Hirimyas 7 - Hanunuu

Nanudlu si Hirimyas

¹ Magkun ti Panginuun sa kan Hirimyas,

² “Pagtindug kawu sa sabian niku Balay, bag-u sabihun nimu kaindaay: ‘Pagpatingi kamu, kamu pag manga taga Huda magsaka sitay hampay mansamba sa Panginuun.

³ Inda ti pagsabihun Panginuun, Makamaskihan pag Diyus Israil: Bag-uha yi niyu kanyu ugali hanggan pangabuhi, hampay parargu niku kamu patahanun sa inda pag daga.

⁴ Danga kamu magpadaya sa manga tawu paulit-ulit magsabi kuntay unman may daut mangyari sa kanyu dahil sa kanyu ti Balay Panginuun. Magkun sida, “Atay sa kanta ti Panginuun! Atay sa kanta ti Panginuun!”

⁵ “ ‘Bag-uhun yi niyu lubus kanyu ugali hanggan pangabuhi. Taratuhun niyu sa kang-ud kanyu kaparihu,

⁶ ag danga yi niyu pag-apiha ti manga day-uhan, manga ilu, manga buranday babayi mag-uli asan sa kanyu daga. Danga niyu pagpihua ti manga unman may kasalanan, ag danga kamu magsamba sa iba pag manga diyus imaw ti mamadamhak sa kanyu.

⁷ Nu buwatun niyu inda, parargu niku kamu patahanun sa inda pag daga, kang ipinakaun sa kanyu ginurang hanggan aban.

⁸ “ ‘Dapat ay bantayi niyu nu hintay kanyu binwat! Magpaniwala kamu sa manga kapudilan unman may pulus.

⁹ Kamu mananakaw, manugmatay, magpanguragin, magkastigus sa kapudilan, magtuub kamangyan sa kan Baal, bag-u magsamba sa iba manga diyus balaw niyu magkakilala.

¹⁰ Bag-u pumakarani kamu ag tumindug sa atubangan niku sitay sa Balay Diyus, nu naan pagdayawun ti ngaran niku. Sabihun niyu, “Ribri kita sitay”. Pagkatapus, pagbuwatun yi maan niyu ti mayagting pag manga buruwatun.

¹¹ Hayga, unu kanyu hantup inda pag Balay Diyus kang pinili agud sambahun aku, paratag-an aw manga mananakaw? Mag-akitan niku ti manga pagbuwatun sa Balay Diyus. Aku, ti Panginuun, ti magsabi inda.

¹² “ ‘Pag-ati kamu sa Silu, ti un-an pag rugar kang pinili hampay sambahun aku, ag bantayan niyu nu hintay kang binwat sa ati pag rugar dahil sa binwat kadautan niku nasakupan Israil.

¹³ Habang pagbuwatun niyu ti daut pag manga bagay, paulit-ulit niku kamu pinaandaman, dapat unman kamu namatingi. Pagtawagan niku kamu, dapat ay unman kamu magsagut.

¹⁴ Nakan nu hintay kang binwat sa Silu buwatun diman niku sa inda pag Balay Diyus, kang pinili hampay sambahun aku, ti pagsarigan niyu pag Balay Diyus kang ipinakaun sa kanyu hanggan sa kanyu manga ginurang.

¹⁵ Kamu palayasun niku ginan sa kang atubangan parihu sa binwat niku sa manga katawuhan niyu, ti nasakupan Israil.’

¹⁶ “Nakan ngani Hirimyas, danga kawu magdarangin para sa inda pag manga tawu. Danga kawu magkaawa ngatay maghagad sa kangku para sa kanda, dahil balaw kawu patingihan niku.

¹⁷ Unman aw lugud nimu mag-akitan ti pagbuwatun nida sa manga banwa Huda hanggan sa manga baklayan Hirusalim?

¹⁸ Ti manga anak magkayu, ti manga ama magpamakut apuy, ti manga babayi magkamas arina hampay buwatun tinapay para sa Rayna Langit. Magsagda diman sida manga irinmun sa iba diyus hampay galitun aku.

¹⁹ Dapat aku aw ngani ti kanda pagsaktan? Bukun! Kanda di waydi sadili ti pagsaktan ag ti pag-ipauli sa makakaray-a.”

²⁰ Nakan aku, ti Panginuun Diyus, magsabi, “Ipaagum niku sa inda pag rugar ti masyadu pag pangagalit niku — sa manga tawu, sa manga hayup, sa manga puun kayu, hanggan sa manga tanum. Kang pangagalit ga apuy unman magkapsa.

²¹ “Bul-a yi lang niyu kanyu manga handug pagsunugun hanggan ti iba waya pag manga handug, bag-u kan-a yi lang niyu kay taguban. Aku, ti Panginuun Makamaskihan, ti Diyus Israil, ti magsabi inda.

²² Pagka ipinalwas niku sa Ihiptu kanyu manga ginurang, bukun lang niku sinugu sida pagsagda manga handug pagsunugun ag iba waya pag manga handug,

²³ sinugu diman niku sida kaindaay: ‘Sundun niyu aku, aku bumaliw yi kanyu Diyus ag kamu bumaliw yi nasakupan niku. Mangabuhi kamu angay sa palakaw pag-isugu niku sa kanyu hampay mayad kanyu kahamtangan.’

²⁴ “Pat-ay unman sinunud nida ngatay pinansin kang manga pagkumnun sa kanda. Bagkus ngap, sinunud nida ti gustu maraganit ag daut nida tagipusuun. Bagkus ngap, lalu waya sida nagpakarayu sa kangku.

²⁵ Ginan sa pag-ighit manga ginurang niyu sa Ihiptu taynguna tugka, parargu aku magpadara sa kanyu manga manugsirbi pag manga purupita niku.

²⁶ Dapat ay unman niyu sida pagpatingihan ngatay pagbatiun. Mas maganit waya kanyu manga ulu ag mas daut waya kanyu manga binwat kaysa kanyu manga ginurang.

²⁷ Hirimyas, nu sabihun nimu sa kanda inda tanan, balaw mamatingi sida sa kanmu. Nu tawagun nimu sida, balaw sida mansagut.

²⁸ Nakan inda kanmu sabihun sa kanda: Inda pag nasyun kay manga nasakupan dayu magsunud sa Panginuun nida Diyus, hanggan dayu magpatudlu. Udyi sa kanda ti katutuuhanan; udyi sida magbagaw tutuu.

²⁹ Manga taga Hirusalim, pakalbuhan kanyu manga buhuk bag-u yamtan hampay ipakakit kanyu karukuan. Panlumi kamu ati sa arabwat pag rugar, dahil binugyahan ag pinabay-anan Panginuun kanyu manga linahi, ti nagpagalit sa kanya.”

Ti Luung Maratyan

³⁰ Magkun ti Panginuun, “Nagbuwat daut ti nasakupan Huda. Ipinauli nida ti manga mayagting nida pag manga diyus-diyusan ati sa Balay Diyus, ti pinili niku pag rugar nu naan aku pag sambahun, nakan nauringan inda.

³¹ Nagpatindug diman sida simbahan sa abwat pag rugar sa Tupit, sa Luung Bin Hinum, hampay ati pagsunugun nida kanda manga anak bilang handug. Balaw niku inda pag-isugu sa kanda, balaw diman inda sinmulud sa kang isip.

³² Nakan pag-aman kamu, dahil aku, ti Panginuun magsabi, rumas-ug ti sirang tida pag rugar bukun yi ingarnan Tupit aw ngatay Luung Bin Hinum nu unman Luung Maratyan. Dahil ati pag-ilubung ti mayamu bangkay tugka sa udyi may hugada malubngan.

³³ Ti manga bangkay niku nasakupan tindukun manga manuk ag kan-un manga maraisug pag hayup, unman may mamugaw una si unu sa kanda.

³⁴ Amparahun yi niku ti kasulungan ag kabayaan sa manga baklayan Hirusalim. Ag udyi madnugan sa manga banwa Huda ti manga masulung pag busis manga bag-u ipinaasawa. Dahil bumaliw mapung-aw inda pag daga.”