Hub 10 - Hanunuu

¹ “Pagkayagtingan yi niku kang buhi, nakan ngani pasugtan yi niku kang pagriklamu. Sabihun yi niku ti tanan-tanan daut sa kang nalub-anan.

² Inda ti sabihun niku sa Diyus: ‘Danga dap nimu aku pagpihua kuntay daut. Sabiha dap nimu sa kangku nu hintay kang kasalanan sa kanmu.

³ Magbaya aw lugud kawu pagpakurianan nimu aku? Hayga pagbugyahan nimu kanmu binuwat pag tawu, ag pagpasnuan ngap nimu ti paggayakun daut pag manga tawu?

⁴ Kanmu pamantay parihu aw lugud sa pamantay tawu?

⁵ Kanmu buhi parihu lang aw lugud kay kadag-ud sa buhi tawu?

⁶ Hayga pagpilitun nimu aku paghanapan kasalanan?

⁷ Alam nimu unman aku may kasalanan, dapat si unu ti manribri sa kangku ginan sa kanmu?

⁸ “ ‘Kawu ti nagbuwat ag naghistuda sa kangku, bag-u kainda pag ipadamhak nimu aku.

⁹ Isipa nimu, hinistuda nimu aku gin sa daga, nakan kainda ulian yi nimu aku sa daga?

¹⁰ Kawu ti naghistuda sa kangku sa tiyan niku ina, parihu sa kisu binuwat ginan sa gatas.

¹¹ Hinistuda nimu aku may manga but-ul ag manga kusug, bag-u sinaput nayi ag lukub.

¹² Pinakan-an nimu aku buhi, pinakakitan kaayadan ag inalagaan diman nimu aku.

¹³ Dapat kainda naalaman niku ti tutuu pag gayak nimu sa kangku,

¹⁴ bantayan nimu aku nu sumalan, bag-u balaw nimu aku patawadun.

¹⁵ Nagsalan man aku una unman, parihu lang kaawaawa aku. Dahil nangay-a gid aku ag nakurian sa kang manga inagwanta.

¹⁶ Paghingbutun niku makabangun, dapat pagtiidan nimu aku parihu sa liyun hampay midamhak. Pag-ipakakit nimu kanmu kamaskihan laban sa kangku.

¹⁷ Parargu nimu aku pag-ihabla, ag lalu di inmamat kanmu galit sa kangku. Unman may apas kanmu maglaban sa kangku.

¹⁸ “ ‘Hayga lugud pinahintulutan waya nimu mianak aku? Mana namatay yi lang aku sa unman waya may nakakit sa kangku.

¹⁹ Mana balaw yi lang aku linalang. Namatay yi lang mana aku sa tiyan niku ina ag sa pagkalusad rargu ilinbung.

²⁰ Diit wadi ti nasawad pag udas sa kangku, nakan pabay-ani yi lang aku hampay una ngalay lang pag udas masulung diman aku,

²¹ habang unman waya aku mag-atag sa ulian mapanglaw ag madulum, nu naan balaw yi aku makabalik sitay.

²² Madulum gid ati; pasay lang yabi ag unman gid may rayaw, ag unman ati may kahusayan.’ ”