Hirimyas 48 - Hanunuu

Ti Tultulanun tungkul sa Muab

¹ Inda ti sinabi Panginuun Makamaskihan, ti Diyus Israil, tungkul sa Muab: “Kaawaawa ti Nibu dahil wayakun inda. Mangay-a ag bihagun ti Kiryataim bag-u mapugdak ti manga marig-un pag palalan-iban inda.

² Balaw yi dayawun ti Muab; ti manga kalaban sa Hisbun maggayak wasakun ti Muab. Ag kawu waydi banwa Madmin girahun manga kalaban ag bumaliw mapung-aw.

³ Patingihi niyu ti riringgitan sa Hurunaim, dahil sa masyadu pag girahan ag kadamhakan.

⁴ Mawayak gid ti Muab ag manlulumian ti manga anak.

⁵ Ti manga nasakupan Muab manlulumian mabisug habang patukad sa Luhit ag palus-ug sa Hunuraim. Manlulumian sida dahil sa kadamhakan.

⁶ “Iribri niyu kanyu sadili! Pagpalagiw kamu atabug sa pangawakawaan ga maila pag asnu.

⁷ Manga taga Muab, magtiwala kamu sa kakayahan ag kayamanan niyu nakan bihagun kamu hanggan kanyu diyus-diyusan si Kimus bag-u ti manga manughandug hanggan manga takinan inda.

⁸ “Rumas-ug ti manugruris sa kada banwa ag unman may banwa makaribri. Magkarawayak ti manga banwa sa karatagan hanggan sa ratag sa babaw bantud. Mangyari gid inda dahil sinabi ngapu Panginuun.

⁹ May pakpak mana ti Muab hampay makalayang siya tag sa un-an, dahil udyi may pulus inda kay manga banwa ag udyi may mangulian sitay.

¹⁰ Saadan ti tawu magpabaya sa pagbuwat sa buruwatun Panginuun laban sa Muab. Saadan ti tawu balaw manmatay sa manga taga Muab.

¹¹ Mahusay ti pangabuhi taga Muab ginan waya kaybi. Unman waya inda nakalakaw sa pagkabihag. Ga intus inda unman waya nagaraw ngatay nisalin sa usa ka sukadan. Nakan kay lasa ag hungaw inda balaw magkauman.

¹² “Dapat rumas-ug ti sirang kuntay suguun niku ti manga kalaban hampay ibuhus ti Muab ginan sa kay sukadan bag-u rargu basagun inda kay nagsukadan.

¹³ Ag ikay-a manga taga Muab ti diyus-diyusan nida si Kimus, parihu sa nangyari sa Bitil pagka ikinay-a manga taga Israil kanda diyus-diyusan.

¹⁴ Ipagpadayaw manga taga Muab kuntay maraisug ti sundalu nida sa paglaban.

¹⁵ Dapat mawayak gid ti Muab hanggan kay manga banwa inda. Matyun kanda maraisug pag kalay-awan. Aku, ti Panginuun Hari Makamaskihan, ti magsabi inda.

¹⁶ “Arani yi ti kadamhakan Muab.

¹⁷ Paglumi kamu, kamu tanan pag kakampi Muab! Sabihun niyu, ‘Udyi ti Muab! Nabari yi kay sugkud, ti sugkud tanda sa pagkamakapangyarihan ag kabantugan niya.’

¹⁸ “Kamu pag manga taga Dibun, pagpakumbaba kamu ag pagtukaw sa daga dahil ti nagwayak sa Muab man-gira diman sa kanyu ag gubaun nida kanyu manga banwa magkasangput manga alad batu.

¹⁹ Kamu pag manga asan sa Aruwir, pagtindug kamu sa saruy dalan ag pagbantay. Pagpaingana kamu sa manga nakapalagiw nu hintay ti nangyari.

²⁰ Sumagut sida, ‘Nawayak ag nangay-a ti Muab. Panhuyaw kamu ag paglumi. Ihuyaw niyu sa Arnun kuntay nawayak ti Muab.’

²¹ “Parusahan diman ti manga banwa sa babaw bantud: ti Hulun, Yahas, Mipaat,

²² Dibun, Nibu, Bit Diblataim,

²³ Kiryataim, Bit Gamul, Bit Miyun,

²⁴ Kiryut ag Busra. Rumas-ug yi ti parusa sa tanan banwa sa Muab, sa arayu ag sa arani.

²⁵ Unman yi may kapangyarihan ti Muab ag malumuy yi inda taynguna. Aku, ti Panginuun, ti magsabi inda.

²⁶ “Languhun niyu ti Muab dahil naglaban siya sa kangku. Milubi siya sa kay sadili suka ag bumaliw karasarin-an.

²⁷ Kamu pag manga taga Muab, unman aw pinuyaan niyu ti Israil? Hayga, nadakpan aw lugud siya nanakaw? Hayga mag-il-ilung waya kamu sa kanyu magpuya sa kanya?

²⁸ Pag ighit yi kamu sa kanyu banwa ag pangulian sa yangpas, ga sa manga kalampati magpugad sa manga gil-ang tunu ag mabatu pag rugar.

²⁹ Palabi-labihun niyu. Nadnugan niku nu kabitay kamu magpalabi-labi ag marapadayaw.

³⁰ Aku, ti Panginuun, magkaalaman niku nu kabitay kamu magpalabi-labi, dapat tunda unman may pakinabang.

³¹ Nakan manlumi aku para sa manga taga Muab ag taga Kir Harisit.

³² Manlumi diman aku para sa manga taga Sibna subra waya sa nanlumi niku sa manga taga Hasir. Sibma, ga kawu sa halaman ubas kay manga sanga nag-aput sa baliw dipay Dagat Namatay tugka sa Hasir. Dapat taynguna, tinabu manga manugdaut kanmu burak.

³³ Unman yi may masaydan kasulungan ag kabayaan sa manga tanman hanggan ag sa manga ubasan sa daga Muab. Unman yi magbulus ti pin-gis ubas sa manga pirigsan. Udyi may manga manugpigis ubas maghuyaw sa baya. May manga maghuyaw ngani, dapat ay bukun yi huyaw sa baya.

³⁴ Ti lulumian manga taga Hisbun mag-adnugan di tugka sa Ilali ag Yahas. Ti lulumian manga taga Suar mag-adnugan di tugka sa Hurunaim ag sa Iglat Silisya. Dahil una ti tubkan Nimrim nak-at yi.

³⁵ Pap-utun niku sa Muab ti manga maghandug sa manga simbahan sa abwat pag rugar ag magtuub kamangyan sa kanda manga diyus-diyusan. Aku, ti Panginuun, ti magsabi inda.

³⁶ “Nakan maglumi kang tagipusuun para sa Muab ag sa manga taga Kir Harisit, parihu sa maruku pag tunug palawta para sa namatay. Udyi ti manga kayamanan natanggap nida.

³⁷ Ti kada usa nagpaburayhaw kanda karukuan sa panab-anan pagpakidkid, pag-uguy bungut, pagbiyag sa kanda manga kamang ag pagsulung manga rutay panhimanglaw.

³⁸ Maglulumian ti manga tawu sa kanda manga balay hanggan sa manga buruybuyahan, dahil winayak niku ti Muab ga tapayan binasag ag unman yi may maglabut.

³⁹ Katida yi lang ti pagkawayak Muab! Patingihi niyu ti lulumian manga nasakupan. Makakaray-a gid ti Muab. Pagpuyaan ag pagkadat-an inda manga nasyun sa kalibut niya.”

⁴⁰ Magkun waya ti Panginuun, “Bantayi niyu! Ti kalaban Muab ga agila maglayang hampay dagitun inda.

⁴¹ Sakupun ti manga banwa hanggan ti manga kampu sa Muab. Sa ati pag manga sirang, madala ti manga sundalu sa Muab parihu sa usa ka babayi arani yi manganak.

⁴² Mawayak gid ti Muab dahil sa paglaban niya sa Panginuun.

⁴³ Ti ras-ugan manga taga Muab ay dala, kali ag dit-ag.

⁴⁴ “Una si unu ti malagiw dahil sa dala malagpak sa kali. Ag una si unu ti makaribri sakali mablay sa dit-ag makasulun sa padaya, dahil parusahan gid ungud niku ti Muab sa nakatagka pag udas. Aku, ti Panginuun, ti magsabi inda.

⁴⁵ Ti manga kaawaawa nakapalagiw magkaibug patagu sa Hisbun. Dapat ti Hisbun kay pagharian ni Hari Sihun maglabdaban sa apuy ag nairub hanggan ti manga kabantudan pagpatag-an manga taga Muab kay gustu girahan.

⁴⁶ Hala! Tapus yi kamu, kamu pag manga taga Muab! Kamu pag manga magsamba sa diyus-diyusan ni Kimus bihagun kanyu manga anak.

⁴⁷ Dapat rumas-ug ti sirang kuntay ibalik niku ti mayad pag kahamtangan Muab. Aku, ti Panginuun, ti magsabi inda.” Inda ti itinultul tungkul sa Muab.