Hirimyas 36 - Hanunuu

Binasa ni Baruk ti Ipaburayhaw Panginuun

¹ Katpung ikap-at pag timpu kay maghari ni Hihuyakim kay anak ni Hari Husyas sa Huda, magkun ti Panginuun sa kan Hirimyas,

² “Pagbuul kawu masuratan ag isurat nimu ti tanan niku sabihun sa kanmu tungkul sa Israil, Huda ag sa tanan nasyun. Isurat nimu ti tanan sabihun niku, ginan sa un-an kawu niku hampangun sa udas ni Hari Husyas tugka taynguna.

³ Barang abi man-ampu ti manga nasakupan Huda nu madnugan nida ti tanan kadamhakan kang paggayakun buwatun sa kanda ag patlikudan nida ti daut pag ugali nida. Bag-u nu mangyari inda, patawadun niku sida sa kanda manga kadautan ag kasalanan.”

⁴ Nakan ipinatawag ni Hirimyas si Baruk kay anak ni Niryas ag itinultul sa kanya ti tanan sinabi Panginuun bag-u isinurat waydi ni Baruk sa malulunan pag sururatan.

⁵ Bag-u magkun si Hirimyas sa kan Baruk, “Pagbawalan aku umatag sa Balay Diyus Panginuun.

⁶ Nakan kawu yi lang ti umatag ati sa sirang pauray sa darangin. Maniripnan ati ti manga nasakupan sa Huda ginan sa banwa nida. Basahun nimu sa kanda ti pagsabihun Panginuun inda sa kasuratan itinultul niku sa kanmu.

⁷ Barang abi sa panab-anan inda pumakarani sida sa Panginuun ag patlikudan nida ti daut nida pag-ugali. Dahil pinakan-an yi sida pasandam Panginuun kuntay sida parusahan niya dahil sa masyadu niya pag galit sa kanda.”

⁸ Binwat ni Baruk ti pag-isugu sa kanya ni Hirimyas. Binasa ngani niya ati sa Balay Diyus ti pag-ipasabi Panginuun sa manga taga Huda.

⁹ Nangyari inda katpung sirang pag pauray sa darangin sa atubangan Panginuun, pagka sa ikasiyam pag bulan sa ikalima pag timpu kay maghari ni Hihuyakim kay anak ni Hari Husyas sa Huda. Nagtipun sa Balay Diyus ti nasakupan Hirusalim ag manga banwa sa Huda.

¹⁰ Binasa ni Baruk ti manga pagsabihun ni Hirimyas sa nakasurat sa malulunan pag sururatan sa Balay Diyus arani sa sulud-sulud ni Gimaryas ti manugsurat kay anak ni Sapan. Kay sulud-sulud ni Gimaryas baliwa sa tungud sarakahan Balay Diyus, arani sa paglakawan sa Bag-u pag Sabian.

¹¹ Pagka nadnugan ni Mikaya kay anak ni Gimaryas ag kay laki ni Sapan ti itinultul Panginuun kay binasa ni Baruk,

¹² nag-atag siya sa balay hari, ati sa sulud-sulud manugsurat, nu naan magtiripnan ti tanan manga takinan. Ati sida ni Ilisama ti manugsurat, si Dilaya kay anak ni Simaya, si Ilnatan kay anak ni Akbur, si Gimaryas kay anak ni Sapan, si Sidikyas kay anak ni Hananiyas, ag ti iba waya pag manga takinan.

¹³ Itinultul ni Mikaya ti tanan nadnugan niya sa binasa ni Baruk sa manga tawu.

¹⁴ Nakan kadaka sinugu manga takinan si Hihudi kay anak ni Nitanyas kay laki ni Silimya, ag kay laki sa tuud ni Kusi kuntay atihi si Baruk ag sabihun daran-a niya ti malulunan pag kasuratan kay binasa niya sa manga tawu, ag pag-atag sa kanda. Nakan nag-atag ngani si Baruk dara tida pag kasuratan.

¹⁵ Pagka rinmas-ug ni Baruk, magkun ti manga takinan, “Pagtukaw kawu ag basaha nimu sa kanmi ti kasuratan.” Nakan binasa waydi ni Baruk ti kasuratan sa kanda.

¹⁶ Pagka nadnugan nida ti tanan nakasurat siti, namarantayan sida sa dala ag magkun sida sa kan Baruk, “Kailangan nita inda sabihun sa hari.”

¹⁷ Pinaingana nida si Baruk, “Sabiha nimu sa kanmi, kabitay nimu nisurat ti inda tanan? Sinabi aw inda sa kanmu ni Hirimyas?”

¹⁸ Sinmagut si Baruk, “Hu, sinabi sa kangku ni Hirimyas ti kada bagaw sa malulunan pag sururatan inda isinurat niku waydi sa panab-anan tinta.”

¹⁹ Magkun ti manga takinan sa kan Baruk, “Pagpatagu yi kamu ni Hirimyas ag danga niyu pagpaalman una sa kantapu nu naan kamu katpung.”

²⁰ Ipinauli manga takinan tida pag kasuratan ati sa sulud-sulud ni Ilisama ti manugsurat bag-u nag-atag sida sa hari ati sa sarakahan balay hari, ag sinabi nida sa kanya ti tanan.

²¹ Nakan sinugu hari si Hihudi kuntay bul-a ti kasuratan. Bin-ul inda ni Hihudi ati sa sulud-sulud ni Ilisama ag binasa sa hari ag sa tanan takinan matindugan sa saruy niya.

²² Tig raramig tunda katpung nakan ti hari sa kay sulud-sulud panramig ag matukawan siya sa arani apuy.

²³ Sa kada magbasa ni Hihudi tulu hanggan upat ka padalan, pagpuldun hari kay baliw sa panab-anan niya siyaw ag pag iyamut niya sa apuy tugka sa mairub ti tanan kasuratan.

²⁴ Balaw gid nadala ti hari hanggan ti tanan niya takinan sa nadnugan nida sa pagkumnun kasuratan. Balaw nida ginitas kanda rutay palatandaan sa karukuan nida.

²⁵ Lang madi nagpakihampang sida ni Ilnatan, ni Dilaya ag ni Gimaryas sa hari nu mahimu danga pag sunuga ti kasuratan, balaw diman namatingi ti hari.

²⁶ Bagkus ngap, sinugu niya sida ni Hiramiil kanya pag anak, si Siraya kay anak ni Asriyil, ag si Silimya kay anak ni Abdil kuntay dakpa sida ni Baruk ti manugsurat ag si Purupita Hirimyas. Dapat ay itinagu sida Panginuun.

²⁷ Pagka sinunug hari ti malulunan pag kasuratan ti ipinasurat ni Hirimyas sa kan Baruk, magkun ti Panginuun sa kan Hirimyas,

²⁸ “Utru maan kawu bum-ul malulunan pag suratan bag-u utru maan nimu isurat ti tanan nakasurat sa kabag-u pag kasuratan inirub ni Hari Hihuyakim.

²⁹ Bag-u sabihun nimu sa hari kuntay inda ti pagsabihun niku, ‘Inirub nimu ti malulunan pag kasuratan dahil pagsabihun ati kuntay wayakun hari Babilunya inda pag daga, ag matyun kay manga tawu hanggan manga hayup.

³⁰ Nakan inda ti pag sabihun niku tungkul sa kanmu, Hari Hihuyakim sa Huda: Unman kawu may linahi humari sa kaharian ni Dabid. Matyun kawu, bag-u kanmu bangkay iyamut lang, mibulad sa init bag-u matun-ugan waydi nu rumas-ug ti yabi.

³¹ Parusahan niku kawu hanggan kanmu manga anak, hanggan ti manga takinan nimu dahil sa kanyu kadautan. Ipalakaw niku sa kanyu sa manga taga Hirusalim hanggan taga Huda ti tanan kadamhakan pagsabihun niku laban sa kanyu dahil balaw kamu namatingi sa kangku.’ ”

³² Nakan utru nam-ul si Hirimyas malulunan pag sururatan bag-u ipinakaun sa kan Baruk, ag isinurat ni Baruk ti tanan binagaw ni Hirimyas, parihu sa binuwat niya sa un-an pag malulunan kasuratan ti sinunug ni Hari Hihuyakim sa Huda. Dapat may manga idinugang si Hirimyas sa inda pag kasuratan harus parihu sa un-an isinurat.