Hirimyas 37 - Hanunuu

Ipinatawag ni Sidikyas si Hirimyas

¹ Si Sidikyas kay anak ni Husyas ti binuwat hari sa Huda ni Hari Nabukudunusur sa Babilunya. Siya ti iinilis kan Hihuyakin kay anak ni Hihuyakim.

² Dapat si Sidikyas hanggan ti manga takinan niya hanggan ti manga tawu pagdumarahan nida unman diman namatingi sa itinultul Panginuun sa panab-anan ni Purupita Hirimyas.

³ Taynguna, sinugu ni Hari Sidikyas si Hihukal kay anak ni Silimya ag ti manughandug si Sipanyas anak Maasiyas kuntay atihi si Purupita Hirimyas hampanga kuntay daranginan sida sa Panginuun nida Diyus.

⁴ Pagka tida pag udas, unman waya napirisu si Hirimyas nakan malaya siya mag-atag una naan.

⁵ Pagka tida diman pag sirang, maggira ti manga taga Babilunya sa Hirusalim, dapat pagka nasaydan nida magras-ug ti manga sundalu hari Ihiptu, inmapas sida sa paggira sa Hirusalim.

^6-7 Bag-u magkun ti Panginuun, ti Diyus Israil, sa kan Hirimyas, “Sabihun nimu sa kan Hari Sidikyas sa Huda nag-sugu hampay mamaingana sa kanmu nu hintay ti pagsabihun niku mangyari, ‘Rinmas-ug ti manga sundalu hari Ihiptu hampay awatan kawu, pat-ay bumalik sida sa Ihiptu.

⁸ Bag-u utru bumalik ti manga taga Babilunya sa inda pag banwa. Sakupun nida inda bag-u rargu irubun.’ ”

⁹ Inda waya ti pagsabihun Panginuun, “Danga niyu pag dayaa kanyu sadili sa maghantup kuntay balaw yi bumalik ti manga taga Babilunya. Dahil pihu gid bumalik sida.

¹⁰ Una waya matalu niyu ti buu gurupu Babilunya maggira sa kanyu, ag ti nasawad sa kanda ti manga nabiyagan sa kanda kampu, gumira diman sida sa kanyu, ag kanda irubun inda banwa.”

Ipinirisu si Hirimyas

¹¹ Pagka nalagiw ti manga sundalu Babilunya ginan sa Hirusalim dahil sa gurupu hari Ihiptu,

¹² nighit si Hirimyas sa Hirusalim nag-atag sa daga ni Binhamin hampay bul-un kay kabahagi niya pag daga kay ibinahagi sa kay magtal-anakan.

¹³ Dapat ay pagka rinmas-ug siya sa puwirtahan banwa ni Binhamin, dinakup siya kapitan manga guwardiya ni Iriya kay anak ni Silimya kay laki ni Hananiyas. Magkun sa kanya ti kapitan, “Kakampi kawu manga taga Babilunya.”

¹⁴ Sinmagut si Hirimyas, “Balaw tutuu tunda! Balaw aku kakampi manga taga Babilunya.” Dapat dayu magpasnu si Iriya, nakan dinakup niya si Hirimyas bag-u dinara sa manga takinan.

¹⁵ Nangisug sida sa kan Hirimyas ag ipinabakul nida siya, bag-u ipinapirisu ati sa balay ni Hunatan ti manugsurat. Inda pag balay binuwat nida pirisuhan.

¹⁶ Ipinaslud nida si Hirimyas sa usa ka pirisuhan sa sirung daga ag nagpirmaminti siya dugay ati.

¹⁷ Sa kadugayun, ipinab-ul ni Hari Sidikyas si Hirimyas bag-u dinara sa balay hari. Lihim niya inda pinaingana, “May itultul aw kawu ginan sa Panginuun?” Sinmagut si Hirimyas, “May imaw! Ipakaun kawu sa hari Babilunya.”

¹⁸ Bag-u nagpaingana si Hirimyas sa hari, “Unu ti nabwat niku pag kasalanan sa kanmu, ngatay sa kanmu manga takinan, ngatay sa tawu banwa ag ipinapirisu niyu aku?

¹⁹ Naan yi ti manga purupita niyu naghula balaw girahun hari Babilunya inda pag banwa?

²⁰ Dapat taynguna, Mahal Hari, nu mahimu duy patingihi niyu waydi aku. Magpakihampang aku kuntay danga yi duy nimu aku ibalik sa kay balay ni Hunatan manugsurat dahil mamatay aku ati.”

²¹ Nakan nag-sugu si Hari Sidikyas kuntay daran-un si Hirimyas ati sa punduhan manga guwardiya sa balay hari. Nagsugu diman siya pakan-i si Hirimyas sirang-sirang habang may magkasawad waya tinapay sa banwa. Nakan nagpirmaminti nakapirisu si Hirimyas sa punduhan manga guwardiya.