Hirimyas 44 - Hanunuu

Ti Itinultul Panginuun sa manga Israilita ati sa Ihiptu

¹ Sinabi Panginuun sa kan Hirimyas ti tungkul sa tanan Hudiyu mag-ulian baliwa sa kanaway Ihiptu: sa manga banwa Migdul, Tapanis, ag Mimpis hanggan ti manga ati baliwa sa salatan Ihiptu.

² Inda ti pagsabihun Panginuun Makamaskihan, ti Diyus Israil, “Nakitan niyu ti kadamhakan pinalakaw niku sa Hirusalim hanggan sa tanan banwa sa Huda. Wayak yi inda taynguna ag udyi may mag-ulian ati,

³ dahil sa kadautan binwat manga nasakupan nida. Ginalit nida aku sa pagsunug nida manga kamangyan ag pagsamba sa manga diyus-diyusan balaw nida kilala ngatay nida manga kaumputan.

⁴ Pirmi niku pagsuguun ti manga manugsirbi niku manga purupita hampay pakan-an sida pasandam kuntay danga nida pag buwata tida pag manga bagay mayagting sa kangku ag pagkadat-an niku,

⁵ dapat unman sida namatingi ngatay nagsunud sa manga purupita. Unman sida nagpatlikud sa kanda kadautan ngatay nag-apas sa pagsunug nida manga kamangyan para sa manga diyus-diyusan.

⁶ Nakan ibinuhus niku sa kanda ti masyadu niku pag pangagalit. Ga apuy inda mag-irub sa manga banwa Huda ag Hirusalim, ag nagbaliw maruku inda pag manga rugar ag wayak tugka taynguna.

⁷ “Nakan aku, ti Panginuun Diyus Makamaskihan, ti Diyus Israil magpaingana, ‘Hayga niyu pagdautun kanyu sadili? Gustu aw niyu maruris ti manga tawu sa Huda — ti manga lalaki, ti babayi, ti anak hanggan manga lapsag?

⁸ Hayga niyu aku pag pagpagalitun sa pagbuwat niyu manga diyus-diyusan? Magsunug waya kamu manga kamangyan para siyun atay sa Ihiptu nu naan kamu taynguna pag mag-uli. Ipagpadamhak niyu kanyu sadili ag pagbuwatun niyu mayagting ag makakaray-a sa tanan pag nasyun sa kalibutan.

⁹ Nalimtan yi aw niyu ti manga kadautan binwat niyu manga kaumputan, manga hari, manga rayna sa Huda, ti manga kadautan binwat niyu hanggan niyu manga asawa sa daga Huda ag Hirusalim?

¹⁰ Taynguna tugka udwaya gid kamu magpakumbaba ngatay magkadala sa kangku. Unman diman kamu nagsunud sa manga kasuguan ag manga surundanun ipinakaun niku sa kanyu hanggan sa kanyu manga kaumputan.’

¹¹ “Nakan aku, ti Panginuun Makamaskihan, ti Diyus Israil alistu yi hampay ipadamhak kamu ag rurisun ti buu Huda.

¹² Kamu pag manga magkasawad buhi sa Huda magpilit ataytag sa Ihiptu, magkaramatay kamu tanan ginan sa pinakapugri tugka sa pagdayawun. Magkaramatay kamu sitay sa girahan aw ngatay sa lun-us. Saadan, kayagtingan, kadat-an, ag puyaan kamu.

¹³ Buwatun niku sa kanyu sitay sa Ihiptu ti binuwat niku sa Hirusalim. Parusahan diman niku kamu sa panab-anan girahan, lun-us ag sakit.

¹⁴ Magkaramatay kamu tanan, kamu pag manga nasawad buhi sa Huda ag nangulian atay sa Ihiptu. Balaw yi kamu makabalik sa Huda una gustu niyu mamalik ag mangulian ati. Unman may makabalik sa kanyu purya sa pira-pira lang ti makapalagiw.”

¹⁵ Pagkayamu Hudiyu ti nagtiripun ag namatingi sa kan Hirimyas. Mag-uli sida sa kanaway ag salatan sa Ihiptu. Ti manga lalaki ati ag may alam kanda asawa magtuub manga kamangyan sa manga diyus-diyusan, hanggan ti tanan manga babayi magtiripun ati nanabi sa kan Hirimyas,

¹⁶ “Balaw kami magpasnu sa manga pagsabihun nimu sa kanmi sa ngaran Panginuun!

¹⁷ Buwatun gid nimi ti tanan nimi pagkaibgan buwatun: Mansunug kami manga kamangyan sa kanmi diyusa, Rayna sa Langit, ag manhandug kami sa kanya manga handug irinmun parihu sa binwat nimi sa manga banwa sa Huda ag baklayan Hirusalim. Inda diman ti binwat nimi manga kaumputan hanggan nimi manga hari ag manga takinan nimi. Mayad ti kahamtangan nimi kaybi; mayamu kami karan-unun, ag unman may daut nangyari sa kanmi.

¹⁸ Dapat pagka inmapas kami sa pagsunug kamangyan sa Rayna sa Langit ag balaw yi kami namakaun sa kanya manga handug irinmun, nagmakuri yi ngap kami ag mayamu ti namatay sa girahan ag lun-us.”

¹⁹ Magkun diman ti manga babayi, “Alam nimi manga asawa nu mansunug kami manga kamangyan para sa Rayna sa Langit ag manpakaun manga handug irinmun, ag mantama tinapay parihu sa histuda niya.”

²⁰ Nakan magkun si Hirimyas kaindaay sa manga magpangatuwiran sa kanya,

²¹ “Kanyu aw hantup balaw alam ti Panginuun kuntay kamu hanggan kanyu manga kaumputan, hanggan kanyu manga hari ag manga takinan, ag ti tanan manga nasakupan nagsunug kamangyan sa manga diyus-diyusan sa manga banwa sa Huda ag sa manga baklayan sa Hirusalim?

²² Pagka balaw yi mabata Panginuun ti manga kadautan ag mayagting niyu buwat, winayak niya kanyu daga ag nagbaliw saraadan ag maruku dahil udyi may mag-uli, parihu sa nangyari taynguna.

²³ Nangyari inda pag kadamhakan sa kanyu dahil nagsunug kamu manga kamangyan sa manga diyus-diyusan ag nagkasala sa Panginuun. Unman kamu nagsunud sa manga kasuguan, manga surundanun ag manga pag-itudlu niya.”

²⁴ Magkun waya si Hirimyas sa manga tawu, “Patingihi niyu ti itinultul Panginuun, kamu pag manga taga Huda mag-uli atay sa Ihiptu.

²⁵ Inda ti pagsabihun Panginuun Makamaskihan, ti Diyus Israil, ‘Ungud gid sinunud niyu hanggan niyu manga asawa ti itinaratu niyu mansunug kamangyan ag magpakaun handug irinmun sa Rayna sa Langit. Sigi, pag pararguhan lang niyu kanyu pagbuwatun. Tupada niyu kanyu itinaratu.

²⁶ Dapat pagpatingi kamu sa kang sabihun, kamu pag manga taga Huda mag-uli sa Ihiptu. Pag-isumpa niku sa kang sadili taynguna ginan udyi may bumanggit sa kanyu sa kang ngaran makamaskihan. Balaw yi niku pahintulutan gamitun niyu kang ngaran sa kanyu magsumpa parihu sa kainda, “Magsumpa aku sa ngaran buhi pag Panginuun Diyus.”

²⁷ Dahil bagkus ngap dahanan niku kamu hampay sa ikaayad niyu, ipadamhak niku kamu. Magkaramatay kamu atay sa Ihiptu sa girahan ngatay lun-us tugka sa matabu kamu tanan.

²⁸ Nu may imaw man masawad sa girahan ag makabalik sa Huda, pira-pira lang. Dahil sitay, maalaman manga nasawad mag-ulian taynguna sitay sa Ihiptu nu kantapu pag bagaw ti masunud — sa kanda aw ngatay sa kangku.

²⁹ Inda kay tanda kuntay parusahan gid niku kamu sa inda pag rugar hampay maalaman niyu kuntay ungud matupad kadamhakan pagsabihun niku laban sa kanyu:

³⁰ Ipakaun niku si Hari Hupra, ti hari Ihiptu sa manga kalaban niya gustu mumatay sa kanya parihu sa binuwat niku sa kan Sidikyas sa Huda sa kalaban niya si Hari Nabukudunusur sa Babilunya ti may gustu diman mumatay sa kanya. Aku, ti Panginuun, ti magsabi inda.’ ”