Hub 21 - Hanunuu

Nagbagaw si Hub

¹ Bag-u nagsagut si Hub,

² “Patingihi niyu aku kaayad hampay mapasulung waydi niyu aku.

³ Pagpatingi kamu habang magbagaw aku, ag nu matapus yi aku, suruga diman niyu aku nu magkaibug kamu.

⁴ Kang riklamu balaw laban sa tawu nu unman sa Diyus. Imaw inda kay dahilan nu hayga aku madali magkaaburidu.

⁵ Bantayi lugud niyu aku ag manaklub gid kamu kanyu kamang sa kanyu bibig sa pagkadulaw, unman makapaniwala sa nangyari sa kangku.

⁶ Nu isipun niku ti manga magpangyari sa kangku, pagtakigan aku sa kadalaan.

⁷ “Hayga parargu magkabuhi ti manga daut? Maggurangun waya sida ag mag-abunda.

⁸ Ag mag-akitan waya nida ti pagdaka nida manga anak ag manga laki.

⁹ Magpangabuhi sida sa kanda ulian ribri sa kadilikaduhan ag unman may mahawag. Ag unman sida pagparusahan Diyus.

¹⁰ Unman may apas sa magpanganak kanda manga baka, ag unman magkalunasan.

¹¹ Kanda manga anak mayamu parihu sa manga karanidu. Magsayaw sida,

¹² magkarantahan, ag magbarayaan sa tunug tamburin, alpa ag palawta.

¹³ Magkabuhi sida abunda ag magkamatay may kahusayan.

¹⁴ Dapat magkun sida sa Diyus, ‘Pabay-ani lang kami! Balaw kami magkaibug maalaman kanmu manga palakaw.

¹⁵ Si unu gid lugud kawu nakan pag-ingarnan Makamaskihan? Hayga kailangan kawu nimi sirbihan? Ag unu gid ti kanmi mab-ul nu mandarangin kami sa kanmu?’

¹⁶ Dapat ti tutuu, kanda kaabundahan balaw ginan sa kanda sadili pag binudlayan. Nakan nu unu man ti sabihun inda pag manga daut tawu, balaw gid aku mamatingi.

¹⁷ “Pira wata ti magkaramatay pag daut manga tawu. Bihira lang magras-ug sa kanda ti kakurian ngatay ti aradnuganun ipagpadara Diyus dahil sa kay pangagalit.

¹⁸ Bihira lang sida pagtulakun bilang ga dayami ngatay sa upa pagpayagun mabisug pag bagyu.

¹⁹ Magkun kamu nu unman sida parusahan Diyus, kanda manga kalay-awan imaw kay parusahan. Dapat magkun aku ti may kasalanan imaw ti kailangan parusahan Diyus, hampay malakawan nida

²⁰ ag makitan nida mismu ti kanda kadamhakan. Pabay-ani niyu masamitan nida ti pangagalit Makamaskihan Diyus.

²¹ Dahil nu tigbak yi sida, unman yi sida may alam sa magpangyari sa kanda magtal-anakan.

²² “Matudluan aw lugud tawu ti Diyus, ti pinakaabwat pag Talaghusay?

²³ May manga tawu nagkaramatay abunda ag maariwaya kanda kahamtangan,

²⁴ ag makurasug kanda bilug.

²⁵ May manga tawu diman waydi nagkaramatay sa kakurian nida kahamtangan, ag unman gid nakasamit sa mayad kahamtangan.

²⁶ Dapat parihu lang sida ilbung sa daga ag kan-un manga sapat.

²⁷ “Magkaalaman gid niku nu unu kanyu pag-isipun. Magkaalaman gid niku nu unu kanyu manga gayak laban sa kangku.

²⁸ Sabihun niyu sa kangku ti tungkul sa manga tawu mayaman nagkaradaut kanda manga balay dahil sa kanda kadautan.

²⁹ Dapat paingan-a ti manga maglawuy, ag patingihi kanda manga pagsabihun. Dahil tultulan nida kamu

³⁰ pirmi mag-iribri ti daut pag tawu sa sirang pagras-ug kaparusahan Diyus.

³¹ Unman gid may magtamyaw parangkahan sa daut pag tawu. Unman gid may magbalus sa kay pagbuwatun.

³² Nu ilbung yi siya, may magguwardiya waya sa kay lulubngan.

³³ Mayamu ti magkuyug sa kanya atag sa maglubung, ag ti daga magpakaun kaariwayahan sa kanya.

³⁴ “Nakan kabitay niyu aku mapasulung sa kanyu manga pagbagawun unman may pulus? Unman gid may katutuuhanan ti kanyu pagsabihun.”