Hirimyas 43 - Hanunuu

Si Hirimyas Dinara sa Ihiptu

¹ Pagka nasabi yi ni Hirimyas ti tanan pag-ipasabi Panginuun kanda Diyus tungkul sa kanda,

² magkun sa kanya sida ni Asariyas kay anak ni Husaya, si Huhanan kay anak ni Karya, ag ti iba waya pag manga palabi-labihun pag manga lalaki, “Pudilun kawu! Balaw kawu sinugu Panginuun nimi Diyus, para sabihun sa kanmi kuntay balaw kami kailangan umatag sa Ihiptu hampay mangulian ati.

³ Si Baruk kay anak ni Niryas ti maggarya sa kanmu kuntay ipakaun kami sa manga taga Babilunya hampay matyun nida kami ngatay bihagun.”

⁴ Nakan si Huhanan kay anak ni Karya hanggan kay manga kaibahan may kangaranan pag manga sundalu, hanggan ti tanan nasakupan unman nagsunud sa sugu Panginuun kuntay mamirmaminti sida sa Huda.

⁵ Bagkus ngap, dinara ni Huhanan hanggan niya manga kaibahan may kangaranan pag manga sundalu ti manga nasawad taga Huda nagbinalik sa Huda ginan sa tuhay-tuhay pag nasyun pinanwayakan nida. Kaibahan siyun ti manga lalaki, ti manga babayi, ti manga anak,

⁶ ag ti manga anak babayi hari sa Huda, ti ipiniyar ni Nibusaradan takinan manga guwardiya sa kan Gidalyas kay anak ni Ahikam kay laki ni Sapan. Dinara diman nida sida ni purupita Hirimyas ag ni Baruk kay anak ni Niryas.

⁷ Balaw sida nagsunud sa Panginuun, ungud nag-atag gid sida sa Ihiptu, ag nakaras-ug sida sa banwa Tapanis.

⁸ Ati sa Tapanis, magkun ti Panginuun sa kan Hirimyas,

⁹ “Habang magbantay ti manga taga Huda, pagbuul kawu daraka pag manga batu bag-u lubungan nimu sa daga sa karaw-an dalan pasulud sa balay hari Ihiptu sa Tapanis.

¹⁰ Bag-u sabihun nimu sa kanda kuntay aku, ti Panginuun Makamaskihan, ti Diyus Israil magsabi, ‘Suguun niku kang manugsirbi si Hari Nabukudunusur sa Babilunya ag ipatukaw niku kay kaharian ag turda panhari sa inda pag tungud batu, ti ilinubung niku sa daga sa karaw-an dalan.

¹¹ Girahun niya ti Ihiptu ag matyun niya ti manga itinagka matyun, ag bihagun niya ti manga itinagka bihagun. Ti iba itinagka mamatay sa girahan.

¹² Irubun niya ti manga balay diyus manga diyus-diyusan sa Ihiptu. Ti iba pag manga diyus-diyusan ay mairub diman, bag-u ti iba darahun niya bihag. Lumpiyuhun niya ti daga sa Ihiptu parihu sa paglumpiyu manug-alaga sa kay rutay hampay mab-ul ti manga hanup. Bag-u umighit si Nabukudunusur ribri sa una hintay pag kadautan.

¹³ Ungud wayakun niya ti manga tulduk diyus-diyusan sa Hilyupulis sa Ihiptu, bag-u irubun gid niya ti manga balay diyus manga diyus-diyusan sa Ihiptu.’ ”