Hub 17 - Hanunuu

¹ “Arani yi aku mamatay; ga mabugtas yi kang arup. Alistu yi ti lulubngan para sa kangku.

² Pagsangputun aku manga manugpuya. Hayagan gid kanda magpuya sa kangku.

³ Diyus, awati aku makaluwas. Unman yi may iba makaawat sa kangku nu unman kawu lang.

⁴ Tinakluban nimu ti kaisipan niku manga kaibahan agud unman sida umintindi. Nakan danga sida pasnui manalu sa kanda manga magbangdan sa kangku.

⁵ Parihu sida sa tawu magpaulam sa kay manga kakilala hampay makakuwarta, imaw kay dahilan pag-agwanta niya manga anak.

⁶ “Binwat aku Diyus karasarin-an manga tawu, ag binug-anan nida aku sa uyahun.

⁷ Magpandulum yi kang pamantay dahil sa karukuan; ga but-ul wadi kang bilug, ag harus ga aninu wadi kay kanipis.

⁸ Ti manga tawu mag-isip sa kanda sadili kuntay sida matadlung pag manga tawu magkadulaw sa inda pag nangyari sa kangku. Pag ikadaut nida aku parihu sa usa ka balaw maka-diyus pag tawu.

⁹ Angay sa kanda ti matadlung pag tawu marig-un sa kay magkabuhi ag magmabisug waya gid.

¹⁰ Dapat pag ganyatun niku sida kas-a waya sida pagpaingana sa kangku. Pihu maalaman niku unman gid una di usa sa kanda ti nakaintindi.

¹¹ Arani yi matapus kang manga sirang. Nagpalya kang manga gayak ag manga pagkaibgan.

¹² Dapat magsabi sida, ti dulum buwatun niku sirang. Magkun sida, ‘Sa kadudulman may karayawan.’

¹³ Nu may pagsarig gid waydi aku, kang sarigan ti makauli yi sa ulian manga namatay. Pagkaibgan yi niku ipauli kang igyaan sa inda pag madulum ulian.

¹⁴ Baliwun niku ama kang lulubngan, ag baliwun ina niku ag manga patar-ari babayi ti manga sapat mag-arit-it sa kangku.

¹⁵ May sarigan aw waya lugud aku? Si unu ti makasabi kuntay may sarigan waya aku?

¹⁶ Kang pagsarigan umiba sa kangku sa ulian manga namatay. Magkaraminsan kami ati sa sirung daga.”