Hirimyas 50 - Hanunuu

Ti Tultulanun tungkul sa Babilunya

¹ Inda ti pagsabihun Panginuun sa kan Hirimyas tungkul sa Babilunya ag sa nasakupan inda:

² “Ipadakit sa manga nasyun ti barita sa unman may pag-ilihim! Ag paabwatan ti bandira tanda pagkawasak Babilunya! Marunut ag mangay-a ti manga diyus-diyusan niya hanggan kay diyus-diyusan si Bil ag si Marduk.

³ Dahil girahun ti Babilunya usa ka nasyun ginan sa kanaway, ag bumaliw mapung-aw inda pag rugar. Unman yi may mangulian sitay dahil malagiw kay manga nasakupan hanggan ti manga hayup.

⁴ “Aku, ti Panginuun, magsabi sa ati pag udas, ti manga nasakupan sa Israil ag sa Huda manlumi ag pakarani sa kangku, ti Panginuun nida Diyus.

⁵ Mamaingana sida sa dalan atabug sa Hirusalim ag umati sida. Mamuwat sida unman may katapusan pag kasunduan sa kangku, ag unman yi gid nida inda kalimtan.

⁶ “Ti manga nasakupan niku ga manga karanidu nagtalalang. Pinabay-anan sida manga manug-alaga nida ati sa kabantudan ag katagudtudan bag-u udyi nida alam ti dalan sa mag-uli.

⁷ Siniba sida manga nakakit sa kanda. Magkun ti manga kalaban nida, ‘Nagsalan sida sa Panginuun imaw ti tutuu nida paraharyan ag pagsarigan manga kaumputan nida nakan unman kita may kasalanan sa kanta paggira sa kanda.’

⁸ “Pagpalagiw kamu ginan sa Babilunya! Tayaki yi niyu tunda pag nasyun. Pag-una yi kamu pagpalagiw parihu sa manga kambing mag-una man sa manga manada!

⁹ Dahil ipagira niku ti Babilunya sa gurupu manga makapangyarihan pag nasyun ginan sa kanaway baliwa. Girahun nida ti Babilunya ag masakup nida inda. Anad kanda manga manugpana ag unman may paltus kanda magpana.

¹⁰ Pamul-un nida ti manga kasiyunan Babilunya ag pihu gid manalaw sida. Aku, ti Panginuun, ti magsabi inda.

¹¹ “Manga taga Babilunya, bin-ul niyu ti magkaapu manga nasakupan niku. Nakabaya kamu ag masulung ga sa dumaraga baka sa pasturan ngatay kabayu maghiri-hiri.

¹² Dapat ipauli niku sa kakay-ahan kanyu nasyun. Bumaliw pinakaababa inda sa tanan nasyun, ag bumaliw inda usa ka mapung-aw pag pangawakawaan.

¹³ Dahil sa galit niku, udyi may mangulian sa Babilunya ag bumaliw mapung-aw inda. Madiklahan gid ag manhikrab ti tanan lumawuy sitay dahil sa tanan nangyari sa inda pag nasyun.

¹⁴ “Kamu pag manga manugpana, paghatay yi kamu sa kanyu palastar sa sangput Babilunya. Panaun niyu siya dahil nagsalan siya sa Panginuun.

¹⁵ Paghuyaw kamu laban sa kanya sa tanan pag rugar! Bantayi niyu! Nag-ampu yi ti Babilunya! Magkawayak yi kay manga bantayaw ag nagkarapugdak yi ti manga alad batu niya. Ti Panginuun ti nagbalus sa kanya. Nakan balusan niyu siya ag buwatun niyu sa kanya ti binuwat niya sa iba.

¹⁶ Paighita niyu sa Babilunya ti manga magtanum ag mag-ani. Iribri niyu ti manga bihag sa baladaw manga kalaban ag papalagiwan niyu sida ag paulia sa sadili nida daga.

¹⁷ “Ti manga Israilita ga manga karanidu namululagan pagbukadun manga liyun. Kabag-u, siniba hari sa Asirya, rargu ti pinaka-uryan nag-arit-it kanda manga but-ul si Hari Nabukudunusur sa Babilunya.

¹⁸ “Nakan aku, ti Panginuun Makamaskihan, ti Diyus Israil magsabi, ‘Parusahan niku si Hari Nabukudunusur hanggan ti Babilunya parihu sa pagparusa niku sa hari Asirya.

¹⁹ Dapat pabalikun niku ti manga Israilita sa nasyun nida. Bumaliw ga manga karanidu sida magharab sa kabantudan Karmilu ag sa karatagan Basan, hanggan sa kabantudan Ipraim ag Gilyad, bag-u mabsug gid sida.

²⁰ Sa ati pag manga sirang, unman yi may makitan manga kasalanan hanggan paglabag sa manga magkasawad nasakupan sa Israil ag sa Huda dahil patawadun niku sida. Aku, ti Panginuun, ti magsabi inda.’ ”

Ti Parusa Panginuun sa Babilunya

²¹ Magkun waya ti Panginuun, “Giraha niyu ti Mirataim ag ti Pikud. Matyun niyu sida ag rurisun yi lubus bilang handug para sa kangku. Buwata niyu ti tanan pag-isugu niku sa kanyu.

²² Ipadnug niyu ti huruyawan sa labanan hanggan iringayan sa masyadu pagkawasak.

²³ Ti Babilunya ga martilyu nagrunut manga nasyun, dapat taynguna siya yi ti narunut. Nakitan manga nasyun nu kabitay nawayak ti Babilunya!

²⁴ “Ungud, Babilunya, nablay kawu sa dit-ag ipinauli niku para sa kanmu. Nablay kawu dahil naglaban kawu sa kangku.

²⁵ Binukasan niku kang taraguan manga armas ag ipinalwas niku ti manga armas dahil sa kang pangagalit. Dahil aku, ti Panginuun Diyus Makamaskihan may buwatun sa kanmu, Babilunya.

²⁶ “Manga kalaban Babilunya, ati sa arayu pag rugar, giraha yi niyu ti Babilunya! Bukasi niyu ti manga balay haramnuan niya. Tipuna niyu kanyu manga nab-ul parihu sa tirigu. Rurisa yi niyu lubus ti manga taga Babilunya ag danga kamu magsawad una di usa.

²⁷ Matya niyu ti tanan nida manga sundalu parihu sa turiti baka. Matya niyu sida tanan. Kaawaawa sida dahil rinmas-ug yi ti udas kailangan sida parusahan.

²⁸ “Patingihi niyu ti manga tawu nakapalagiw ginan sa Babilunya habang pag-itultul nida sa Hirusalim nu kabitay nagbalus ti Panginuun nita Diyus dahil sa binuwat manga taga Babilunya sa Balay Diyus nita.

²⁹ “Tawaga niyu ti manga manugpana hampay man-gira sa Babilunya! Sangputan niyu hampay unman may makapalagiw. Balusi niyu siya sa kay binuwat; buwata niyu sa kanya ti binuwat niya sa iba dahil linabanan niya ti Panginuun, ti Banal pag Diyus sa Israil.

³⁰ Sa ati pag manga sirang, magkaramatay sa manga baklayan ti manga kalay-awan lalaki hanggan ti tanan niya manga sundalu.

³¹ “Aku, ti Panginuun Makamaskihan, magsabi kalaban niku kawu, Babilunya marapadayaw! Rinmas-ug yi ti sirang parusahan niku kawu.

³² Kawu ti palabi-labi mawasak gid ag unman may mangawat sa kanmu hampay bangunun kawu. Irubun niku ti manga banwa nimu hanggan ti tanan banwa sa sangput nimu.”

³³ Magkun waya ti Panginuun Makamaskihan, “Pag-apihun ti manga nasakupan sa Israil ag sa Huda. Binihag sida ag tinanudan mayad hampay unman sida makauli sa banwa nida.

³⁴ Dapat aku kanda Manuglukat, Panginuun Makamaskihan kang ngaran. Apinan niku sida ag pakan-an kahusayan, dapat guluhun niku ti manga nasakupan sa Babilunya.

³⁵ “Aku, ti Panginuun, magsabi ti baladaw kadamhakan mitama sa manga taga Babilunya hanggan sa manga takinan ag madunung pag tawu niya!

³⁶ Mitama diman inda sa kay manga pudilun pag purupita niya ag bumaliw manga kurang-kurang sida! Mitama diman inda sa manga sundalu niya ag madala sida!

³⁷ Mitama inda sa kay manga kabayu, manga kalisa, ag sa tanan magkampi sa kanya. Bag-u lumumuy sida ga babayi! Mitama diman inda sa manga kayamanan niya ag pamul-un inda tanan.

³⁸ Mak-at ti tanan pagbul-an niya danum! Dahil ti Babilunya rugar napnu pagkayamu pag diyus-diyusan, manga diyus-diyusan magpatalang sa manga tawu.

³⁹ “Ti Babilunya ulianan wadi manga hayup sa talun, maisug ag maila pag manga idu hanggan manga bukaw. Ag balaw yi ulianan tawu ti Babilunya hanggan waya aban.

⁴⁰ Nu kabitay winayak Diyus ti Suduma ag Gumura, hanggan ti manga banwa sa kalibut inda, katida diman ti mangyari sa Babilunya. Unman yi may mangulian ati. Aku, ti Panginuun, ti magsabi inda.

⁴¹ “Bantayi niyu! May manga sundalu magras-ug ginan sa kanaway. Usa ka makapangyarihan pag nasyun ginan sa arayu pag rugar ti lumaban sa Babilunya.

⁴² Kanda dara armas manga ugyung ag manga bangkaw. Mahigpit sida ag unman may pangaawa. Kanda ingay ga marabaskug pag humbak habang masakyan sida sa kanda manga kabayu. Rumas-ug sida nakaalistu hampay girahun kamu pag manga taga Babilunya.

⁴³ Nabaritaan inda hari Babilunya ag nanlulubay siya. Nakadamdam siya dala ag sakit parihu sa babayi magkaanak yi.

⁴⁴ “Kadaka niku girahun ti Babilunya parihu sa liyun ginan sa katalunan arani sa Sapa Hurdan, manggira atabug sa pasturan mayamu karanidu. Manlinayas sida, ag mamili aku tawu mandumara sa Babilunya. Si unu ti maiparihu sa kangku? Si unu ti pumanghas kalabanun aku? Si unu pag takinan ti lumaban sa kangku?

⁴⁵ Nakan patingihi nimu kang gayak buwatun laban sa Babilunya. Una kanda manga anak bihagun ag gub-un kanda manga balay.

⁴⁶ Sa pagkaplid Babilunya, matandug ti daga ag masaydan sa iba nasyun kanda lulumian.”