Hirimyas 4 - Hanunuu

¹ Magkun ti Panginuun, “Israil, nu ungud gustu nimu bumalik sa kangku, pagbalik yi kawu. Dayuun nimu ti mayagting pag manga diyus-diyusan bag-u balaw yi kawu pablag sa kangku,

² ag nu manumpa kawu sa pangaran lang niku mangabuhi kawu matinupadun, matadlung ag kang-ud, bumaliw papalad kawu sa manga nasyun bag-u dayawun nida aku.”

³ Magkun ti Panginuun sa manga taga Huda ag taga Hirusalim, “Bag-uhun niyu kanyu manga sadili ga magbungkal kamu kanyu daga balaw waya nabungkal. Danga niyu ipamgas ti mayad pag binhi sa manga mailamnun madugi.

⁴ Lumpiyuha niyu kanyu manga tagipusuun sa atubangan Panginuun, kamu pag manga taga Huda ag taga Hirusalim, dahil nu balaw katida malakawan niyu ti isug niku ga apuy unman magkapsa dahil sa binwat niyu pag kadautan.

Ti Rumas-ug pag Parusa sa Huda

⁵ “Sabihun nimu sa Huda ag Hirusalim kuntay patunugun nida ti budyung sa buu daga. Ihuyaw sa malinaw ag sa mabaskug kuntay pagpalagiw sida ag pagpatagu sa manga may alad batu pag banwa.

⁶ Pasandaman nimu sida ti manga taga Hirusalim kuntay pagpalagiw kadali sida dahil mamadara aku kadamhakan ginan sa kanaway.”

⁷ Ti manugwayak kuntay gumira sa manga nasyun ga liyun linmuwang gin sa kay pagpatag-an. Ginminan yi siya sa kay rugar hampay wayakun kanyu daga. Magkaradaut ti manga banwa niyu tugka sa balaw yi inda maulianan.

⁸ Nakan isulung yi niyu ti rutay panhimanglaw bag-u paglumi dahil masyadu waya ti isug Panginuun sa kanta.

⁹ Magkun ti Panginuun, “Sa ati pag sirang, tumalaw ti manga hari hanggan manga may kangaranan niya, madiklahan ti manga manughandug, bag-u madulaw ti manga purupita.”

¹⁰ Pagkatapus magkun aku, “Panginuun Diyus, nadaya duy ti manga tawu sa sinabi nimu kaybi, dahil nanaratu kawu pirmaminti ti kahusayan sa Hirusalim. Dapat ti baladaw maaw nakaalistu yi mumatay sa kanmi.”

¹¹ Rumas-ug ti sirang sumabi ti Panginuun sa manga taga Hirusalim, “Umuyup ti mainit pag durus ginan sa arabwat pag rugar sa pangawakawaan atabug sa manga nasakupan niku, dapat ay balaw hampay mataphan ti manga tirigu nida.

¹² Ti mabisug inda pag durus ginan sa kangku. Sabihun niku taynguna ti parusa niku sa kanda.”

¹³ Bantayi niyu! Magras-ug ti manga kalaban nita ga manga rurum. Kay manga kalisa niya ga buhawi kay manga kabayu niya maliksi waya kaysa manga agila. Kaawaawa gid kita! Inda yi kanta katugkaan!

¹⁴ “Manga taga Hirusalim, lumpiyuha niyu ti kadautan sa kanyu tagipusuun hampay maribri kamu. Tugka kapira kamu mag-isip sa daut?

¹⁵ Ti kadamhakan niyu pag-ibarita yi manga manugpadakit ginan sa Dan ag sa kabantudan Ipraim.

¹⁶ Sinugu sida kuntay paandami ti manga nasyun hanggan ti Hirusalim kuntay may maggira manga sundalu ginan sa arayu pag rugar mag-akat girahan laban sa manga banwa Huda.

¹⁷ Pinalibutan nida ti Hirusalim ga manga tawu manugbantay sa tanman, dahil ti Hirusalim naglaban sa kangku. Aku, ti Panginuun, ti magsabi inda.

¹⁸ Ti pag-ugaliun ag daut buwat niyu ti nagdara inda pagparusa sa kanyu. Inda ti kaparusahan niyu. Masakit inda! Ag lumapus sa kanyu tagipusuun.”

Nanlumi si Hirimyas para sa Kay manga Kasimanwa

¹⁹ “Ti sakit sa tagipusuun harus dayi niku mabata ag kang-ud yi lang kang magdangup. Magtibtibuk wadi kang dubdub ag unman aku makaagwanta. Dahil nadnugan niku ti tunug budyung hanggan ti pagrit sa girahan.

²⁰ Dasun-dasun yi rinmas-ug ti kadamhakan. Tanan rugar nawayak. Hanggan kang manga turda kadaka nagba ag nagisi kay manga patakip.

²¹ kapira tugka nguna makitan niku ti bandira sa girahan hanggan madnugan ti tunug turumpita?”

²² Magkun ti Panginuun, “busal ti manga nasakupan niku; unman nida aku magkakilala. Sida manga kurang-kurang pag kalay-awan ag unman makaintindi. Anad sida magbuwat daut, dapat unman madunung magbuwat mayad.”

Kay Pangakakitun ni Hirimyas tungkul sa Rumas-ug pag Kadamhakan

²³ Binantayan niku ti daga ag nakitan niku udyi may histuda hanggan udyi may sukad. Bag-u nakitan diman niku ti langit unman yi may rayaw.

²⁴ Nakitan niku ti manga bantud hanggan ti manga tagudtud pagtandugun.

²⁵ Nakitan diman niku unman may tawu, ag maglayang ti manga manuk tag sa arayu.

²⁶ Nakitan niku ti abunda pag tanman nagbaliw pangawakawaan. Nawasak ti tanan banwa dahil sa masyadu pag pangagalit Panginuun.

²⁷ Inda ti pagsabihun Panginuun, “Ti buu daga madaut, dapat balaw niku inda lubus dautun.

²⁸ Manlulumian ti kalibutan ag mandulum ti langit, dahil sinabi yi niku ti parusa ag balaw yi niku inda bag-uhun. Nakadisisyun yi aku udyi mabag-u kang isip.”

²⁹ Sa iringayan manga manugkabayu hanggan manugpana, nalagiw yi sa dala ti manga nasakupan sa kada banwa. Ti iba nalagiw tag sa kabantudan bag-u ti iba dinmayik sa kabatuhan. Ti tanan banwa tinayakan udyi may nasawad mag-uli ati.

³⁰ Hirusalim, arani yi kawu mawayak. Unu kanmu pagbuwatun? Hayga nakasulung waya kawu marinu pag rutay hanggan manga gintu? Hayga magpauli waya kawu manga pamarinu sa kanmu manga mata? Unman yi may pulus kanmu magparinu. Binugyahan yi kawu nimu pagmahalun pag manga kakampi nasyun ag pagkaibgan kawu nida matyun.

³¹ Nadnugan niku ti maglumi hanggan magpabawi, ga babayi magpanganak sa kay panganay anak. Lumi inda manga nasakupan Hirusalim ga maghingagaw kanda arup. Pag-ipaabwat nida kanda manga kamang magkun, “Kaawaawa waydi kami; ag ga malipungan yi, dahil asan yi kanmi manga kalaban ti manmatay sa kanmi.”