Hirimyas 39 - Hanunuu

Ti Pagkawayak Hirusalim

¹ Kaindaay ti pagkawayak Hirusalim: Katpung ikasampulu pag bulan sa ikasiyam pag timpu sa kay maghari ni Sidikyas sa Huda, naggira si Hari Nabukudunusur sa Babilunya hanggan ti buu gurupu sundalu niya sa Hirusalim.

² Katpung ikasiyam pag sirang, sa ikap-at pag bulan sa ika-11 pag timpu sa kay maghari ni Sidikyas, winayak manga taga Babilunya ti alad batu banwa.

³ Pagka naslud yi nida ti Hirusalim, ti tanan takinan hari Babilunya tinmukaw sa Karaw-an pag Sabian banwa. Ati sida ni Nirgal Sarisir taga Samgar, si Nibu, si Sarsikim usa ka takinan, ag kay usa waya ka Nirgal Sarisir usa ka may kangaranan, hanggan ti iba waya manga takinan hari Babilunya.

⁴ Pagka nakitan sida ni Hari Sidikyas hanggan niya tanan sundalu, nalagiw sida pagka rinmas-ug ti yabi. Ati sida pag linmakaw sa halamanan hari, sa puwirtahan sa tab-anan duwa ka alad batu, ag nag-atag sida sa Karatagan Hurdan.

⁵ Dapat ay binukad sida manga sundalu Babilunya, natakdan sida sa Karatagan Hiriku. Dinakup nida si Sidikyas ag dinara sa kan Hari Nabukudunusur sa Ribla sa daga Hamat. Ag sinintinsiyahan siya ati kamatayan ni Nabukudunusur.

⁶ Ati sa Ribla sa atubangan ngapu ni Sidikyas, minatay hari Babilunya kay manga anak lalaki ni Sidikyas, hanggan ti tanan takinan sa Huda.

⁷ Ipinaluwat waydi hari kay manga mata ni Sidikyas ag tinarikadahan bag-u dinara sa Babilunya.

⁸ Sa Hirusalim waydi, inirub manga taga Babilunya ti manga balay hanggan ti balay hari, ag winayak nida ti manga alad batu.

⁹ Sa magpanguna ni Nibusaradan takinan manga guwardiya, ipinadara sa Babilunya ti manga tawu natayak sa banwa hanggan ti manga tawu magkampi sa kan Nibusaradan.

¹⁰ Dapat tinayakan ni Nibusaradan sa Huda ti pira ka manga tawu unman may una hintay pag kasiyunan, ag inayawan niya sida manga ubasan ag tanman.

¹¹ Nagsugu si Hari Nabukudunusur sa kan Nibusaradan takinan manga guwardiya tungkul sa kan Hirimyas. Magkun siya,

¹² “Bul-un nimu si Hirimyas ag alagaan nimu siya kaayad. Buwata nimu ti una hintay ti paghagadun niya.”

¹³ Sinunud inda nida ni Nibusaradan takinan manga guwardiya, Nibusasban, Nirgal Sarisir ag iba waya manga takinan hari Babilunya.

¹⁴ Ipinabuul nida si Hirimyas ati sa punduhan manga guwardiya sa balay hari ag ipinakaun sa kan Gidalyas kay anak ni Ahikam kay laki ni Sapan. Dinara ni Gidalyas si Hirimyas sa kay balay. Nakan natayak si Hirimyas sa Huda kaibahan ti iba waya niya pag manga kasimanwa.

¹⁵ Katpung si Hirimyas nakapirisu waya sa punduhan manga guwardiya sa balay hari, sinabi Panginuun sa kanya

¹⁶ “Pag-atag kawu sa kan Ibid Milik taga Itiyupya, sabihun nimu kuntay aku, ti Panginuun Makamaskihan, ti Diyus Israil magkumun, ‘Buwatun yi niku ti manga pagsabihun niku laban sa inda pag banwa. Balaw niku inda paalwanun. Gubaun niku inda. Makitan gid nimu mangyari inda.

¹⁷ Dapat iribri niku kawu sa ati pag udas. Balaw kawu ipakaun sa manga tawu pagkadalaan nimu.

¹⁸ Iribri niku kawu. Balaw kawu mamatay sa girahan. Maribri di kawu dahil magsarig kawu sa kangku. Aku, ti Panginuun, ti magsabi inda.’ ”