Hirimyas 52 - Hanunuu

Ti Pagkawayak Hirusalim

¹ Si Sidikyas 21 ka timpu kay idad pagka naghari siya. Sa Hirusalim siya pag mag-uli ag naghari siya sa sulud 11 ka timpu. Kay ina niya si Hamutal kay anak ni Hirimyas taga Libna.

² Daut ti binuwat niya sa magbantay Panginuun, parihu sa binuwat ni Hari Hihuyakim.

³ Sa galit Panginuun, tinulak niya ginan sa atubangan niya ti manga taga Hirusalim ag taga Huda. Ag taynguna naglaban si Sidikyas sa hari Babilunya.

⁴ Nakan katpung sa ikasiyam pag timpu kay maghari, pagka sa ikasampulu pag sirang sa ikasampulu pag bulan, naggira si Hari Nabukudunusur taga Babilunya hanggan kay buu gurupu sa Hirusalim. Nagkampu sida sa luwas banwa ag nagtumpuk daga sa saruy alad batu hampay ati sida pag lumakaw sa pagsulud nida sa banwa.

⁵ Pinalibutan nida ti banwa tugka sa ika-11 ka timpu sa kay maghari ni Sidikyas.

⁶ Katpung ikasiyam pag sirang sa ikap-at pag bulan sa tida diman pag timpu, masyadu yi ti kalun-usan sa banwa ag udyi may makaun ti manga tawu.

⁷ Winayak yi manga taga Babilunya ti usa ka bahagi alad batu banwa, nakan ginayak ni Sidikyas kuntay lumayas kaibahan kay buu gurupu. Dapat dahil sa pinalibutan yi sida manga taga Babilunya, nag-alagad sida tugka sa yumabi. Ati sida pag linmakaw sa sabian ati sa tab-anan duwa ka alad batu arani sa halamanan hari. Nalagiw sida atabug sa Karatagan Hurdan.

⁸ Dapat linagas sida manga sundalu Babilunya ag natakdan sida sa Karatagan Hiriku. Napablag sa kan Sidikyas ti tanan niya manga sundalu

⁹ ag nadakup siya. Dinara siya sa hari Babilunya sa Ribla, sa daga Hamat, ag ati siya sinintinsiyahan.

¹⁰ Ati sa Ribla, sa atubangan gid ngap ni Sidikyas, minatay hari Babilunya kay manga anak lalaki ni Sidikyas, hanggan ti tanan takinan sa Huda.

¹¹ Ag ipinaluwat hari kay manga mata ni Sidikyas, ag tinarikadahan siya bag-u dinara sa Babilunya. Ati siya pag pinirisu tugka sa siya namatay.

Ginuba ti Balay Diyus ag Binihag ti Nasakupan sa Huda

¹² Katpung ikasampulu pag sirang sa ikalima pag bulan, pagka sa ika-19 pag timpu kay maghari ni Nabukudunusur sa Babilunya, nag-atag sa Hirusalim si Nibusaradan kumandir manga guwardiya hari Babilunya.

¹³ Inirub niya ti Balay Diyus Panginuun, ti balay hari, ti tanan balay sa Hirusalim, ag ti tanan manga mahalaga pag daraka balay.

¹⁴ Sa pagdumara niya, ginuba manga sundalu Babilunya ti manga alad batu masangputan sa Hirusalim.

¹⁵ Ag dinara niya bihag ti manga nasawad tawu sa banwa, hanggan yi ti pira ka pinakapugri pag manga tawu hanggan ti manga tawu napakampi sa hari Babilunya.

¹⁶ Dapat tinayakan diman niya ti pira ka pinakapugri pag manga tawu hampay alagaan ti manga ubasan hanggan ti manga tanman.

¹⁷ Dinaut manga taga Babilunya ti manga kasangkapan sa Balay Diyus Panginuun: ti tulduk galang, ti manga karitun paggamitun sa magtaas danum, ag ti daka pag sukadan danum galang pag-ingarnan nida Dagat. Ag dinara nida sa Babilunya ti tanan galang.

¹⁸ Bin-ul diman nida ti manga kawali, manga pala, manga pamulud sa mitsa, manga malukung hanggan tasa ag iba waya galang paggamitun sa Balay Diyus.

¹⁹ Bin-ul ni Nibusaradan ti manga palanggana, manga sukadan baga, manga malukung, manga anglit, manga sukadan sulu, manga tasa ag manga malukung paggamitun sa pamakaun handug irinmun, ag iba waya kagamitan binuwat sa gintu ag pilak.

²⁰ Balaw kaya kiluhun ti manga galang ginan sa duwa ka tulduk, sa sukadan danum pag-ingarnan nida Dagat, sa 12 ka tudu galang turungbawan inda ag manga karitun paggamitun sa magtaas danum. Inda pag manga gamit ipinabuwat kaybi ni Sulumun para sa Balay Diyus Panginuun.

²¹ Kay abwat ti kada tulduk 18 ka luk-an siku ag ti kabuuhan lidung 12 ka luk-an siku, may buslut inda sa karaw-an, ag kay damul galang upat ka purgada.

²² Ti kada tulduk may imaw ga ulu sa tungud, 5 ka luk-an siku kay abwat. Pinabuyungan inda ga tarikada sinulput-sulput ag sinangputan inda pamarinu galang, kay histuda burak kayu pumigranata.

²³ Sa saruy kada tulduk may 96 ka pamarinu histuda burak kayu pumigranata, 100 tanan ti manga burak kayu pumigranata masangputan sa tarikada sinulput sa ga ulu pag tulduk.

²⁴ Binihag diman ni Nibusaradan sida ni Siraya pangulu manughandug, si Sipanyas ti pangadwa pag pangulu manughandug ag ti tulu ka manugbantay sabian Balay Diyus.

²⁵ Inda waya gid ti manga nakitan niya ag dinara bihag ginan sa banwa: ti may kangaranan pag manga sundalu Huda, ti pitu ka manugpatigayun hari, ti kumandir sa magbuul ag magpaantigu manga tawu buwatun sundalu ag ti 60 waya ka nasakupan ati.

²⁶ Sida tanan dinara ni Nibusaradan sa hari Babilunya ati sa Ribla,

²⁷ sakup Hamat. Ag ati sida pag ipinamatay hari. Nakan ti manga nasakupan sa Huda binihag ag dinara pakarayu sa kanda daga.

^28-30 Inda kay bilang manga tawu binihag ni Hari Nabukudunusur: Katpung ika-7 pag timpu kay maghari, 3,023 ka tawu. Katpung ika-18 pag timpu kay maghari, 832 ka tawu. Katpung ika-23 pag timpu kay maghari, 745 ka tawu. Si Nibusaradan kumandir manga guwardiya ti nagbihag sa kanda. May kabuuhan bilang 4,600 ti binihag pag tawu.

Pinalpasan si Hihuyakin

³¹ Katpung ika-37 pag timpu kay pagkabihag ni Hari Hihuyakin taga Huda, naghari sa Babilunya si Ibil Mirudak. Pinalpasan niya si Hihuyakin pagka sa ika-25 pag sirang sa ika-12 pag bulan sa tida diman pag timpu.

³² Mabuut siya sa kan Hari Hihuyakin ag pinakan-an katungkulan mas abwat man kaysa iba pag manga hari bihag diman ati sa Babilunya.

³³ Nakan balaw yi nagsulung si Hari Hihuyakin rutay para sa manga pirisu, ag tida ginan magkaun yi siya kaibahan hari.

³⁴ Ag sirang-sirang pag-ayawan siya hari Babilunya kay pangailangan tugka siya namatay.