Hirimyas 47 - Hanunuu

Ti Tultulanun tungkul sa Pilistiya

¹ Inda ti binagaw Panginuun sa kan Hirimyas tungkul sa Pilistiya katpung balaw waya ginira hari Ihiptu ti Gasa:

² “May nasyun man-gira ginan sa kanaway ga baha lumapwas sa buu daga. Wasakun inda pag nasyun ti tanan banwa hanggan kay manga nasakupan nida. Manhuruyawan ag manlulumian mabaskug ti manga tawu dahil sa dala.

³ Madnugan nida ti iringayan talagalpakan hanggan manga daguldul manga kabayu ag manga kalisa. Balaw yi mangaliwliw kay manga ama hampay awatan kanda manga anak dahil sa dala.

⁴ Dahil rumas-ug ti sirang wasakun ti tanan Pilistiyu hanggan kanda manga kakampi mag-awat sa kanda ginan sa Tiru ag Sidun. Wasakun Panginuun ti manga Pilistiyu. Inda pag manga tawu ginan sa Kaptur.

⁵ Ti manga taga Gasa mamakidkid, puruyba sa paghimanglaw nida, ag ti manga taga Askalun unman mag-ingay sa karukuan. Kamu pag manga nasakupan sa karatagan, tugka kapira niyu biyagan kanyu sadili hampay ipakakit kanyu karukuan?

⁶ Magpaingana kamu nu kapira niku pag-apasan ti pagparusa sa kanyu sa panab-anan niku manga baladaw. Pagsabihun niyu ulian yi niku sa palaulian kangbaladaw ag pabay-ani yi lang kamu.

⁷ Dapat kabitay inda maampara dahil sinugu yi niku inda kuntay giraha ti Askalun ag ti manga mag-uli sa saruy dagat?”