Hub 19 - Hanunuu

Nagbagaw si Hub

¹ Bag-u nagsagut si Hub,

² “Tugka kapira waya niyu aku pag pakurianan ag saktan sa kanyu manga pagbagawun?

³ Pira yi ginan pagsurugun niyu aku daut. Unman kamu magkay-a magpuya sa kangku.

⁴ Nu nagkasala gid waydi aku, kangku yi inda pag tiriisun.

⁵ Mag-isip kamu kuntay matadlung kamu kaysa kangku, ag pag-isipun niyu kang pag-agwantahun patutuu kuntay nagsalan aku.

⁶ Dapat ti Diyus ti nagbuwat inda sa kangku. Siya ti nagpauli suduk sa kang sangput.

⁷ “Nagtawag aku hampay manhagad awat, dapat unman may nagsagut sa kangku. Maghagad aku matarung, dapat unman may nangayaw inda sa kangku.

⁸ Hinarangan Diyus kang lakawan agud unman aku makalawuy. Pinatakipan niya madulum kang lakawan.

⁹ Bin-ul niya kang kayamanan hanggan ti mayad pag kangaranan niku.

¹⁰ Pagpakurianan niya aku una naan tag aku pag magpalisud tugka sa ga mamatay yi aku. Bin-ul niya kang pagsarig ga kayu inayit.

¹¹ Subra gid kay pangagalit sa kangku, ag pagbaliwun niya aku usa sa kay manga kalaban.

¹² Ga parihu lang sa pinadarahan niya aku manga sundalu hampay man-gira sa kangku. Pagsangputan nida aku sa sangput niku turda.

¹³ “Pinaighit niya ginan sa kangku kang manga katawuhan. Kang manga kakilala arayu yi sa kangku.

¹⁴ Udyi ti manga tawu arani sa kangku. Kinalimtan yi aku niku manga kakilala.

¹⁵ Binaliw aku dayuhan niku manga manugduaw ag manga suruguun babayi. Kay magbantay nida sa kangku taga iba daga.

¹⁶ Nu magtawag aku sa kang suruguun, unman gid siya magsagut, una waya magpaawa-awa aku sa kanya.

¹⁷ Magkabawu sa kang ginhawa kang asawa ag magkayagting sa kangku kang manga patar-ari lalaki.

¹⁸ Una ti dariit pag manga anak magpuya sa kangku. Nu mag-akitan nida aku, pagkasarin-an nida aku.

¹⁹ Ti tanan niku suud pag manga kakilala magkayagting sa kangku. Pagpalagiwan aku niku manga pagmahalun.

²⁰ Ga but-ul wadi aku masaputan sa lukub, ag harus ga mamatay yi aku.

²¹ “Pagkaawa yi kamu sa kangku pag manga kakilala niku. Kaawai niyu aku, dahil pagpakurianan aku Diyus sa kakurian.

²² Hayga pag-unuunuhun niyu aku parihu sa pagbuwatun Diyus sa kangku? Udwaya aw kang-ud kanyu magpakuri sa kangku?

²³ Mayad mana nu isinurat kang manga binagaw sa usa ka ribru,

²⁴ ngatay isinurat mayad sa batu hampay balaw mapanas hanggan waya aban.

²⁵ “Dapat alam di niku buhi di kang Manugribri, ag sa uryan rumas-ug siya sa daga agud apinan aku.

²⁶ Nu marunut yi kang lukub ag umighit yi aku sa kang bilug, makitan yi niku ti Diyus.

²⁷ Makitan niku duwa ka mata siya, ag balaw yi siya tuhay sa kangku. Daka gid kang gustu makitan siya.

²⁸ “Nu iparargu niyu ti pagbangdan sa kangku kuntay mag-agwanta aku dahil sa kang kasalanan,

²⁹ rumas-ug gid sa kanyu ti madala pag parusa Diyus. Hu, parusahan gid niya kamu dahil sa kay pangagalit. Bag-u maalaman niyu pinarusahan kamu Diyus.”