Hirimyas 41 - Hanunuu

Minatay si Gidalyas

¹ Si Ismail kay anak ni Nitanyas kay laki ni Ilisama. Kabilang siya sa magtal-anakan hari ag usa sa manga takinan hari kaybi. Pagka sa ikapitu pag bulan sa ati pag timpu, nag-atag si Ismail kaibahan ti sampulu ka tawu sa kan Gidalyas kay anak ni Ahikam sa Mispa. Habang magkaun sida,

² tinmindug si Ismail kay anak ni Nitanyas hanggan ti sampulu ka kaibahan niya ag minatay nida si Gidalyas kay anak ni Ahikam kay laki ni Sapan sa panab-anan baladaw. Nakan namatay ti pinili hari Babilunya bilang gubirnadur sa Huda.

³ Minatay diman nida ni Ismail hanggan niya manga kaibahan ti tanan manga Hudiyu ati sa Mispa, hanggan ti manga sundalu taga Babilunya.

⁴ Pagka surip, bag-u di waya maalaman una si unu kuntay si Gidalyas minatay,

⁵ may 80 ka lalaki atabug sa Mispa ginan sa Sikim, sa Silu, ag Samarya. Kinidkid nida kanda manga bungut, ginitas kanda manga rutay ag biniyagan kanda manga bilug hampay ipakakit naghimanglaw sida. May manga dara sida handug hampay pagdayawun ti Panginuun ag manga kamangyan hampay ihandug sa Balay Diyus Panginuun.

⁶ Sinulang sida ni Ismail maglumi ginan sa Mispa. Magkun siya, “Bantayi niyu ti nangyari kan Gidalyas.”

⁷ Pagka rinmas-ug sida sa banwa, ti 70 sa kanda minatay ni Ismail hanggan niya manga kaibahan. Bag-u ilinagpak nida ti manga bangkay sa bubun.

⁸ Ti sampulu waydi balaw nida minatay dahil magkun sida kan Ismail, “Danga nimu kami pag matya! Ipakaun nimi sa kanmu ti manga tirigu, sibada, lana ag daykut nimi itinagu sa tanman.”

⁹ Ti bubun linagpakan ni Ismail manga bangkay manga tawu kay minatay, hanggan yi kay bangkay ni Gidalyas magkaapu ni Hari Asa. Ipinakali niya inda katpung ginira sida ni Hari Baasa sa Israil. Inda pag bubun napnu ni Ismail manga bangkay.

¹⁰ Bag-u binihag ni Ismail ti manga nasawad pag manga tawu sa Mispa — ti manga anak babayi hari ag ti manga tawu kay ipiniyar ni Nibusaradan sa kan Gidalyas hampay alagaan. Bag-u nagbalik si Ismail sa Amun dara ti manga bihag.

¹¹ Nabaritaan ni Huhanan kay anak ni Karya hanggan niya manga kaibahan may kangaranan sa manga sundalu ti daut pag binuwat ni Ismail.

¹² Nakan tipunun nida kanda manga tawuhan ag linagas si Ismail hampay labanan. Natakdan nida sida maluang pag tipunan danum sa Gibyun.

¹³ Pagka nakitan manga bihag ni Ismail si Huhanan hanggan kay manga kaibahan may kangaranan, magbaya sida.

¹⁴ Sida tanan ti bihag ni Ismail ginan sa Mispa namalalagiwan atabug sa kan Huhanan.

¹⁵ Dapat nalagiw atabug sa Amun si Ismail ag ti walu niya ka kaibahan.

¹⁶ Tinipun ni Huhanan hanggan niya manga kaibahan may kangaranan ti tanan bihag ni Ismail ginan sa Mispa, kaibahan sitay ti manga sundalu, ti manga babayi, ti manga anak hanggan ti manga takinan sa balay hari. Ginan sa Gibyun,

¹⁷ nag-atag sida sa Girut Kimham arani sa Bitlihim ag nagdiritsu sa Ihiptu.

¹⁸ Magkadala sida sa manga taga Babilunya dahil minatay ni Ismail si Gidalyas ti pinili hari Babilunya bilang gubirnadur sa buu daga Huda.