Hirimyas 9 - Hanunuu

¹ “Nu bubun lang mana danum kang ulu, ag kang manga mata bulbugan luwa, manlumi aku sirang yabi para sa namatay pag manga kasimanwa niku.

² Nu may maulian lang mana aku sa pangawakawaan hampay makapakarayu aku sa kang manga kasimanwa, dahil sida tanan nandaya sa Panginuun ga babayi magpanguragin.”

³ Magkun ti Panginuun, “Pirmi sida alistu sa kapudilan parihu sa ugyung alistu yi ipabkas. Kapudilan ti maglutaw sa inda pag rugar ag balaw katutuuhanan. Mag-amat di gid kanda magbuwat kasalanan, ag unman nida aku pagkilalan-un.

⁴ “Pag-aman kamu sa kanyu kaparihu, danga kamu magpaniwala sa kanyu manga katawuhan, dahil ti kada usa magdaya ag maglibak sa kay kaparihu.

⁵ Ti kada usa magdaya sa kay kaparihu, unman una di usa ti magbagaw katutuuhanan. Naanad yi magpudil kanda dila, pagbudlayun nida kanda sadili sa pagbuwat kasalanan.

⁶ Lunsay yi lang darayaan kanda pagbuwatun, dahil sa darayaan udyi nida aku pagkilalan-un.

⁷ Nakan aku, ti Panginuun Makamaskihan, magkun lunsayun niku sida ga baul ag subukun. Hintay waya kang mabuwat sa kanda?

⁸ Kanda dila ga ugyung makamatay. Lunsay yi lang pandaya kanda pagsabihun. Maghampang sida mayad sa kanda kaparihu dapat kanda tagipusuun daut ti paggayakun.

⁹ Unman aw kailangan niku sida parusahan? Unman aw kailangan yi niku balusan ti kainda pag nasyun? Aku, ti Panginuun, ti magsabi inda.”

¹⁰ Magkun si Hirimyas: Manlumi gid aku kabisug para sa manga kabantudan ag mangamiraw aku para sa manga pasturan. Dahil mapanglaw yi inda ag unman yi gid may maglakaw. Udyi may madnugan mag-inga manga baka, nighit yi ti manga manuk hanggan ti manga hayup.

¹¹ Dahil magsabi ti Panginuun, “Wasakun niku ti Hirusalim, bumaliw inda ulian manga talun idu. Buwatun niku ga pangawakawaan ti manga banwa Huda tugka sa unman yi may mangulian siyun.”

¹² Namaingana aku sa Panginuun, “Si unu duy ti madunung pag tawu makaalam sa inda pag manga pangyayari? Sa kantapu duy pag-itinultul nimu ti tungkul sitay hampay maitultul inda sa manga tawu? Hayga duy nadaut inda pag daga bag-u nagbaliw ga pangawakawaan udyi paglakawan?”

¹³ Sinmagut ti Panginuun, “Nangyari inda dahil unman nida sinunud ti manga sugu ipinakaun niku sa kanda. Balaw sida nagsunud sa kangku una sa manga sinugu niku.

¹⁴ Bagkus ngap sinunud nida ti disisyun maganit pag tagipusuun nida. Nagsamba sida sa kan Baal parihu sa itinudlu sa kanda nida manga kaumputan.

¹⁵ Nakan aku, ti Panginuun Makamaskihan, ti Diyus Israil, magkumun pakan-un niku inda pag manga tawu mapait karan-unun bag-u painmun danum may hilu.

¹⁶ Bululagun niku sida una naan pag nasyun sa balaw nida magkakilala una manga kaumputan nida. Mamadara aku gurupu man-gira sa kanda hampay lubus sida maruris.”

¹⁷ Magkun waya ti Panginuun Makamaskihan, “Isipun niyu nu hintay ti magpangyari! Tawaga niyu ti manga babayi tagalumi, lalu gid ti manga anad maglumi.

¹⁸ Kadali gid sida pag-atag hampay lumian kang manga nasakupan tugka sa bumulus kanda luwa.

¹⁹ Patingihi ti manga lulumian sa Hirusalim. Magkun ti manga tawu, ‘Winasak yi kita! Makakaray-a inda ti nangyari sa kanta! Kailangan tayakan yi nita kanta daga dahil winasak yi kanta manga ulian!’ ”

²⁰ Taynguna, kamu pag manga babayi, patingihi niyu ti pagsabihun Panginuun. Patingihi gid niyu inda kaayad. Tudlui niyu kanyu manga anak babayi hanggan kanyu kaparihu kuntay paglumi hanggan pag-amiraw.

²¹ Rinmas-ug ti kamatayan sa kanta magtal-anakan hanggan sa mapag-un pag bahagi nita banwa. Minatay ti manga anak magbuybuya sa manga baklayan hanggan ti manga kalay-awan lalaki magtiripnan sa manga buruybuyahan.

²² Bag-u magkun ti Panginuun, “Mawayak ti manga bangkay ga manga paruk sa tanman, ga manga butir natayakan manga manug-ani, udyi may mamunpun tunda.”

²³ Magkun waya gid ti Panginuun, “Balaw kailangan pag ipadayaw madunung kay kadunungan, ngatay mabisug kay kabisugan, aw ngatay ti mayaman kay kayamanan.

²⁴ Una si unu nu magkaibug magpadayaw, kailangan lang niya ipadayaw kuntay nakilala niya ag magkaintindihan kuntay aku ti Panginuun maawaun ti magbuwat kang-ud ag matadlung sitay sa babaw daga, dahil imaw tida ti pagbayaun niku. Aku, ti Panginuun, ti magsabi inda.”

^25-26 Magkun waya ti Panginuun, “Rumas-ug ti sirang parusahan niku ti nasyun Ihiptu, Idum, Amun, Muab, hanggan ti tanan mag-uli sa pangawakawaan sa arayu pag manga rugar. Ti manga mag-uli siyun pag nasyun manga tinuri, dapat unman sida magdayaw sa kangku. Ag parihu sida sa manga taga Huda. Kanyu bilug tinuri, dapat kanyu tagipusuun unman magbag-u.”