Hub 2 - Hanunuu

Ti Ikadwa Pagsubuk sa kan Hub

¹ Sa usa ka sirang, nagtiripun maan ti manga anghil sa atubangan Panginuun, napaminsan maan sa kanda si Satanas.

² Magkun ti Panginuun sa kan Satanas, “Naan ginan kawu?” Sinmagut si Satanas, “Mapalibutan sa buu kalibutan.”

³ Magkun sa kanya ti Panginuun, “Nakitan aw nimu si Hub kang suruguun? Unman siya may kaparihu sa buu kalibutan. Matadlung siya, ag unman may ikasabi kay pangabuhi. Maginalangun sa kangku ag maaman sa magbuwat daut. Matinupadun di gid siya sa kangku, lang madi pinilit nimu aku kuntay pahintulutan niku kawu pakurianan siya una unman may dahilan.”

⁴ Magkun si Satanas, “Maagwanta di tawu una madura ti tanan niya pag kasiyunan basta buhi lang siya.

⁵ Dapat nu kay bilug yi kanmu pakurianan, pihu gid saadan niya kawu.”

⁶ Magkun ti Panginuun sa kan Satanas, “Malu, buwata nimu kanmu pagkaibgan buwatun sa kanya, dapat ay danga lang nimu siya pagmatya.”

⁷ Nakan ginminan ngani si Satanas sa atubangan Panginuun bag-u pinakurian si Hub sa panab-anan manga garis ginan sa kay ulu tugka sa raprapa.

⁸ Nam-ul si Hub dariit pag manga basag anglit bag-u ginamit niya pangarud sa kay manga kugan garis habang matukawan sa dapug.

⁹ Magkun sa kanya kay asawa, “Matinupadun di gid aw kawu sa Diyus? Saadi yi nimu siya hampay mamatay yi kawu!”

¹⁰ Sinmagut si Hub, “Magpakabagaw lang kawu sa unman may pulus. Kay lunsay mayad lang aw lugud pag bagay ti tanggapun nita ginan sa Diyus bag-u dayu kay daut?” Dapat una katida ti nangyari, balaw gid nagsalan si Hub sa pagbagaw daut.

Ti Tulu ka Kakilala ni Hub

¹¹ May tulu ka kakilala si Hub, sida ni Ilipas taga Timan, si Bildad taga Suwa, ag si Supar taga Naama. Pagka nabaritaan nida ti tanan kakurian rinmas-ug sa kan Hub, nagkarausa sida manabang sa kan Hub hampay pasulungun siya.

¹² Pagka nakitan nida si Hub ginan sa arayu, harus udyi nida siya magkakilala, nakan nanlumi sida matnug. Ginitas nida kanda manga rutay ag dinapgan galbuk kanda ulu bilang pagpakakit karukuan.

¹³ Bag-u nanukaw sida sa daga kaibahan ni Hub sa sulud pitu ka sirang ag pitu ka yabi. Balaw sida namagaw sa kanya dahil nakitan nida ti masyadu pag kakurian kay pag-agwantahun ni Hub.