Hub 14 - Hanunuu

¹ “Kami manga tawu lang dag-ud kanmi buhi, ag mayamu kanmi kakurian.

² Parihu kami sa busang kayu magkabuklad ag balaw dugay magkarubay, ngatay parihu sa aninu kadaka lang magkadura.

³ Hayga pagtanudan gid nimu ti tawu, Panginuun? Pagkaibgan waya nimu siya.

⁴ May tawu aw lugud sa kanmu hurusayan magkabuhi matadlung gid? Unman! Dahil ti tanan iinanak makasalanan.

⁵ Itinagka yi nimu nu kabitay kadugay ti buhi tawu. Ag unman siya makapasubra sa iinalistu nimu pag udas sa kanya.

⁶ Nakan danga yi lang pagsunsuna ti tawu, pabay-ani yi lang siya hampay makapahari siya parihu sa usa ka manugtarabahu pagkalawuy tarabahu.

⁷ “Nu puldun ti usa ka kayu, may pag-asa waya mabuhi inda ag manalingsing maan.

⁸ Una namatay yi kay puun inda ag maganit yi kay manga gamut,

⁹ nu madanuman manalingsing waya inda parihu sa usa ka bag-u tanum.

¹⁰ Dapat nu ti tawu mamatay, madura yi ti tanan niya kusug. Pagka-ugtas niya arup imaw yi inda kay katugkaan.

¹¹ Nu kabitay maghunas ti danum sa dagat ag magkak-at ti sapa,

¹² ti tawu katunda diman magkamatay, unman siya bumangun ngatay mipulaw sa kay maturugan tugka sa madura ti kalangitan.

¹³ “Panginuun, nu mahimu itagu yi lang nimu aku sa ulian manga namatay tugka sa madura kanmu pangagalit, ag pagtagka kawu udas kuntay alalahanun nimu aku ati.

¹⁴ Nu mamatay ti tawu mabuhi aw waya siya uman? Agwantahun niku ti tanan udas sa kang mag-agwanta tugka sa rumas-ug ti udas matapus inda.

¹⁵ Sa udas manawag kawu sa kangku, Panginuun, mansagut aku. Alalahanun nimu aku kanmu linalang.

¹⁶ Una sa tunda pag udas bantayan nimu kang manga pagbuwatun, dapat danga yi nimu pag-alalahana waya kang kasalanan.

¹⁷ Parihu lang isinukad lang nimu inda sa bay-ung hampay matakluban ag balaw yi nimu makitan waya.

¹⁸ Dapat nu kabitay magkapugdak ti bantud ag magkalalilid ti batu ginan sa dirig,

¹⁹ ag nu kabitay magnipis ti batu sa parargu magbulus danum ag magkatunu ti daga dahil sa mabisug pag uran, katunda diman pagdautun nimu ti pagsarig tawu.

²⁰ Pagtaluhun nimu siya pirmi ag magkamatay siya, ag pagbag-uhun nimu kay uyahun nu tigbak yi siya.

²¹ Balaw niya maalaman nu ngatay kay manga anak makatanggap ikadayaw ngatay kakay-ahan.

²² Ti mag-asaydan lang niya imaw kay sadili kakurian ag karukuan.”