Hirimyas 40 - Hanunuu

Pinalpasan si Hirimyas

¹ May sinabi ti Panginuun sa kan Hirimyas pagkaigu pinalpasan siya ni Nibusaradan takinan manga guwardiya sa Rama. Nakatarikada siya kaybi kaibahan ti manga bihag taga Hirusalim hanggan taga Huda ti darahun sa Babilunya.

² Pagka nakitan ni Nibusaradan si Hirimyas, magkun siya sa kanya, “Ti Panginuun kanmu Diyus magsabi wayakun niya ti Hirusalim.

³ Ag nangyari inda taynguna. Ungud binuwat gid Panginuun ti sinabi niya. Nangyari inda dahil nagbuwat kasalanan sa Panginuun ti manga kasimanwa nimu ag balaw sida sinmunud sa kanya.

⁴ Bul-un yi niku taynguna ti tarikada nimu ag palpasan yi kawu nita. Nu gustu nimu, kumuyug kawu sa kangku sa Babilunya ag alagaan kawu nita ati. Dapat nu dayu kawu, nasa kanmu tunda. Bantayi nimu ti buu daga; malaya kawu umatag una naan.

⁵ Nu gustu nimu ungud patayak sitay, pagbalik maan kawu sa kan Gidalyas kay anak ni Ahikam kay laki ni Sapan. Binwat siya tagapangasiwa hari Babilunya sa manga banwa Huda. Mahimu kawu makapangulian kaibahan niya hanggan ti manga nasakupan niya ngatay una naan pag gustu nimu umatag.” Bag-u pinakan-an siya ni Nibusaradan manga karan-unun ag pamakaun, bag-u pinalpasan.

⁶ Nakan nighit si Hirimyas bag-u nag-atag sa kan Gidalyas ati sa Mispa ag nangulian ati kaibahan manga tawu natayak.

Kay Magdumara ni Gidalyas sa Huda

⁷ May pira ka manga may kangaranan hanggan manga sundalu sa Huda ati sa katanmanan ti balaw nagsuku sa manga taga Babilunya. Nabaritaan nida si Gidalyas binwat gubirnadur hari Babilunya sa buu daga hampay pumangulu sa manga lalaki, sa manga babayi hanggan sa manga anak kuntay imaw ti pinakamakuri kay kahamtangan natayak ag balaw dinara-bihag sa Babilunya.

⁸ Nakan nag-atag inda pag manga takinan sa kan Gidalyas ati sa Mispa. Inda pag manga takinan sida ni Ismail kay anak ni Nitanyas, si Huhanan ag si Hunatan kay manga anak ni Karya, si Siraya kay anak ni Tanhumit, ti manga anak ni Ipay taga Nitupa, ag si Haasanyas ti anak taga Maaka. Kinmuyug sa kanda ti manga tawuhan nida.

⁹ Nanumpa sa kanda si Gidalyas kuntay balaw sida mipadamhak nu pumasakup sida sa manga taga Babilunya. Magkun siya sa kanda, “Mangulian kamu sitay pag daga inda ag mansirbi kamu sa hari Babilunya, mumayad kamu.

¹⁰ Mamirmaminti aku sitay sa Mispa hampay umatubang sa manga taga Babilunya para sa kanyu nu rumas-ug sida sitay. Mangulian kamu una naan pag rugar kanyu gustu, anihun niyu ti manga ubas, manga ulibu, ag ti iba waya pag manga burak kayu, ag hamnuun niyu sa manga sukadan.”

¹¹ Nabaritaan diman tanan Hudiyu nagpinalagiw tag sa Muab, sa Amun, sa Idum ag sa iba waya manga nasyun kuntay may manga tawu tinayakan si Hari Nabukudunusur manga nasakupan sa Huda, ag binuwat niya gubirnadur si Gidalyas kay anak ni Ahikam kay laki ni Sapan.

¹² Nakan binmalik sida sa Huda ginan sa tuhay-tuhay pag rugar nida inatagan ag nag-atag sida kan Gidalyas sa Mispa. Bag-u namuul sida manga ubas ag iba waya manga burak kayu.

¹³ Nag-ati diman sa kan Gidalyas sa Mispa si Huhanan anak ni Karya ag ti iba waya pag manga may kangaranan manga sundalu balaw nagsuku sa manga taga Babilunya.

¹⁴ Magkun sida, “Unman aw nimu alam sinugu ni Hari Baalis taga Amun si Ismail kay anak ni Nitanyas hampay matyun kawu?” Dapat unman nagpasnu si Gidalyas sa kanda.

¹⁵ Bag-u napasampak si Huhanan sa kan Gidalyas sa lihim magkun siya sa kanya, “Matyun niku si Ismail sa unman may una si unu ti nakaalam. Balaw nita pahintulutan matyun niya kawu. Nu abi mangyari inda, inda ti bumaliw dahilan hampay mawayak ag madura ti manga Hudiyu natayak sitay sa Huda kanmu pagpamunuan.”

¹⁶ Dapat magkun si Gidalyas kay anak ni Ahikam tag kan Huhanan, “Danga nimu pag buwata tunda. Balaw tutuu ti pagsabihun nimu tungkul sa kan Ismail.”