Hub 12 - Hanunuu

Nagbagaw si Hub

¹ Bag-u nagsagut si Hub,

² “Kanyu aw lugud isip kamu lang ti madunung ag udyi may masawad madunung nu mamatay yi kamu.

³ Dapat aku hanggan madunung diman parihu ga kanyu; unman kamu lumabaw sa kangku. Alam diman niku inda tanan kanyu manga pagsabihun.

⁴ Nagbaliw karasarin-an aku niku manga kakilala una matadlung aku ag unman may alangan, hanggan una pagsagtun kaybi Diyus kang manga darangin.

⁵ Ti manga tawu parihu sa kangku, mag-agwanta ag ga magpu yi, pagsurugun manga tawu masalimpayaan lang.

⁶ Dapat ti manga tulisan ag ti manga magsurug sa Diyus pag manga tawu magkabuhi mahusay una kanda kabisugan imaw ti kanda pagdiyusun.

^7-8 “Dumunung kawu sa kulukalasi hayup — ti maglakaw, maglayang, magyapang, ag ti maglanguy.

⁹ Dahil alam nida tanan ti Panginuun ti nagbuwat inda.

¹⁰ Sa kamang niya ti buhi una ti arup tanan linalang, hanggan yi ti tawu.

¹¹ Nu ti dila tawu mag-alam nu hintay ti masarap ngatay ti balaw masarap pag karan-unun, ti tuli tawu mag-alam diman nu hintay ti mayad ngatay ti daut pag manga bagaw.

¹² Aduk kay magkaalaman ti gurangun pag tawu, dahil habang magdugay kay buhi, magyamu waya gid kay magkaalaman.

¹³ “Dapat ti Diyus balaw lang may kadunungan, nu unman may kamaskihan waya, ag sa kanya lang ti kang-ud pag pan-intindi nu unu ti kailangan buwatun.

¹⁴ Unman may makahiwat sa kay dinaut, ag unman may makapalwas sa kay pinirisu.

¹⁵ Nu amparahun niya ti uran, magkamara ti daga, nu pabay-anan niya ti uran, magbaha ag magkadaut ti daga.

¹⁶ Mabaskug siya ag marapanalu, sa sirung niya kamaskihan ti manugdaya ag ti magkadaya.

¹⁷ Pagduraun niya ti kadunungan manga manugpaanyu, ag pagbaliwun niya kurang sa intindi ti manga manughusay.

¹⁸ Pagpaighitun niya ti manga hari sa kanda turukawan ag pag-ipabihag.

¹⁹ Pagbahasan niya ti manga manughandug hanggan ti manga tawu sa kanda makapangyarihan pag katungkulan.

²⁰ Pagpahim-ungun niya ti manga pagsarigan pag manugpaanyu, pagbul-un niya ti kadunungan manga gurangun.

²¹ Pagsurugun niya ti may kangaranan pag manga tawu, ag pagbul-an niya kapangyarihan ti may kapangyarihan pag manga tawu.

²² Ipagpaburayhaw niya ti manga lihim, ag pagbuwatun marayaw ti madulum.

²³ Pagpabisugun niya ti manga nasyun, dapat pagtaluhun diman niya inda ag ipagpadamhak.

²⁴ Pagbuwatun niya manga kurang sa intindi kanda manga takinan, ag pagpatalangun sida sa pangawakawaan.

²⁵ Man-garapgap sida sa madulum ag mandampiray parihu sa langu.”