Hub 15 - Hanunuu

Nagbagaw si Ilipas

¹ Bag-u nagsagut si Ilipas taga Timan,

² “Hub, ti madunung pag tawu balaw magbagaw unman may pulus.

³ Unman siya magtagalabani sa unman may pulus pag manga baragawun.

⁴ Dapat ti kanmu manga pagbagawun makapaturun sa tawu hampay unman yi maggalang ag manirbi sa Diyus.

⁵ Kanmu manga pagbagawun imaw ti burak nimu kadautan. Ag magkadaya nimu ti iba sa panab-anan nimu manga bagaw.

⁶ Balaw yi kailangan husgaan waya niku kawu. Dahil kanmu ngap pagbagawun imaw ti pumatutuu laban sa kanmu.

⁷ Kanmu aw isip kawu ti un-an ilinusad? Iinanak yi aw kawu bag-u linalang ti manga bantud?

⁸ Nadnugan yi aw lugud nimu ti manga gayak Diyus? Kawu lang aw lugud ti madunung?

⁹ Hintay lugud ti kanmu naalaman unman nimi magkaalaman? Hintay lugud ti kanmu naintindihan balaw nimi magkaintindihan?

¹⁰ Tinmau kami sa manga tawu gurangun yi, mas gurangun waya sa kanmu ama!

¹¹ Pagbagawan kawu nimi manga bagaw ginan sa Diyus imaw ti makapabisug ag makapasulung sa kanmu. Kurang aw waya lugud tida?

¹² Hayga magpadara kawu sa kanmu mag-adnugan? Hayga magranag kanmu mata,

¹³ hampay mangisug gid kawu sa Diyus ag magbagaw tunda pag manga baragawun daut laban sa kanya?

¹⁴ Mahimu aw lugud tawu ti mabuhi malumpiyu ag matadlung?

¹⁵ Unman ngani magsarig ti Diyus sa kay manga anghil! Unman ngani malumpiyu sa kay pamantay ti manga taga langit pag sundalu.

¹⁶ Ti tawu aw waya nguna, daut ag makasalanan, ag magkauwaw sa pagbuwat daut!

¹⁷ “Hub, patingihi aku. Itultul ag isabi niku sa kanmu kang manga nalakawan.

¹⁸ Makatultul diman tungkul siti ti manga madunung pag tawu nagdunung ginan sa kanda manga ginurang.

¹⁹ Madunung gid sida, dahil sida lang ti mag-apu kanda daga, ag unman may manga taga iba pag rugar magsakup sa kanda.

²⁰ “Ti daut pag tawu mag-agwanta sa buu buhi niya.

²¹ Pirmi siya pagkulbaan, ag una sa udas unman may mahawag magkadala siya barang dugmaun manga tulisan.

²² Magkadala siya mag-atag sa madlum barang matyun siya.

²³ Magtalang-talang siya sa kay maghanap karan-unun una naan. Alam niya arani rumas-ug ti kadamhakan.

²⁴ Masyadu kay pagkamadalaun, parihu sa hari mandugma sa labanan.

²⁵ Magpangyari inda sa kanya dahil maglaban siya sa Makamaskihan pag Diyus.

²⁶ Ga parihu lang sa maghiyaput siya sa matibay pag panangga ag gustu gid labanan ti Diyus.

²⁷ Una mayaman ag matabul siya taynguna,

²⁸ mangulian siya sa nagba pag manga banwa, sa manga balay unman may mag-uli ag ga magba yi.

²⁹ Balaw yi pumarargu kay magyaman. Kay kasiyunan balaw yi magdugay, ag kay kagamitan balaw yi yumamu sa daga.

³⁰ Balaw siya makapalagiw sa kadamhakan. Bumaliw siya parihu sa kayu kay manga sanga inda masunug. Madura ti tanan niya kasiyunan sa usa lang ka uyup Diyus.

³¹ Balaw niya pagdayaun kay sadili sa panab-anan pagsarig sa manga bagay unman may pulus, dahil unman gid siya may mab-ul siyun ginan.

³² Sa unman waya magras-ug kay udas, matanggap niya kay parusa ag unman yi siya umalwan.

³³ Bumaliw siya parihu sa ubas magkarabak kay latuy pag manga burak, ngatay parihu sa kayu ulibu magkararagdag kay manga busang.

³⁴ Dahil ti manga balaw maka-diyus magkaramatay unman may linahi. Ag magkara-irub ti ipinatindug nida pag manga balay sa panab-anan panguwarta.

³⁵ Pag-isipun nida pirmi man-gulu, manmuwat daut, ag mandaya.”