilak ag gintu kay halaga.

²⁶ Bag-u malakawan nimu ti kabayaan ginan sa Makamaskihan Diyus, ag balaw kawu mangay-a pumakarani sa kanya.

²⁷ Pagdarangin kawu sa kanya ag dungugun kawu niya, ag tupada nimu kanmu manga taratu sa kanya.

²⁸ Una hintay ti paggayakun nimu buwatun, matupad gid inda, ag bumaliw marayaw kanmu lakawan.

²⁹ Nu may imaw tawu magpanlumuy, ag nu idarangin nimu siya sa Diyus kuntay pabisuga siya, awatan niya tunda pag tawu.

³⁰ Una tawu nagsalan iribri niya sa panab-anan nimu matadlung pag buhi.”