Hub 18 - Hanunuu

Nagbagaw si Bildad

¹ Bag-u nagsagut si Bildad taga Suwa,

² “Hub, kapira waya lugud nimu pag apasan tunda kanmu baragawun? Kaayada kanmu baragawun hampay makahampang kami sa kanmu.

³ Pag-ipaparihu aw lugud nimu kami sa manga baka unman may buut?

⁴ Pagsaktan lang nimu kanmu sadili sa kanmu pangagalit. Magkaisip aw lugud nimu kuntay dahil lang sa kanmu, pabay-anan Diyus ti kalibutan ngatay paighitun niya ti manga batu sa kanda nagkabugtangan?

⁵ “Sa kay tutuu, ti daut pag tawu pihu gid mamatay. Parihu siya sa sulu unman yi magduag.

⁶ Bumaliw madlum kay turda dahil mapsa kay sulu sa kay katpadan.

⁷ Sa kabag-u siguradu kay manga tiklang, dapat kainda magkaraplid yi siya. Kay ngapu daut gayak imaw ti dumaut sa kanya.

⁸ Siya ngap ti naglakaw atag sa suduk, bag-u nasduk siya.

⁹ Udyi makakalpas kay lulud.

¹⁰ Ipinauli inda pag suduk sa kay lakawan, ag tinakbunan daga.

¹¹ Sangput siya manga bagay magpadala sa kanya ag ga magbukad inda sa kanya.

¹² Ti kakurian ga magkalun-us pag tawu magkaibug humalun sa kanya. Ti kadamhakan alistu gid ipadamhak siya.

¹³ Kay lukub pag arit-itun makamatay pag sakit ag magkarunut kay manga lulud hanggan manga kamang.

¹⁴ Pinaighit siya sa kay ulian pag parakublian magpalan-ib sa kanya, ag pagdaran-un siya sa madala pag hari.

¹⁵ Madura kay ulian dahil mairub inda maglabdaban asupri.

¹⁶ Bumaliw siya parihu sa kayu malayung kay manga gamut ag manga sanga.

¹⁷ Unman yi may makaalala sa kanya sitay sa kalibutan. Malimtan yi gid siya.

¹⁸ Paighitun siya ginan sa kalibutan marayaw atabug sa madlum sa ulian manga namatay.

¹⁹ Unman siya may manga anak ngatay manga katawuhan, ag unman gid may masawad buhi sa kay magtal-anakan.

²⁰ Ti manga tawu una naan pag rugar magkadulaw ag magkadala sa nangyari sa kanya.

²¹ Tutuu gid ungud inda ti ras-ugan daut pag tawu, unman nakakilala sa Diyus.”