Hub 1 - Hanunuu

Ti Matadlung pag Pangabuhi ni Hub

¹ May usa ka lalaki mag-uli sa rugar Us kay ngaran si Hub. Matadlung siya, ag unman may ikasabi kay pangabuhi. Maginalangun siya sa Diyus ag maaman sa magbuwat daut.

² Pitu kay anak lalaki, ag tulu kay anak babayi.

³ May 7,000 siya ka karanidu, 3,000 kay kamilyu, bag-u 500 mag-asawa baka, ag 500 kay asnu babayi. Mayamu diman kay suruguun. Siya ti pinakamayaman sa tanan tawu baliwa sa butlakan daga Israil.

⁴ Ugali yi waydi manga anak lalaki ni Hub ulublusan maghandaan sa kanda manga balay, bag-u pagban-awan nida kanda tulu ka patar-ari babayi.

⁵ Kada matapus kanda handaan, maghandug si Hub para sa kay manga anak hampay sida malumpiyu. Madlum surip waya siya mag-ipulaw maghandug manga handug pagsunugun para sa kada manga anak niya, dahil mag-isip siya barang nagkasala kay manga anak ag barang tinikis magbagaw daut laban sa Diyus sa kanda tagipusuun. Pirmi gid katida kay pagbuwatun ni Hub.

Ti Un-an Pagsubuk sa kan Hub

⁶ Sa usa ka sirang, nagtiripun ti manga anghil sa atubangan Panginuun, ag napaminsan waydi sa kanda si Satanas.

⁷ Magkun ti Panginuun sa kan Satanas, “Naan ginan kawu?” Sinmagut si Satanas, “Mapalibutan sa buu kalibutan.”

⁸ Magkun sa kanya ti Panginuun, “Nakitan aw nimu si Hub kang suruguun? Unman siya may kaparihu sa buu kalibutan. Matadlung siya, ag unman may ikasabi kay pangabuhi. Maginalangun siya sa kangku ag maaman sa magbuwat daut.”

⁹ Sinmagut si Satanas, “Magkadala si Hub sa kanmu dahil pagpapaladan nimu siya.

¹⁰ Pag-alagaan nimu siya hanggan kay magtal-anakan, kaibahan yi ti tanan niya manga kasiyunan. Pagpapaladan nimu una hintay kay pagbuwatun niya. Nakan lalu di gid mag-amat magyamu kay manga hayup sa buu daga.

¹¹ Dapat malu bul-a nimu tunda tanan sa kanya, pihu saadan gid niya kawu.”

¹² Magkun ti Panginuun sa kan Satanas, “Ta, bul-a nimu ti tanan sa kanya, dapat danga lang nimu siya pagsakti.” Nakan ginminan ngani si Satanas sa atubangan Panginuun.

¹³ Sa usa ka sirang, habang maghandaan ti magtar-arian sa balay panganay pag anak ni Hub,

¹⁴ rinmas-ug sa kan Hub ti usa ka tawu ag nagbarita magkun, “Habang kanmu manga baka pag-iaradu nimi ag magharab waydi kanmu manga asnu babayi sa kay luwas,

¹⁵ kadaka nandugma ti manga Sabiyu. Tabu dinara ti manga hayup ag pinanmatay kang manga kaibahan. Aku wadi ti nakapalagiw hampay mamarita sa kanmu!”

¹⁶ Sigi waya ti bagaw tawu, rinmas-ug waydi ti usa waya ka tawu ag nagbarita magkun, “Nasakpan duy kilat kanmu manga karanidu hanggan kay manga manug-alaga nasunug sida tanan. Aku wadi ti nakapalagiw hampay mamarita sa kanmu!”

¹⁷ Sigi waya ti bagaw tawu, may usa maan ka tawu rinmas-ug ag nagbarita magkun, “Dinugma kami tulu ka gurupu manga Kaldiyu, dinara lang ti manga kamilyu ag pinanmatay lang kang manga kaibahan. Aku wadi ti nakapalagiw hampay mamarita sa kanmu!”

¹⁸ Sigi waya ti bagaw tawu, usa yi gid maan ti rinmas-ug ag nagbarita magkun, “Habang maghandaan kanmu manga anak sa balay nida panganay,

¹⁹ kadaka lang rinmas-ug ti mabisug gid pag bagyu ginan sa pangawakawaan ag rargu narangga ti balay. Nagkaradugsakan kanmu manga anak rargu namatay. Aku wadi ti nakapalagiw hampay mamarita sa kanmu!”

²⁰ Pagka tida nadnugan ni Hub, tinmindug siya ag ginitas kay rutay dahil sa karukuan. Bag-u inuguy niya kay buhuk bag-u napadapa sa daga hampay sumamba sa Panginuun.

²¹ Magkun siya, “Iinanak aku unman may dara ag mamatay diman aku unman may dara. Ti Panginuun ti nag-ayaw una hintay pag kasiyunan niku, ag ti Panginuun diman ti bum-ul inda. Dayawun gid ti ngaran Panginuun!”

²² Una katida ti nangyari, balaw gid nagsalan si Hub. Unman niya sinisi ti Diyus.