Hirimyas 49 - Hanunuu

Ti Tultulanun tungkul sa Amun

¹ Inda waydi ti sinabi Panginuun tungkul sa manga taga Amun: “Kamu pag manga magsamba sa diyus-diyusan si Muluk, hayga niyu pag-ulian ti manga banwa sa daga ni Gad? Unman aw may linahi si Israil manugmana sa inda pag daga?

² Aku, ti Panginuun magsabi, rumas-ug ti sirang ipagira niku sa manga kalaban ti Raba. Wasakun inda kanyu banwa hanggan ti manga baryu sa kalibut irubun. Sa kainda pag paraan, matabug manga taga Israil ti manga nagtabug sa kanda.

³ “Paglumi kamu kabisug, kamu pag manga taga Hisbun dahil wayak yi ti Hay. Paglumi diman kamu pag manga taga Raba. Pagrutay kamu rutay saku ag pagpabalik-balik sa saruy alad batu hampay ipakakit kanyu maghimanglaw. Dahil bihagun kanyu diyus-diyusan si Muluk hanggan ti manga manughandug ag takinan niya.

⁴ Kamu pag manga taraidur, hayga niyu pag ipadayaw kanyu abunda pag manga karatagan. Magtiwala kamu sa kanyu kayamanan ag pagkumnun niyu unman may man-gira sa kanyu.

⁵ Aku, ti Panginuun Diyus Makamaskihan, mamadara sa kanyu manga kalaban ginan sa manga nasyun sa kalibut niyu hampay padalaun kamu. Tabugun nida kamu sa kanyu daga ag unman may una si unu ti mangawat sa kanyu.

⁶ Dapat rumas-ug ti sirang kuntay ibalik niku sa mayad pag kahamtangan ti manga taga Amun. Aku, ti Panginuun, ti magsabi inda.”

Ti Tultulanun tungkul sa Idum

⁷ Inda ti sinabi Panginuun Makamaskihan tungkul sa Idum: “Naan yi ti manga maradunung sa Timan? Udyi aw may nasawad madunung magpaanyu?

⁸ Kamu pag manga mag-uli sa Didan pagpalagiw kamu ag pagpatagu sa arabasad pag lukib. Dahil padaran-an niku kadamhakan ti manga linahi ni Isaw sa udas parusahan niku sida.

⁹ Unman aw ti manga tagaputi ubas magtayak manga burak? Unman aw ti manga mananakaw magbuul lang diman una hintay kanda pagkaibgan?

¹⁰ Dapat bul-un ti tanan kasiyunan manga sinulput ni Isaw. Bul-un niku ti taklub pagpatag-an nida hampay balaw yi sida makapatagu. Magkaramatay ti manga anak, katawuhan ag manga kamalay nida. Unman may masawad sa kanda.

¹¹ Dapat matayak sa kangku ti manga ilu niyu dahil aku ti mangalaga sa kanda. Ag ti manga naburanday niyu makasarig gid sa kangku.”

¹² Magkun waya ti Panginuun, “Nu ti manga unman may kasalanan nag-agwanta, kamu waya aw? Pihu yi parusahan kamu.

¹³ Pag-isaad niku sa kang sadili, kuntay ti Busra mawayak. Bumaliw madala kay kahamtangan inda, puyaan ag saadan inda. Ti tanan banwa inda bumaliw wayak hanggan waya aban. Aku, ti Panginuun, ti magsabi inda.”

¹⁴ Nadnugan niku ti barita ginan sa Panginuun kuntay nagpadara siya sinugu sa manga nasyun hampay paalistuhun sida sa girahan ag garyahun sida girahun ti nasyun Idum.

¹⁵ Dahil magkun ti Panginuun sa manga taga Idum, “Buwatun niku kamu mas ababa kaysa iba pag manga nasyun, ag puyaan nida kamu.

¹⁶ Ipagpadayaw niyu kuntay mag-uli kamu sa mabatu ag sa arabwat pag rugar. Dapat sa pagpalabaw ag pagpadala niyu tunda sa iba, pagdayaun niyu kanyu sadili. Dahil una mag-uli kamu sa pinakaabwat pag rugar parihu sa pagpugadan agila, ipaababa waya diman niku kamu. Aku, ti Panginuun, ti magsabi inda.”

¹⁷ Magkun waya ti Panginuun, “Bumaliw makadarala ti kahamtangan Idum. Ti tanan maglawuy manhikrab ag harus unman makapasnu sa nangyari sa inda pag nasyun.

¹⁸ Nu kabitay nawayak ti Suduma ag Gumura hanggan ti manga banwa sa kalibut inda, katida diman ti mangyari sa Idum. Ag udyi may mangulian atay. Aku, ti Panginuun, ti magsabi inda.

¹⁹ Kadaka niku girahun ti Idum ga liyun ginan sa katalunan Sapa Hurdan atag sa pasturan may mayamu karanidu. Manpalalagiwan sida, ag pamahalaun niku sa Idum ti tawu pinili niku. Si unu ti maiparihu sa kangku? Si unu ti pumanghas kuntay kalabanun sa aku? Si unu pag takinan ti manlaban sa kangku?

²⁰ Nakan patingihi niyu kang pag gayakun buwatun laban sa Idum hanggan sa manga nasakupan Timan: Bihagun niku kanda manga anak ag gubaun kanda manga ulian.

²¹ Dahil sa masyadu pag kawayak sa Idum, matandug ti daga ag ti lulumian manga taga ati masaydan tugka sa Dagat Marara.

²² Bantayi niyu! Ti kalaban ga sa agila maglayang mandagit sa manga taga Busra. Sa ati pag udas, dalaun ag bumaliw ga babayi arani yi manganak ti manga sundalu sa Idum.”

Ti Tultulanun tungkul sa Damasku

²³ Inda ti itinultul tungkul sa Damasku: “Nadala ti manga taga Hamat hanggan ti taga Arpad sa daut pag barita kanda nadnugan. Naaburidu ag nanlubay sida, bag-u unman yi makaagwanta parihu sa mahumbak pag dagat.

²⁴ Naglumuy ti manga taga Damasku ag linmayas sida dahil sa dala. Dala ag kabuyatan tagipusuun ti nadamdaman nida ga bilang babayi arani yi manganak.

²⁵ Ti bantug ag masulung pag banwa Damasku dinayu!

²⁶ Ti manga kalay-awan niya lalaki mamatay sa manga baklayan hanggan ti tanan niya sundalu.

²⁷ Irubun niku ti manga alad batu sa Damasku, hanggan ti marig-un pag ulian ni Hari Bin Hadad. Aku, ti Panginuun, ti magsabi inda.”

Ti Tultulanun tungkul sa Kidar ag Hasur

²⁸ Inda ti sinabi Panginuun tungkul sa Kidar hanggan sa manga kaharian sa Hasur kay ginira ni Hari Nabukudunusur sa Babilunya: “Pag-alistu kamu ag giraha niyu ti Kidar. Rurisa niyu inda pag manga tawu sa butlakan.

²⁹ Pamul-un niyu kanda manga turda, manga manada, manga kasiyunan, ag manga kamilyu. Manhuyaw sida, ‘Pinalibutan yi kita manga madala nita pag kalaban.’

³⁰ “Manga taga Hasur, pagdali-dali kamu ag pagpalagiw! Aku, ti Panginuun, ti magsabi pagpatagu yi kamu sa manga lukib. Naggayak daut laban sa kanyu si Hari Nabukudunusur sa Babilunya.

³¹ Aku, ti Panginuun, ti nagsugu sa kanda kuntay, ‘Giraha niyu ti usa ka nasyun magkabuhi may kahusayan ag abunda. Unman may agad kanda manga puwirtahan banwa ag magkabuhi sida-sida lang.

³² Kanda manga kamilyu ag ti tanan nida manada bumaliw kanyu. Wayakun niku tunda pag manga tawu mag-uli sa arayu pag rugar ag paras-ugun niku sa kanda ti kadamhakan ginan sa una naan-naan. Aku, ti Panginuun, ti magsabi inda.

³³ Bumaliw maruku ti Hasur hanggan waya aban ag unman may tawu mangulian siyun. Bagkus ngap bumaliw ulian yi lang manga talun idu.’ ”

Ti Tultulanun tungkul sa Ilam

³⁴ Inda ti sinabi Panginuun sa kan Hirimyas tungkul sa Ilam katpung umpisa maghari si Sidikyas sa Huda.

³⁵ Magkun ti Panginuun Makamaskihan, “Matyun niku ti manga manugpana sa Ilam — ti pinakamapantuk nida pag manga sundalu.

³⁶ Girahun ti Ilam manga kalaban ginan sa tanan bahagi, ag wayakun niku kay manga nasakupan sa tanan rugar. Ag bihagun sida sa tanan nasyun sa buu kalibutan.

³⁷ Rurisun niku sida sa panab-anan manga kalaban nida magkaibug mumatay sa kanda. Ungud paras-ugun niku sa kanda ti kadamhakan dahil sa masyadu niku pag galit sa kanda. Aku, ti Panginuun, magsabi ipagira niku sida sa kanda manga kalaban tugka sa madura sida tanan.

³⁸ Matyun niku ti hari hanggan ti manga takinan Ilam, bag-u ipatindug niku ati kang tukawan hari.

³⁹ Dapat rumas-ug ti sirang kuntay pabalikun niku ti Ilam sa mayad pag kahamtangan. Aku, ti Panginuun, ti magsabi inda.”