Hub 13 - Hanunuu

¹ “Nakitan ag nadnugan niku ti tanan pagsabihun niyu, ag naintindihan niku inda.

² Nu unu kanyu alam, alam diman niku; balaw kamu abwat sa kangku.

³ Dapat balaw aku magtagalabani sa kanyu sa kang kasaba nu unman sa Diyus Makamaskihan lang niku inda pag ipakarani.

⁴ Dahil paghingabtun niyu aku bulungun manga kapudilan. Kamu tanan parihu sa manugbulung unman may pulus.

⁵ Ti mayad danga yi lang kamu mag-ingay. Tunda ti pinakamayad niyu buwatun.

⁶ “Pakisuyu, patingihi niyu kang manga katuwiran.

⁷ Pag-apinan aw niyu ti Diyus sa panab-anan niyu pamudil?

⁸ Pagbaliwahan aw niyu siya, ga pag-apinan niyu sa talaghusay?

⁹ Nu suyasidun kamu Diyus, may mayad aw nguna siya makitan sa kanyu? Danga kamu mag-isip madaya niyu siya parihu sa kanyu magdaya sa manga tawu.

¹⁰ Pihu gid tamyawun kamu Diyus una apinan waya niyu siya.

¹¹ Unman aw lugud kamu magkadala sa kay kamaskihan?

¹² Ti pagbanggitun niyu pag sarabihun unman may pulus parihu sa dapug; kanyu manga katuwiran matpuk parihu sa anglit.

¹³ “Dag-ingay kamu habang magbagaw aku, ag pabay-ani lang niyu aku una unu ti mangyari sa kangku.

¹⁴ Handa aku ipasubu kang buhi.

¹⁵ Pihu matyun aku Diyus; unman yi aku may iba pagsarig. Dapat apinan di niku kang sadili sa kay atubangan.

¹⁶ Barang sa panab-anan inda makaribri aku, dahil ti tawu balaw maka-diyus unman gid pumakarani sa kay atubangan.

¹⁷ “Patingihi kaayad kang manga pagsabihun.

¹⁸ Taynguna alistu yi aku sa pag-apin sa kang sadili, alam niku unman aku may kasalanan.

¹⁹ Si unu lugud ti mamangdan kuntay nagsalan aku? Nu may imaw gid waydi, balaw yi aku mangingay tugka sa mamatay aku.

²⁰ “Diyus, duwa ka bagay lang ti hagadun niku sa kanmu, nu ipakaun nimu sa kangku balaw yi aku patagu sa kanmu:

²¹ apasi yi ti pagpakuri nimu sa kangku, ag danga yi aku pagpadalaa sa kanmu maradala pag pagbuwatun sa kangku.

²² Taynguna, pagbagaw kawu sa kangku ag sagtun kawu niku, ngatay aku ti bumagaw sa kanmu ag sagtun nimu aku.

²³ Tultuli aku nu unu lugud pag kasalanan kang nabwat. Pakakitan sa kangku kang manga paglapastangan ag manga salan.

²⁴ Hayga lugud mag-aman kawu sa kangku, ag pagbaliwun nimu aku kanmu kalaban?

²⁵ Hayga pagpadalaun ag pagbukadun nimu aku? Parihu lang waydi aku sa upa ngatay darag pag-ipayag durus?

²⁶ Magsurat kawu marasakit pag manga bangdan laban sa kangku, ag pagpabayadun nimu aku sa manga kasalanan nabwat niku katpung anak-anak di waya aku.

²⁷ Ga pinaulian nimu gapus tarikada kang manga lulud. Pagbantayan nimu ti kada tiklang niku, ag pagdasnun nimu ti manga liud niku lulud.

²⁸ Nakan parihu aku sa matpuk pag bagay magkarunut ngatay parihu sa rutay pagdautun iyay.”