Hirimyas 6 - Hanunuu

Napalibutan ti Hirusalim Niya manga Kalaban

¹ “Manga lahi ni Binhamin, pagpalagiw kamu ag pag patagu! Pag-ighit kamu ginan sa Hirusalim! Patunugun niyu ti budyung sa Tikuwa ag paamanan niyu ti Bit Hakirim, dahil rumas-ug yi ti kadamhakan ginan sa kanaway.

² Dautun niku ti marinu pag banwa Hirusalim.

³ Pasangputan inda manga kumandir hanggan nida manga sundalu. Mamatindug sida kanda manga turda sa kay sangput ag ati sida pag mankampu.

⁴ Sabihun manga kumandir, ‘Pag-alistu kamu! Pag-aput sa karaw-an sirang, girahun nita sida.’ Dapat pag-aput sa malambung, sabihun manga kumandir, ‘Mag-ipansak yi ti init, ag midyu magdulum yi.

⁵ Taynguna pag yabi yi lang kita pag gumira ag wayakun nita ti manga marig-un pag bahagi banwa.’ ”

⁶ Inda ti pagsabihun Panginuun Makamaskihan, “Pagpukan kamu manga kayu pantumpag sa alad batu Hirusalim, ag pagtumpuk kamu daga sa habig alad batu bag-u ati kamu pag lumakaw. Kailangan yi parusahan inda pag banwa dahil lantap yi atay ti manga magpan-api.

⁷ Parihu sa bulbugan parargu kay magbulus danum, parargu diman kay magbuwat kadautan. Pirmi magkabaritaan sa inda pag banwa ti kadautan hanggan ti magpanrangga. Pirmi niku mag-akitan ti manga panakitun hanggan manga biyag nida.

⁸ Manga taga Hirusalim, pasandam inda sa kanyu nu dayu waya kamu mamatingi, pakarayu gid aku sa kanyu; ag buwatun niku mapung-aw kanyu daga, udyi may mangulian siyun.”

⁹ Magkun waya ti Panginuun Makamaskihan: “Ti manga masawad buhi sa Israil ipatabu niku sa manga kalaban, parihu sa magputi ubas ti manga magkasawad. Pagbantayan gid nida kaayad ti manga sanga hampay bul-un kay manga magkasawad pag burak.”

¹⁰ Namaingana aku, “Dapat Panginuun, si unu duy kang pakan-an pasandam? Si unu duy nguna ti mamatingi sa kangku? Pinut-an duy nida kanda manga tuli hampay balaw sida makadnug. Pagkadat-an duy nida ti bagaw Panginuun, nakan dayu sida mamatingi.

¹¹ Masyadu diman ti galit magkaramdaman niku parihu sa Panginuun ag balaw niku maampara.” Magkun ti Panginuun, “Ipadamdam niku kang galit hanggan sa manga anak magbuybuya sa karsada, sa manga kalay-awan lalaki magtiripnan, sa manga may asawa ag hanggan yi sa manga gurangun.

¹² Ipakaun sa iba kanda manga balay, hanggan ti manga tanman ag kanda manga asawa. Mangyari inda nu naparusahan yi niku ti manga mag-uli sa inda pag daga. Aku, ti Panginuun, ti magsabi inda.

¹³ “Ginan sa pinakapugri tugka sa darayawun, pararihu lang sida manga maramuun sa kuwarta. Una ti manga purupita ag manga manughandug manga manugdaya diman.

¹⁴ Pagpabay-anan nida ti biyag niku manga nasakupan una masyadu yi. Pagsabihun di nida kuntay mayad di ti tanan una unman.

¹⁵ Pag-ikay-a aw lugud nida kanda manga ugali mayagting? Unman! Dahil unman yi sida may kauyaan! Unman ngani magkalayhum kanda uyahun. Nakan midamhak sida parihu sa iba. Maruris sida sa udas parusahan niku sida. Aku, ti Panginuun, ti magsabi inda.”

¹⁶ Inda waya ti pagsabihun Panginuun, “Pagtindug kamu sa pagsalakan dalan bag-u pagbantay kamu kaayad. Pagpaingana nu naan ti dalan ag mayad lakawan, bag-u ati kamu pag lumakaw. Ag magkaimaw kamu kahusayan. Dapat ay magkun kamu, ‘Dayu kami manlakaw siti.’

¹⁷ Nagpauli aku manga manugbantay bag-u magkun sa kanyu, ‘Patingihi niyu ti tunug budyung bilang pasandam.’ Dapat magkun kamu, ‘Balaw kami mamatingi.’

¹⁸ “Nakan kamu pag manga nasyun, pagpatingi kamu. Bantayi niyu kaayad nu hintay ti mangyari sa kanda.

¹⁹ Buu kalibutan, pagpatingi kamu! Mamadara aku kadamhakan sa manga tawu sitay bilang parusa sa kanda manga daut paggayakun. Dahil balaw nida pinatingihan kang manga bagaw, dinayu nida ti manga kasuguan niku.

²⁰ Unman may halaga sa kangku kanda manga pag-isagda kamangyan una ginan waya inda sa Shiba, ngatay manga pamanglu ginan waya sa arayu pag rugar. Balaw niku tanggapun kanda manga handug pagsunugun. Unman aku magbaya sa kanda manga handug sa kangku.

²¹ Nakan aku, ti Panginuun magsabi kuntay mamauli aku karadayaanan sa lakawan tunda pag manga tawu. Nakan magpu ti manga ama, hanggan kay manga anak lalaki, una ti manga magkakilala ag manga kamalay.”

²² Inda waya ti pagsabihun Panginuun, “Bantayi niyu, may manga sundalu magras-ug ginan sa kanaway pag daga, usa ka makapangyarihan pag nasyun ginan waya sa arayu pag rugar alistu yi gid gumira.

²³ Kanda dara armas manga pamana ag manga bangkaw. Marahigpit sida ag unman may pangaawa. Kanda ingay ga mabaskug pag humbak habang masakyan sa kanda kabayu. Rumas-ug sida hampay girahun kamu pag manga taga Hirusalim.”

²⁴ Nabaritaan nimi tungkul sa kanda nakan bag-u kami nanlulubay. Dala ag kakurian ti mag-asaydan nimi parihu sa babayi magpanamdam arani yi manganak.

²⁵ Danga yi kamu magluwas hampay umatag sa tanman ngatay lumakaw sa manga dalan, dahil may manga kalaban una naan alistu manmatay. Madala sa kanta palibut.

²⁶ Manga kasimanwa, pagsulung kamu rutay panhimanglaw, ag pagpalilid sa dapug hampay ipakakit kanyu karukuan. Paglumi kamu ga namatay kanyu bugtung anak lalaki. Dahil kadaka kita girahun kalaban.

²⁷ Magkun sa kangku ti Panginuun, “Binwat niku kawu ga taga alam manga baul, hampay maalaman nimu ti pagkatawu niku nasakupan.

²⁸ Malaban sida tanan ag maraganit kanda ulu, kay kaganit ga galang ag baul. Magpamuya ag magpanluku sida sa kanda kaparihu.

²⁹ Pagpainitun masyadu ti pugun hampay lunsayun ti galang ginan sa timga malakayan. Dapat unman diman nalunsay ti galang. Katida diman kang nasakupan, unman diman may pulus ti paglunsay sa kanda, dahil unman diman lubus nab-ul kanda kadautan.

³⁰ Ingarnan sida, ‘Dinayu pag Galang’ dahil dinayu niku sida.”