Hirimyas 42 - Hanunuu

Hinagad manga Tawu kuntay Idarangin Sida ni Hirimyas

¹ Bag-u nagpakarani sa kan Hirimyas sida ni Huhanan kay anak ni Karya, si Asariyas kay anak ni Husaya, ag ti kaibahan nida may kangaranan pag manga sundalu, hanggan ti tanan nasakupan ginan sa pinakaababa tugka sa pinakaabwat.

² Magkun sida kan Hirimyas, “Magpakihampang kami sa kanmu, kami ti manga nasawad, idarangin nimu kami sa Panginuun nimu Diyus. Mayamu kami kaybi, dapat taynguna pira wadi parihu sa kanmu mag-akitan.

³ Pandarangin kawu sa Panginuun nimu Diyus hampay sabihun niya sa kanmi nu naan tag kami ag hintay ti dapat nimi buwatun.”

⁴ Magkun si Hirimyas, “Sigi, mandarangin aku sa Panginuun kanyu Diyus para sa paghagadun niyu, ag sabihun niku sa kanyu nu hintay kay pagsabihun. Unman aku manlihim sa kanyu.”

⁵ Magkun waya sida sa kan Hirimyas, “Ti Panginuun nimu Diyus ti tutuu ag matinupadun nita pag kastigus, nu balaw nimi buwatun ti tanan sabihun niya sa panab-anan nimu.

⁶ Magustuhan nimi una unman, basta sundun nimi ti sabihun Panginuun nimi Diyus, hampay bumaliw mayad ti tanan sa kanmi.”

⁷ Pagkalawuy sampulu ka sirang, nagbagaw ti Panginuun sa kan Hirimyas.

⁸ Nakan tinawag ni Hirimyas si Huhanan kay anak ni Karya hanggan ti tanan kaibahan niya may kangaranan pag manga sundalu, hanggan ti tanan nasakupan ginan pinakaababa tugka sa pinakaabwat.

⁹ Ag magkun si Hirimyas sa kanda, “Hinagad niyu kuntay mandarangin aku sa Panginuun, ti Diyus Israil, inda kay sagut niya:

¹⁰ Nu pumirmaminti kamu sa inda pag daga, bangunun niku kamu ag utru ipatindug ag balaw yi niku kamu ipadamhak. Dahil tutuu nanruku gid aku sa kadamhakan kang ipinalakaw sa kanyu.

¹¹ Danga yi kamu magkadala sa hari Babilunya dahil kaibahan niyu aku, iribri niku kamu sa manga kamang niya.

¹² Kaawaan niku kamu. Mamuwat aku paraan hampay kaawaan niya kamu ag pahintulutan mamirmaminti sa kanyu daga.

¹³ “Dapat nu dayu niyu sundun ti Panginuun kanyu Diyus, bag-u sabihun niyu, ‘Bukun kami manmirmaminti sa inda pag daga.

¹⁴ Atabug kami sa Ihiptu bag-u ati pag mangulianan dahil ati unman may girahan ngatay lun-us.’

¹⁵ Inda ti sabihun sa kanyu Panginuun Makamaskihan, ti Diyus Israil, ‘Kamu pag manga magkasawad taga Huda, nu magdisisyun kamu atabug sa Ihiptu ag ati pag mangulian,

¹⁶ ti girahan ag kalun-usan kanyu pagkadalaan dumasun sa kanyu, ag ati kamu pag mamatay.

¹⁷ Ti tanan magkaibug mangulian sa Ihiptu mamatay sa girahan, lun-us ag sakit. Unman may una si unu sa kanda ti makaribri ngatay makapalagiw sa kadamhakan ipalakaw niku sa kanda.’

¹⁸ “Inda waya ti pagsabihun Panginuun Makamaskihan, ti Diyus Israil, ‘Nu kabitay niku ipaagum sa manga taga Hirusalim ti masyadu niku pag pangagalit, ipaagum diman niku sa kanyu ti pangagalit niku nu atabug kamu sa Ihiptu. Saadan ag kagalitan kamu manga tawu. Puyaan nida kamu ag baliwun daut, ag udyi kamu makabalik waya sa inda pag daga.’

¹⁹ “Kamu pag manga magkasawad taga Huda, pagsabihun Panginuun kuntay danga kamu mag-atag sa Ihiptu. Tandai gid niyu inda ti pasandam kang pagsabihun sa kanyu taynguna.

²⁰ Balaw mayad ti binuwat niyu. Hinagad niyu sa kangku kuntay pumakarani sa Panginuun sa kanyu Diyus ag mandarangin para sa kanyu bag-u magsabi buwatun niyu ti tanan sabihun niya.

²¹ Dapat taynguna pagka sinabi niku sa kanyu ti pag-ipasabi niya, dayu waydi niyu sundun.

²² Nakan pagsiguraduhun niku sa kanyu kuntay mamatay kamu sa girahan, kalun-usan ag sakit sa Ihiptu, sa rugar nu naan gustu niyu mangulian.”