Hub 16 - Hanunuu

Nagbagaw si Hub

¹ Bag-u nagsagut si Hub,

² “Nadnugan yi niku inda kaybi. Bagkus ngap mana pasulungun niyu aku, lalu waya niyu pagpabuyatun kang kakurian.

³ Udyi aw lugud kamu umapas sa kanyu magpakabagaw ud may pulus? Hintay gid lugud ti maggulu sa kanyu nakan sigi kamu ti away sa kangku?

⁴ Nu kamu ti sa kang kahamtangan, makabagaw diman aku parihu sa kanyu pagsabihun sa kangku. Bulwatan diman niku kamu aduk bagaw ag man-il-ilung sa kanyu.

⁵ Dapat balaw niku inda buwatun. Bagkus ngap, mamagaw aku manga baragawun makapabisug ag makapasulung sa kanyu.

⁶ Dapat kainda, kang kakurian magparargu una waya unu kang sabihun. Ag nu balaw mangingay aku unman diman madura inda.

⁷ “Diyus, pinalumuy nimu aku. Dinaut nimu kang buu magtal-anakan.

⁸ Pinaniwang nimu aku; but-ul ag lukub wadi aku, ag angay sa iba inda kunu magpatutuu kuntay nagsalan aku.

⁹ Sa kanmu pangagalit, Diyus, linabanan nimu aku. Ga maisug kawu pag hayup magbang-it sa kang nayi. Pagpaagrutan aku nimu ngipun ag pagturunun masakit ga kalaban nimu aku.

¹⁰ “Pagpuyaan ag pagkasarin-an aku manga tawu. Tinangpa nida aku hampay mangay-a. Nagka-usa sida sa paglaban sa kangku.

¹¹ Ipinabahala aku Diyus sa kamang manga daut ag makasalanan pag manga tawu.

¹² Mayad kang kahamtangan kaybi, dapat ipinadamhak niya aku. Ga kinuga niya aku ag rinunut. Binuwat niya aku kay pantukan.

¹³ Linibutan aku niya manga manugpana, ag unman may awa pinana. Natamaan kang batu, ag nabuswang kang apdu sa daga.

¹⁴ Unman may apas kay magbiyag niya sa kangku. Ginira niya aku ga usa ka sundalu.

¹⁵ Nansulung aku saku ag tinmukaw sa daga hampay manhimanglaw.

¹⁶ Nanragang kang uyahun sa masyadu paglumi ag nagkarabaga kang mata.

¹⁷ Lang madi unman gid aku may nabwat salan, ag matutum gid aku sa kang magdarangin.

¹⁸ “Parihu aku sa tawu minatay magpakiawa sa daga kuntay danga dap pagtabuni kay dugu habang unman waya niya natanggap ti matarung.

¹⁹ Una kainda kang kastigus ati sa langit. Siya ti makasabi kuntay unman aku may kasalanan.

²⁰ Kang manga kakilala magpuya sa kangku, dapat maglumi aku sa Diyus maghagad awat.

²¹ Kang kastigus imaw ti pumakiawa sa Diyus para sa kangku parihu sa usa ka tawu magpakihampang para sa kay kakilala.

²² Dahil udyi dugay mamatay yi aku ag udyi bumalik.”