Hirimyas 8 - Hanunuu

¹ Ag magkun waya ti Panginuun, “Sa ati pag udas, bul-un ginan sa kalubngan ti manga but-ul manga hari, manga takinan Huda, hanggan yi ti manga manughandug, manga purupita, ag manga nasakupan sa Hirusalim.

² Bag-u wayakun inda sa daga mabuladan sa init, sa rayaw bulan, ag manga pamgasan kanda pagmahalun, sinirbihan, sinunud, pinaingan-an, ag sinamba. Udyi utru tipunun ti manga but-ul nida una ilubung, nu unman wayakun yi lang sa daga ga ugat.

³ Ti nasawad buhi sa inda pag daut nasyun wayakun niku sa iba ka manga nasyun, ati gustuhun waya nida ti mamatay kaysa mabuhi. Aku, ti Panginuun Makamaskihan, ti magsabi inda.”

Ti Kasalanan ag ti Sintinsiya

⁴ Magkun sa kangku ti Panginuun, sabihun niku inda sa manga tawu: “Nu nidapa ti tawu, unman aw bumangun maan siya? Nu tinmalang siya, unman aw bumalik maan siya?

⁵ Dapat kamu pag manga taga Hirusalim, hayga parargu kamu magpakarayu sa kangku? Hayga dayu tayakan niyu ti manga diyus-diyusan magpaumang sa kanyu ag pagbalik sa kangku?

⁶ Pinatingihan niku mayad ti manga binagaw niyu, pat-ay balaw tutuu kanyu sinabi. Una si unu sa kanyu unman gid may nag-ampu sa kanyu kadautan. Unman may nagsabi kuntay, ‘Hintay lugud ti binuwat niku?’ Bagkus ngap, ti kada usa sa kanyu maliksi sa magbuwat kasalanan ga kabayu magpalagiw tag sa girahan.

⁷ May alam waya ti tagwak, ti kalampati ag ti alipasang nu kapira sida pag lumayang atag sa tuhay pag rugar ag nu kapira sida pag bumalik, dapat kamu manga pinili niku unman may alam sa kang manga surundanun.

⁸ Kabitay niyu magkasabi kuntay madunung kamu, dahil aw alam niyu ti manga kasuguan Panginuun? Kay tutuu, binag-u tida niyu manga manugtudlu.

⁹ Mangay-a ti manga mag-isip madunung sida. Madala gid sida dahil pamihagun sida. Dinayu nida kang manga bagaw — buwatun aw nida inda nu ungud gid madunung sida?

¹⁰ Nakan ipakaun niku sa iba kanda manga asawa hanggan manga tanman. Dahil ginan sa pugri tugka sa may kaya pararihu nagbaliw maramuun sa kuwarta, hanggan yi ti manga purupita ag manga manughandug.

¹¹ Balaw nida pag ungdun kay magbulung sa biyag niku manga nasakupan, una masyadu yi inda. Pagsabihun nida mayad di ti tanan una balaw mayad.

¹² Pag-ikay-a aw lugud nida kanda manga ugali mayagting? Unman! Dahil unman yi sida may kauyaan! Unman ngani magkalayhum kanda uyahun. Nakan midamhak sida parihu sa iba. Maruris sida sa udas parusahan niku sida. Aku, ti Panginuun, ti magsabi inda.

¹³ Lubus niku sida rurisun ag dautun ti manga burak nida ubas hanggan igus; una kay manga labung magkararubay. Kang manga ipinakaun sa kanda magkaradura.

¹⁴ “Bag-u sabihun nida, ‘Unu waya ti pag-alagdun nita? Abala kamu, malagiw yi kita atabug sa manga inaladan batu pag banwa ag ati yi kita pag mamatay. Dahil pinihu yi kita mamatay Panginuun nita Diyus. Ga pinakan-an niya kita danum may hilu hampay inmun, dahil nagsalan kita sa kanya.

¹⁵ Nag-alagad kita kahusayan, dapat unman may rinmas-ug kahusayan. Nag-alagad kita kaayadan, dapat kadalaan ti rinmas-ug.

¹⁶ Ti ham-us kabayu manga kalaban mag-adnugan ginan sa Dan. Sa harihi di waya kabayu nida, pagtakigan yi ti buu daga. Rinmas-ug sida hampay wayakun inda pag daga hanggan ti tanan atay — ti manga banwa ag ti tanan manga mag-uli sitay.’ ”

¹⁷ Magkun ti Panginuun, “Pagpatingi kamu! Mamadara aku manga kalaban ga manga ulay may dalit unman may makaparignuk una si unu, ag kagtun nida kamu.”

¹⁸ Bag-u magkun si Hirimyas: Balaw gid madura kang karukuan. Pagdamdamun niku tagipusuun.

¹⁹ Patingihi niyu ti lulumian manga kasimanwa niku kuntay mag-adnugan inda sa buu daga. Magkun sida, “Unman yi aw lugud ti Panginuun sa Hirusalim? Unman yi aw lugud ati ti Diyus, ti Hari sa Hirusalim?” Sinmagut ti Panginuun, “Hayga niyu aku ginalit sa panab-anan niyu pagsamba sa manga diyus-diyusan unman may pulus?”

²⁰ Nagriklamu ti manga tawu, “Tapus yi ti tig-arani, tapus yi hanggan ti turungun, dapat unman waya kami mag-iribri!”

²¹ Magkaruku aku dahil sa nalakawan kakurian niku manga kasimanwa. Mag-amiraw aku ag magpamat-ungan gid.

²² Udyi aw may bulung sa Gilyad? Udyi aw may manugbulung ati? Hayga unman mag-ayad ti biyag manga kasimanwa niku?