Hirimyas 38 - Hanunuu

Ilinagpak si Hirimyas sa Bubun

¹ Nabaritaan nida ni Sipatyas kay anak ni Matan, ni Gidalyas kay anak ni Pasur, ni Hihukal kay anak ni Silimya, hanggan ni Pasur kay anak ni Malkiyas ti sinabi ni Hirimyas sa manga tawu. Kaindaay kay sabi, “Magsabi ti Panginuun,

² una si unu ti patayak sitay sa banwa mamatay sa girahan, lun-us hanggan sakit. Dapat una si unu ti sumuku sa manga taga Babilunya balaw mamatay. Makaribri siya ag mabuhi di.

³ Magsabi diman ti Panginuun pihu yi maagaw ag sakupun manga taga Babilunya inda pag banwa.”

⁴ Nakan magkun ti manga may kangaranan tabug sa hari, “Kailangan matyun inda pag tawu. Pagpalumuyun lang niya ti nalub-anan manga sundalu nasawad, hanggan ti manga nasakupan dahil sa manga pagsabihun niya sa kanda. Balaw siya maghingbut kaayadan para sa manga tawu nu unman kadamhakan ngap nida.”

⁵ Sinmagut si Hari Sidikyas, “Ipakaun niku siya sa kanyu. Buwata niyu sa kanya kanyu pagkaibgan. Unman aku mangampara.”

⁶ Nakan bin-ul nida si Hirimyas sa pirisuhan bag-u ipinadugsun nida sa bubun ati sa punduhan manga guwardiya sa balay hari. Inda pag bubun magkaapu ni Malkiyas anak hari. Unman may danum ti bubun dapat may lutuk, harus mitalnud ati si Hirimyas.

^7-8 Dapat pagka nabaritaan inda ni Ibid Milik taga Itiyupya usa diman ka kaawat sa balay hari, inatihan niya ti hari sa kay balay. Matukawan tunda katpung ti hari sa Sabian ni Binhamin. Magkun siya sa hari,

⁹ “Mahal Hari, daut duy ti binuwat tida pag manga tawu sa kan Hirimyas. Ilinagpak nida siya sa bubun, ag pihu yi mamatay siya ati sa lun-us, dahil harus magkatabu yi duy ti tinapay sa buu banwa.”

¹⁰ Nakan magkun si Hari Sidikyas sa kanya, “Pag-iba kawu 30 ka lalaki ginan sa manga tawu niku ag bul-a niyu si Hirimyas sa bubun bag-u waya siya mamatay.”

¹¹ Nakan iniba ni Ibid Milik ti manga tawu ag nag-atag sida sa balay haramnuan balay hari, bag-u nam-ul manga pamaris, daan rutay, hanggan lubid bag-u ipinadugsun nida sa kan Hirimyas inda ati sa bubun.

¹² Magkun si Ibid Milik sa kan Hirimyas, “Sapinan nimu ti manga pamaris ag daan rutay sa kilkili nimu hampay balaw kawu masakitan lubid.” Bag-u inda ngani ti binuwat ni Hirimyas.

¹³ Bag-u itinakas nida siya ginan sa sulud bubun ag ibinalik sa punduhan manga guwardiya balay hari.

Utru Ipinatawag ni Hari Sidikyas si Hirimyas

¹⁴ Utru ipinatawag ni Hari Sidikyas si Hirimyas ati sa ikatlu pag sabian sa Balay Diyus Panginuun. Magkun si Sidikyas kan Hirimyas, “May ipaingana aku sa kanmu, gustu niku sabihun nimu sa kangku kay tutuu.”

¹⁵ Magkun si Hirimyas sa kan Sidikyas, “Nu sabihun niku duy sa kanmu ti katutuuhanan, ipamatay diman nimu aku. Ag una paanyuan niku duy kawu, balaw diman duy kawu mamapasnu sa kangku.”

¹⁶ Dapat lihim nagsumpa si Hari Sidikyas sa kan Hirimyas. Magkun siya, “Magsumpa aku sa buhi pag Panginuun, ti nagpakaun buhi sa kanta, balaw niku kawu matyun ngatay ipakaun sa manga magkaibug mumatay sa kanmu.”

¹⁷ Magkun si Hirimyas sa kan Sidikyas, “Inda ti pagsabihun Panginuun Diyus Makamaskihan, ti Diyus Israil, ‘Nu umampu duy kawu sa manga takinan hari Babilunya, maribri duy kanmu buhi ag balaw nida irubun inda pag banwa. Kawu duy hanggan kanmu magtal-anakan mabuhi di.

¹⁸ Dapat nu balaw duy kawu umampu, ipakaun inda pag banwa sa manga taga Babilunya, bag-u inda duy kanda irubun ag balaw duy kawu makapalagiw sa kanda.’ ”

¹⁹ Magkun si Hari Sidikyas, “Magkadala aku sa manga Hudiyu magpakampi sa manga taga Babilunya, barang ipakaun aku manga taga Babilunya sa kanda ag sakitun nida aku.”

²⁰ Magkun si Hirimyas, “Balaw duy kawu ipakaun sa kanda nu sundun lang nimu ti Panginuun. Maribri di duy kanmu buhi ag unman may una hintay ti mangyari sa kanmu.

²¹ Dapat nu unman duy kawu umampu, inda waydi ti sinabi sa kangku Panginuun ti mangyari sa kanmu:

²² Ti tanan babayi natayak sa balay nimu darahun manga takinan hari Babilunya. Bag-u sumabi sa kanmu inda pag manga babayi, ‘Dinaya duy kawu nimu manga suud pag kakilala. Taynguna matalnudan yi sa lutuk kanmu manga lulud, tinayakan yi nida kawu.’

²³ “Darahun duy nida ti tanan asawa ag anak nimu sa Babilunya. Kawu duy unman diman makapalagiw sa kanda; bihagun kawu hari Babilunya. Ag nida pag banwa irubun nida.”

²⁴ Bag-u magkun si Sidikyas sa kan Hirimyas, “Danga nimu sabihun una sa kantapu ti hinampangan nita hampay balaw kawu mamatay.

²⁵ Mahimu mabaritaan manga takinan nanharampangan kita. Barang atihan kawu nida bag-u ipaingana sa kanmu, ‘Hintay ti hinampangan niyu ni hari? Nu balaw nimu sabihun matyun kawu nimi.’

²⁶ Nu mangyari inda, sabihun nimu sa kanda, ‘Nagpakihampang aku sa hari kuntay danga niya aku pag-ibalik ati sa balay ni Hunatan barang mamatay aku ati.’ ”

²⁷ Nag-atag ngani ti manga takinan sa kan Hirimyas ag pina-ingana siya. Bag-u sinagut niya sida angay sa sinabi hari sa kanya, nakan udyi sida nangusisa waya. Unman may nakadnug sa hinampangan ni Hirimyas ag hari.

²⁸ Pirmaminti nakapirisu si Hirimyas ati sa punduhan manga guwardiya tugka sa masakup ti Hirusalim.