Hirimyas 5 - Hanunuu

Ti manga Kasalanan Hirusalim

¹ Magkun ti Panginuun, “Manga taga Hirusalim, pag-atag kamu sa kanyu manga baklayan! Bantayi niyu kanyu manga buruybuyahan! Nu may mag-akitan kamu matadlung hanggan matinupadun, balaw niku wayakun ti banwa.

² Una paggamitun niyu kang ngaran sa kanyu magtaratu, magpudil diman kamu.”

³ Bag-u magkun aku, “Panginuun, magligaw duy kawu tawu matinupadun. Pinakurian nimu duy kanmu manga nasakupan dapat balaw mahalaga inda sa kanda. Pinarusahan nimu sida dapat dayu sida magpatudlu. Pinaganit nida kanda manga tagipusuun, dayu sida mag-ampu.

⁴ “Kang hantup duy, manga pugri sida ag manga unman may inadalan, dapat manga busal maaw sida. Dahil unman nida alam ti palakaw pag ipabuwat sa kanda Panginuun nida Diyus.

⁵ Nakan atagun niku duy ti manga takinan nida bag-u hampangun sida. Pihu maintindihan nida ti palakaw pag ipabuwat Panginuun nida Diyus.” Dapat nagbugya diman duy sida magsunud sa manga pag-ipabuwat Diyus.

⁶ Nakan girahun sida nida manga kalaban ga liyun ginan sa kapuruan, ngatay parihu sa usa ka maisug pag talun idu ginan sa pangawakawaan, aw ngatay ga liyupardu manugbantay arani sa banwa hampay gutay-gutayun una si unu ti lumuwang. Mangyari gid inda sa kanda dahil naglaban sida sa Diyus ag mayamu pag bisis sida nagpatlikud sa kanya.

⁷ Magkun sa kanda ti Panginuun, “Hayga patawadun niku kamu? Una kanyu manga anak nagbugya sa kangku ag nagsumpa sa ngaran balaw tutuu pag diyus. Ipinakaun niku ti manga pangailangan nida, dapat nabwat waya nida ti panguragin hanggan ti pagdurutdutan sa balay manga babayi baraydan.

⁸ Bilang sida ga manga lalaki kabayu pag-alagaun mayad. Ti kada usa sa kanda masyadu gid kay magkaibug sa asawa iba.

⁹ Aku, ti Panginuun magsabi: Unman aw dapat niku sida parusahan dahil siyun? Unman aw dapat niku balusan ti manga katunda pag nasyun?

¹⁰ “Kamu pag manga kalaban taga Israil, dauta niyu ti manga ubasan nida, dapat danga waydi pag dauta lubus. Tabasa niyu kay manga sanga, dahil inda pag manga tawu balaw yi kangku.

¹¹ Ti nasakupan Israil hanggan Huda balaw yi gid matinupadun sa kangku. Aku, ti Panginuun, ti magsabi inda.

¹² Unman sida magbagaw tutuu tungkul sa kangku. Magkun sida, ‘Balaw kita pakurianan Panginuun! Unman may madala rumas-ug sa kanta. Unman diman may gira ngatay lun-us rumas-ug.’

¹³ Unman may pulus ti manga purupita ag balaw ginan sa kangku ti manga pag-ipaburayhaw nida. Mangyari mana sa kanda ti kadamhakan kanda ipinasandam.”

¹⁴ Nakan inda ti pagsabihun sa kangku Panginuun Diyus Makamaskihan: “Dahil katida ti sinabi tunda pag manga tawu, pakan-an niku kawu padakit parihu sa apuy umirub sa kanda ag bumaliw sida ga kayu magkasunug.”

¹⁵ Magkun ti Panginuun, “Manga nasakupan Israil, mamadara aku manga tawu ginan sa arayu pag nasyun hampay girahun kamu. Inda usa sa pinaka un-an pag nasyun kay pamagaw unman niyu magkasalman.

¹⁶ Maraisug kanda manga sundalu, makamatay kanda manga armas pan-gira.

¹⁷ Tabuhun nida kanyu manga ani, manga karan-unun, hanggan manga ubas ag manga igus. Matyun nida kanyu manga hayup hanggan kanyu manga anak. Dautun nida ti manga may alad batu pag banwa, imaw mana kanyu pagsarigan.

¹⁸ Dapat ati katpung pag sirang, balaw niku kamu rurisun lubus.

¹⁹ Nu may magpaingana, ‘Hayga binwat Panginuun nita Diyus inda tanan sa kanta?’ Sabihun nimu sa kanda, ‘Dahil dinayu niyu ti Panginuun ag nagsirbi kamu sa iba pag diyus sa kanyu sadili daga. Nakan taynguna, sumirbi kamu sa manga day-uhan sa daga bukun kanyu.’

²⁰ “Sabiha inda sa nasakupan Israil hanggan Huda:

²¹ Patingihi niyu inda, kamu pag manga luku-luku ag supakil. May manga mata kamu, dapat unman makakit, may manga tuli dapat unman makadnug.

²² Aku, ti Panginuun magsabi: Unman aw kamu may dala sa kangku? Hayga unman kamu pagtakigan sa atubangan niku? Aku ti nagbuwat baras sa baybay dagat hampay bumaliw katugkaan dagat. Inda kay katugkaan balaw malapawan. Paghampakun manga humbak dapat unman nida masagpawan.

²³ Dapat maganit kay ulu ag maralaban inda pag manga tawu. Kinalimtan ag pinatlikudan nida aku.

²⁴ Unman sida magbagaw ginan sa tagipusuun kuntay, ‘Dayawun nita ti Panginuun nita Diyus, ti mag-ayaw uran sa kanta sa pangudasun ag mag-ayaw patubas sa kanta sa udas tig-arani.’

²⁵ Kanyu kadautan ti nagpakarayu tida pag manga bagay sa kanyu. Kanyu manga kasalanan ti mag-ampara sa pagtanggap niyu inda pag manga papalad.

²⁶ “May manga daut pag tawu kaibahan sa manga nasakupan niku mag-alagad kanda siribaun. Sida ga manga tawu magdit-ag manga manuk. Magpauli sida manga suduk para sa iba pag manga tawu.

²⁷ Parihu sa puguan punu manga manuk, ti balay daut pag tawu punu manga kayamanan ginan sa pandaraya. Nakan yinmaman sida ag nagbaliw makapangyarihan.

²⁸ Tinmabul sida ag binmisug kanda manga bilug. Subra kanda magbuwat kadautan. Unman nida pagpakan-an katadlungan ti manga ulila ag balaw nida pag-ilaban ti karampatan manga pugri.

²⁹ Aku, ti Panginuun magsabi: Unman aw dapat niku sida parusahan dahil sitay? Unman aw dapat niku balusan ti manga kainda pag nasyun?

³⁰ Makadarala ag makahirikrab ti manga bagay nangyari sa inda pag daga.

³¹ Ti manga purupita magpaburayhaw kapudilan. Ti manga manughandug magdumara angay sa sadili nida kapangyarihan. Katida ti pagkaibgan manga nasakupan niku. Dapat unu ti buwatun nida nu rumas-ug yi ti katapusan?”