Hub 11 - Hanunuu

Nagbagaw si Supar

¹ Bag-u nagsagut si Supar taga Naama,

² “Kailangan masagut tunda kanmu manga pagbagawun. Balaw mapatutuuhanan kuntay unman kawu may kasalanan sa panab-anan lang magpakabagaw.

³ Balaw nimu kami mapahim-ung manga binagaw unman may pulus. Kanmu aw isip balaw nimi kawu sungyawun sa kanmu manga magpamuya.

⁴ Magsabi kawu kang-ud kanmu magpaniwala ag malumpiyu kawu sa atubangan Diyus.

⁵ Bumagaw mana ti Diyus sa kanmu,

⁶ ag sabihun niya sa kanmu ti manga bagay unman waya nimu magkaalaman. May manga bagay kuntay alam yi nimu ag may manga bagay unman diman waya nimu alam. Alam aw nimu ti parusa Diyus sa kanmu kurang waya sa dapat sa kanmu?

⁷ Masalman aw lugud nimu tanan-tanan ti tungkul sa Diyus?

^8-9 Mas abwat waya inda kaysa langit ag mas abasad waya inda sa ulian manga namatay. Maluang waya inda kaysa kalibutan ag mas daka waya kaysa dagat. Malu, maaput aw inda nimu naisipan?

¹⁰ “Halimbawa, dakpun kawu Diyus ag darahun sa hurusayan bag-u pirisuhun, si unu ti makaampara sa kanya?

¹¹ Alam gid niya nu si unu ti madaya pag manga tawu ag balaw milihim sa kanya kanda kadautan.

¹² Ga balaw mahimu ti usa ka unman may intindi bumaliw madunung, katunda diman balaw mahimu ti talun asnu manganak tawu.

¹³ “Hub, nu man-ampu lang kawu ag mandangup sa Diyus,

¹⁴ ag balaw yi kawu magpakadaut ag balaw nimu pahintulutan kanmu magtal-anakan magpakadaut,

¹⁵ pihu gid unman yi kawu mangay-a ag mabuhi kawu marig-un ag unman may pagkadalaan.

¹⁶ Bag-u malimtan yi nimu kanmu manga kakurian, bilang ga danum lang inda nanlawuy.

¹⁷ Ag kanmu buhi bumaliw masnag waya kaysa singgit init sa karaw-an sirang. Ti kadudulman nimu buhi rumayaw parihu sa surip.

¹⁸ Mamuhi kawu marig-un dahil may pagsarig kawu. Dahanan kawu Diyus ag makapahari kawu unman may pagkadalaan.

¹⁹ Maturug kawu unman may pumadala sa kanmu, ag mayamu ti manhagad awat sa kanmu.

²⁰ Dapat ti manga daut mibuyu, unman yi may mapalagiwan waya, ti kanda lang pagsarigan imaw ti kamatayan.”