Hirimyas 46 - Hanunuu

Ti Ipinadakit sa manga Nasyun

¹ Inda ti sinabi Panginuun sa kan Hirimyas tungkul sa manga nasyun:

² Inda ti ipinadakit laban sa manga sundalu ni Hari Niku hari sa Ihiptu: Tinalu sida ni Hari Nabukudunusur sa Babilunya ati sa Karkimis arani sa Sapa Iyupratis, kaybi sa ikap-at pag timpu sa kay maghari ni Hihuyakim kay anak ni Hari Husyas sa Huda:

³ “Ialistu niyu kanyu manga panangga bag-u pag-atag sa girahan!

⁴ Ialistu diman niyu kanyu manga kabayu pan-gira. Isulung kanyu hilmit, asaun kanyu manga bangkaw, ag isabak kanyu manga armas.

⁵ Dapat hintay inda ti nakitan niku? Magkadala kamu ag mag-usun. Natalu kamu ag maliksi nalagiw udyi lang mag-aliwliw dahil sa dala.

⁶ Mabisug kamu ag maliksi magpalagiw dapat unman diman gid kamu makalayas. Magpu kamu ag mamatay arani sa Sapa Iyupratis.

⁷ “Hintay inda pag nasyun nagbaliw makamaskihan, parihu sa Sapa Nilu maglapwas tugka sa pangpang?

⁸ Inda ti nasyun Ihiptu, nagbaliw makamaskihan parihu sa Sapa Nilu mag-abwat ti danum ag maglapwas tugka sa pangpang. Magkun ti Ihiptu, ‘Nagbaliw makamaskihan aku parihu sa baha maglapwas sa buu kalibutan. Wasakun niku ti manga banwa hanggan kay manga nasakupan inda.’

⁹ “Sigi, manga taga Ihiptu, papalagiwun yi niyu ti manga kabayu ag kalisa niyu! Paggira yi kamu hanggan ti tanan manga kakampi niyu ginan sa Itiyupya, Put, ag Lidya anad sa maggamit manga panangga ag ugyung.

¹⁰ Dapat manalu ti Panginuun Diyus Makamaskihan sa inda pag girahan. Bumalus siya sa manga kalaban niya sa inda pag sirang. Ti baladaw niya ga lun-us pag hayup humalun sa kanda ag uminum sa dugu nida tugka sa mabsug. Ti manga bangkay nida ga manga handug sa Panginuun Diyus Makamaskihan ati sa daga sa kanaway arani sa Sapa Iyupratis.

¹¹ “Manga taga Ihiptu, una umatag waya kamu sa Gilyad hampay manligaw bulung, ti tanan bulung udyi may bisa ag udyi gid makapaayad sa kanyu.

¹² Mabaritaan manga nasyun sa buu kalibutan ti kakay-ahan ag lulumian niyu. Magpu kanyu manga sundalu nanungbaw-tungbaw.”

¹³ Inda ti sinabi Panginuun sa kan Purupita Hirimyas tungkul sa paggira ni Hari Nabukudunusur sa Babilunya sa Ihiptu:

¹⁴ “Hirimyas ipadakit inda sa Ihiptu, sa Migdul, sa Mimpis ag Tapanis: Pag-alistu yi kamu dahil nakaalistu yi ti baladaw hampay rurisun kamu.

¹⁵ Hayga nalagiw ti maraisug niyu pag manga sundalu? Nalagiw sida dahil tinabug sida Panginuun.

¹⁶ Nanungbaw-tungbaw magpu kanyu manga sundalu. Sabihun nida, ‘Bumangun kita bag-u muli sa daga linusadan nita, sa manga kasimanwa nita, hampay makaaman kita sa baladaw manga kalaban nita.’

¹⁷ Sabihun diman nida, ‘Ti hari Ihiptu mayad lang sa bagaw, dapat pag-uyangun niya ti manga udas.’

¹⁸ “Aku, ti buhi pag Hari, ti Panginuun Makamaskihan, pag-isumpa niku may imaw gumira sa Ihiptu subra man sa kanya, parihu sa Bantud Tabur sa karaw-an manga kabantudan ngatay sa Bantud Karmilu sa saruy dagat.

¹⁹ Kamu pag manga nasakupan Ihiptu, ialistu yi niyu kanyu manga dara-darahan dahil bihagun kamu. Mawayak ti Mimpis, bumaliw mapung-aw inda ag unman yi may mangulian sitay.

²⁰ Ti Ihiptu ga dumaraga baka, dapat may sarut ginan sa kanaway gumira sa kanya.

²¹ Hanggan ti manga inupahan niya pag sundalu umusun ag nalagiw. Sida ga manga ibun baka pinatabul hampay iyawun. Mangyari inda dahil udas yi hampay parusahan ag wasakun ti manga taga Ihiptu.

²² Malagiw ti manga taga Ihiptu ga ulay maliksi magpalagiw habang maggira ti manga kalaban. Gumira ti manga kalaban may dara manga wasay parihu sa tawu magpamukan puun kayu.

²³ Matyun nida ti manga taga Ihiptu ga magpukan lang maraybung pag manga puun kayu. Ti manga kalaban inda mas mayamu kaysa apan balaw mabilang.

²⁴ Mangay-a gid ti manga taga Ihiptu. Ipakaun sida sa manga taga kanaway.”

²⁵ Parargu waya pagsabihun Panginuun Makamaskihan, ti Diyus Israil, “Parusahan yi niku si Amun, ti diyus-diyusan sa Tibis, ag ti iba waya pag manga diyus-diyusan sa Ihiptu. Parusahan diman niku ti hari sa Ihiptu hanggan kay manga takinan, ag ti manga magtiwala sa kanya.

²⁶ Ipakaun niku sida sa kamang manga gustu mumatay sa kanda — sa kan Hari Nabukudunusur sa Babilunya ag sa kay manga takinan inda. Dapat rumas-ug diman ti sirang kuntay ti Ihiptu ulianan manga tawu parihu kaybi sa un-an. Aku, ti Panginuun, ti magsabi inda.

²⁷ “Dapat kamu pag manga taga Israil linahi niku manugsirbi ni Hakub, danga kamu magpanlubay ngatay magkadala. Dahil iribri di niku kamu ginan sa arayu pag rugar nu naan kamu pag binihag. Utru kamu mangabuhi may kahusayan ag unman may rumas-ug kadautan sa kanyu, balaw diman may una si unu ti pumadala sa kanyu.

²⁸ Nakan danga kamu magkadala, kamu pag manga linahi manugsirbi niku si Hakub, dahil kaibahan niyu aku. Wasakun yi niku lubus ti manga nasyun pinanwayakan niku sa kanyu, dapat ay balaw niku kamu tabuhun wasakun lubus. Parusahan niku kamu angay lang dapat sa kanyu. Balaw mahimu nu unman niku kamu parusahan. Aku, ti Panginuun, ti magsabi inda.”