Hirimyas 51 - Hanunuu

Dugang pag Parusa sa Babilunya

¹ Inda waya ti sinabi Panginuun tungkul sa Babilunya: “Hamunun niku ti manugruris hampay girahun ti Babilunya hanggan kay nasakupan inda.

² Mamadara aku manga day-uhan hampay girahun ag wasakun ti Babilunya parihu sa upa payagun durus. Girahun nida ti Babilunya sa tanan bahagi sa sirang kadamhakan inda.

³ Balaw yi magkaimaw udas ti manga manugpana taga Babilunya kuntay magamit kanda ugyung ngatay manga panangga nida. Unman sida may sawadan kalay-awan lalaki. Lubus nida rurisun ti manga sundalu sa Babilunya.

⁴ Mabugtangan ti manga nabiyagan nida pag bangkay sa manga dalan.

⁵ Dahil aku, ti Panginuun Diyus Makamaskihan, ti Banal pag Diyus sa Israil, balaw dinayu ti Israil ag Huda una waya punu kadautan kanda daga.

⁶ “Pagpalagiw kamu ginan sa Babilunya! Iribri niyu kanyu buhi. Balaw kamu kailangan mamatay dahil sa kasalanan Babilunya. Udas yi hampay balusan niku siya angay sa kay manga binwat niya.

⁷ Ga siya ungut gintu sa kang kamang punu intus. Pinainman niya ti manga nasyun sa buu kalibutan, bag-u sida nalangu ag nagbaliw paung.

⁸ Kadaka mawayak ti Babilunya! Ihimanglaw niyu siya! Bulunga niyu kay manga biyag barang abi umayad siya.”

⁹ Magkun ti manga Israilita mag-ulian ati, “Binulung nimi ti Babilunya dapat unman yi siya nabulung. Pabay-anan yi lang nita siya, muli yi kita sa kanta manga rugar. Dahil tugka yi sa langit kay kadautan nakan parusahan yi siya Panginuun.

¹⁰ Ibinalus kita Panginuun. Abala kamu, atabug kita sa Hirusalim ag sabihun nita ati ti binuwat Panginuun nita Diyus.”

¹¹ Mamalus ti Panginuun sa Babilunya dahil sa pagguba sa Balay Diyus niya. Ginanyat Panginuun ti manga hari sa Midya hampay wasakun ti Babilunya dahil inda ti turunu niya. Magkun siya, “Asaa niyu kanyu manga ugyung ag alistuhan kanyu manga panangga.

¹² Ipaabwat niyu ti bandira mustara sa paggira sa Babilunya. Dugangi niyu ti manga manugbantay; ag ipalastar ti manga manugbantay. Sangputan niyu ti banwa! Udas yi hampay buwatun Panginuun ti gayak niya laban sa manga taga Babilunya.”

¹³ Babilunya, abunda kawu sa danum ag abunda diman kawu sa kayamanan. Dapat rinmas-ug yi ti katapusan nimu, ti sirang nimu kadamhakan.

¹⁴ Nanumpa ti Panginuun Makamaskihan sa kay sadili niya magkun siya, “Ipagira gid niku kamu sa kayamuan kalaban parihu kay kayamu sa apan, ag manhuyaw sida panalu laban sa kanyu.”

Ti Pagdayaw sa Diyus

¹⁵ Linalang Diyus ti langit ag ti kalibutan sa panab-anan kamaskihan ag kadunungan niya.

¹⁶ Sa busis niya magsugu, maghagunung ti langit. Kaya niya magpalwang rurum ginan sa pinakasuru baliwa kalibutan. Pagpakilatun niya nu mag-uran, ag magpadara siya durus ginan sa kay haramnuan.

¹⁷ Ti manga magsamba sa manga diyus-diyusan manga yangag ag unman may naalaman. Mangay-a ti manga panday-pilak sa binwat nida diyus-diyusan dahil balaw inda Diyus. Unman may buhi.

¹⁸ Unman inda may pulus ag mayagting. Rumas-ug ti sirang midamhak sida tanan.

¹⁹ Dapat ti Diyus ni Hakub balaw parihu sa manga katida. Siya ti naglalang sa tanan bagay hanggan yi ti Israil, ti manga tawu kay pinili niya — Panginuun Makamaskihan kay ngaran niya.

Ti Martilyu Panginuun

²⁰ Magkun ti Panginuun, “Kawu ti panhampak niku, ti panhampak niku sa girahan. Sa panab-anan nimu, wasakun niku ti manga nasyun ag ti manga kaharian,

²¹ ti manga kabayu, ag ti manga kalisa ag ti manga masakyan inda.

²² Sa panab-anan nimu, rurisun niku ti manga lalaki ag babayi, gurangun hanggan ti anak, ag ti manga kan-akan ag daraga.

²³ Rurisun diman niku sa panab-anan nimu ti manga manada hanggan kay manga manug-alaga, ti manga manugtanman hanggan ti manga baka, ti manga pinunu ag iba waya manga manugpamahala.

²⁴ “Manga nasakupan niku, ipakakit niku sa kanyu kang pagbalus sa Babilunya hanggan sa kay nasakupan inda dahil sa tanan kadautan binwat nida sa Hirusalim. Aku, ti Panginuun, ti magsabi inda.

²⁵ “Kalaban niku kawu, Babilunya, kawu ti pag-ingarnan Bantud Manugwayak! Winayak nimu ti buu kalibutan. Gamitun niku kang kamaskihan hampay dautun ag irubun kawu.

²⁶ Unman may una hintay pag batu ti mab-ul sa kanmu hampay gamitun sa pagpatindug balay. Bumaliw maruku ti kahamtangan nimu hanggan waya aban. Aku, ti Panginuun, ti magsabi inda.”

²⁷ Paabwatan ti bandira tanda sa paggira! Patunugan ti budyung sa manga nasyun! Ialistu sida hampay girahun ti Babilunya. Sugua man-gira ti manga sundalu sa Ararat, Mini ag Askinas. Pagpili kamu takinan hampay girahun ti Babilunya. Pagpadara kamu manga kabayu parihu kay kayamu sa manga apan.

²⁸ Paalistuhun nimu ti manga hari sa Midya, hanggan kanda manga pinunu ag manga manugpamahala, hanggan ti tanan sakup nida pag nasyun hampay girahun ti Babilunya.

²⁹ Ga tawu pagtakigan ag magpabaring-baring sa sakit ti Babilunya, dahil buwatun Panginuun kay gayak laban siyun, unman yi may mangulian ag bumaliw mapung-aw tunda pag rugar.

³⁰ Umapas ti manga sundalu Babilunya sa paglaban ag mamirmaminti yi lang sida sa kanda kampu. Manlumuy sida ga malumuy pag babayi. Mairub ti manga balay sa Babilunya ag madaut ti manga sabian.

³¹ Dasun-dasun rumas-ug ti manga manugbarita hampay sabihun sa hari Babilunya kuntay ti buu banwa nasakup yi.

³² Naagaw ti manga diripayan sa manga sapa. Inirub ti manga kampu ag magkadala ti manga sundalu.

³³ Magkun ti Panginuun Makamaskihan, ti Diyus Israil, “Ti Babilunya parihu sa tirigu arani yi anihun ag giukun.”

^34-35 Magkun ti manga taga Hirusalim, “Si Hari Nabukudunusur sa Babilunya ga daragun kay naghalun sa kanmi. Nabsug niya kay tiyan manga kayamanan nimi. Tinayakan niya ti banwa nimi unman may isinawad, ga tapayan unman may sukad. Tinabug niya kami ag unman nimi alam nu unu ti buwatun nimi. Buwatun diman mana sa Babilunya kay binuwat niya sa kanmi hanggan sa kanmi manga anak. Bayadan mana nasakupan Babilunya ti manga minatay nida.”

³⁶ Nakan magkun ti Panginuun, “Manga taga Hirusalim, apinan niku kamu ag mamalus aku para sa kanyu. Pamarahun niku ti dagat ag ti manga bulbugan sa Babilunya.

³⁷ Wasakun niku inda pag nasyun! Bumaliw karasarin-an ag makasurumpa inda pag nasyun, ag unman yi may mangulian sitay nu unman manga talun idu.

³⁸ Ti manga taga Babilunya man-ngurub ga manga liyun.

³⁹ Ag dahil magkalun-us sida, alistuhan niku sida karan-an. Languhun niku sida, pasulungun ag paturugun sa hamuuk habang may udas ag balaw yi mimata. Aku, ti Panginuun, ti magsabi inda.

⁴⁰ Darahun niku sida hampay iyawun ga manga karanidu ag manga kambing.

⁴¹ Kabitay nagpu ti Babilunya? Ti pagdayawun pag nasyun sa buu kalibutan! Madala bantayun ti nangyari sa kanya!

⁴² Matap-ukan manga mabaskug pag humbak ti Babilunya.

⁴³ Bumaliw maruku ti manga banwa niya ga pangawakawaan yi unman may mag-uli ngatay udyi may lumawuy siyun.

⁴⁴ Parusahan niku si Bil pag diyus-diyusan sa Babilunya. Ipasuka niku sa kanya kay manga hinalun. Balaw yi siya duludun manga nasyun hampay sambahun. Nagpu yi ti manga alad batu sa Babilunya.

⁴⁵ “Manga pinili niku, pagpakarayu yi kamu sa Babilunya! Iribri niyu kanyu sadili buhi bag-u niku ibuhus sa kanda kang pangagalit.

⁴⁶ Dapat danga kamu magkadala ngatay manlubay nu rumas-ug yi ti barita tungkul sa girahan. Dahil ti barita tungkul sa girahan manga hari rumas-ug sa kada timpu.

⁴⁷ Rumas-ug ti udas parusahan niku ti manga diyus-diyusan sa Babilunya. Mangay-a ti buu Babilunya, ag mabugtangan ti tanan bangkay nasakupan niya.

⁴⁸ Ag nu mangyari tida, manhuyaw sa kabayaan ti langit ag ti daga hanggan ti tanan atay dahil sa pagkawayak Babilunya. Dahil girahun inda manga manugwayak ginan sa kanaway. Aku, ti Panginuun, ti magsabi inda.

⁴⁹ “Kailangan wasakun ti Babilunya dahil sa pagmatay niya sa manga Israilita ag sa iba waya manga tawu sa buu kalibutan.”

Ti Itinultul Panginuun sa manga Israilita ati sa Babilunya

⁵⁰ “Kamu pag manga nasawad buhi, pagpalagiw yi kamu ginan sa Babilunya ag danga kamu magpat-ung! Isipun niyu ti Panginuun ag ti Hirusalim una sa arayu kamu pag rugar.

⁵¹ Pagsabihun niyu, ‘Magkay-a kami. Pagpuyaan kami ag pag-ipauli sa makakaray-a dahil ti Balay Diyus Panginuun inuringan manga day-uhan.’

⁵² Dapat rumas-ug ti sirang parusahan niku ti manga diyus-diyusan Babilunya. Ag ti manga arunghung manga nabiyagan taga Babilunya masaydan sa buu nida daga.

⁵³ Una umaput waya sa langit ti manga alad batu Babilunya, ag una papag-unun waya nida inda, mamadara diman aku manugwayak. Aku, ti Panginuun, ti magsabi inda.

⁵⁴ Masaydan ti manga lulumian sa buu Babilunya dahil sa pagkawayak inda.

⁵⁵ Wasakun niku ti Babilunya, bumaliw mapanglaw wadi inda. Girahun siya manga kalaban ga maghagunung humbak. Masaydan ti riringgitan nida sa kanda maggira.

⁵⁶ Rumas-ug ti manga manugwayak sa Babilunya ag bihagun kay manga sundalu, ag mabari kanda manga ugyung. Dahil aku, ti Panginuun, ti Diyus magparusa sa daut. Ag parusahan niku ti Babilunya angay lang sa kanya.

⁵⁷ Languhun niku kay manga pinunu, ti manga matinudukun pag manga tawu, ti manga takinan, ti manga kumandir, hanggan kay manga sundalu. Mahamuukan sida balaw yi mipulaw. Aku, ti Hari, ti magsabi inda. Panginuun Makamaskihan kang ngaran.”

⁵⁸ Magkun waya ti Panginuun Makamaskihan, “Wasakun ti madamul pag alad batu sa Babilunya ag irubun ti arabwat niya pag sabian. Bumaliw unman may pulus ti tanan binudlayan niya manga nasakupan dahil ti tanan tida mairub lang.”

Ti Tultulanun ni Hirimyas para sa Babilunya

⁵⁹ Inda ti sinabi ni Hirimyas sa kan Siraya usa sa pinakaabwat pag pinunu ni Hari Sidikyas. Si Siraya kay anak ni Niryas kay laki ni Masiya. Magkun si Hirimyas inda pag tultulanun katpung nag-ati si Siraya sa Babilunya kaibahan ni Hari Sidikyas. Ikap-at pag timpu ati katpung sa kay maghari ni Sidikyas sa Huda.

⁶⁰ Isinurat ni Hirimyas sa balunbun ti tanan kadamhakan rumas-ug ag mangyari sa Babilunya.

⁶¹ Inda ti sinabi ni Hirimyas sa kan Siraya, “Nu rumas-ug kawu sa Babilunya, basahun nimu kabisug sa manga tawu ti nakasurat sa inda pag kasuratan.

⁶² Rargu pandarangin kawu, ‘Ungud Panginuun magkun duy kawu wasakun nimu inda pag rugar hampay unman may mangulian atay, una tawu ngatay hayup, ag bumaliw mapung-aw hanggan waya aban.’

⁶³ Nu mabasa nimu inda, higutan nimu inda sa batu bag-u iyamut sa Sapa Iyupratis.

⁶⁴ Ag sabihun nimu, ‘Katunda ti mangyari sa Babilunya, mitagbung ag udyi lumutaw waya dahil sa manga kadamhakan ipalakaw Panginuun sa kanya. Magkaramatay kay nasakupan niya.’ ” Inda ti uryan pag itinultul ni Hirimyas.