Hirimyas 35 - Hanunuu

Ti manga Rikabita

¹ Katpung si Hihuyakim kay anak ni Husyas ti hari sa Huda, magkun ti Panginuun sa kan Hirimyas,

² “Pag-atag kawu sa magtal-anakan manga Rikabita ag sabihun nimu sa kanda pag-atag sida sa usa sa manga sulud-sulud sa Balay Diyus ag painman nimu sida intus.”

³ Nakan inatihan niku si Haasanyas (anak siya usa diman sa pag ingarnan Hirimyas, kay anak ni Habasinyas) ag ti tanan patar-ari hanggan kay manga anak. Sida ti buu magtal-anakan manga Rikabita.

⁴ Dinara niku sida sa Balay Diyus Panginuun, ati sa sulud-sulud manga anak lalaki ni Hanan kay anak ni Igdalyas imaw ti manugsirbi Diyus. Inda pag sulud-sulud tupad sa sulud-sulud manga takinan ag ati sa tungud sulud-sulud ni Maasiyas kay anak ni Salum, ti manugbantay sabian Balay Diyus.

⁵ Bag-u nagpauli aku manga malukung punu intus hanggan manga ungut sa atubangan manga Rikabita, ag sinabihan niku sida pag-inum.

⁶ Dapat sinmagut sida, “Balaw kami mag-inum intus. Ibinilin sa kanmi nimi ginurang ni Hunadab kay anak ni Rikab kuntay kami hanggan kanmi linahi danga gid mag-inum intus.

⁷ Ibinilin diman niya sa kanmi, ‘Danga kamu magpatindug manga balay ngatay magtanman ngatay magtanum manga ubas ngatay may pag-apuun inda pag manga bagay. Kailangan pagtahan lang kamu sa manga turda. Nu sundun niyu inda, lumawig kanyu buhi una naan pag daga kamu pag umuli.’

⁸ Sinunud nimi ti manga pag-isugu sa kanmi nimi ginurang ni Hunadab. Kami hanggan kanmi manga asawa ag manga anak balaw manginum intus,

⁹ balaw diman kami namatindug manga balay, ag balaw diman kami nagkaimaw manga ubasan, ngatay manga tanman.

¹⁰ Nangulian kami sa manga turda ag sinunud gid nimi ti tanan isinugu sa kanmi ni Hunadab kanmi ginurang.

¹¹ Dapat pagka naggira si Hari Nabukudunusur sa Babilunya sa inda pag nasyun, nadala kami sa manga sundalu Babilunya hanggan Aram, nakan nagpasya kami malagiw ag umatag sa Hirusalim. Inda kay dahilan nakan nangulian kami atay sa Hirusalim.”

^12-13 Magkun waya ti Panginuun Makamaskihan, ti Diyus Israil, sa kan Hirimyas, “Pag-atag kawu sa manga nasakupan Huda ag Hirusalim, bag-u sabihun inda: Hayga dayu kamu mamatingi sa manga pag-itudlu niku ag dayu niyu sundun kang manga bagaw?

¹⁴ Si Hunadab kay anak ni Rikab nagsugu sa kay manga linahi kuntay balaw sida manginum intus, ag sinunud nida inda. Taynguna tugka, balaw sida mag-inum intus dahil pagsundun nida ti sugu nida ginurang ni Hunadab. Dapat kamu unman magsunud sa kangku, una pira yi ka bisis aku magsabi sa kanyu

¹⁵ sa panab-anan manga manugsirbi niku purupita. Pagsabihun nida sa kanyu, ‘Patlikudi yi niyu kanyu manga daut ugali, bag-uhun yi niyu kanyu magpangabuhi, ag danga yi kamu magsamba sa manga diyus-diyusan, hampay parargu kamu mangulian sa iinayaw niku pag daga sa kanyu ag sa kanyu manga ginurang.’ Dapat unman kamu nagpasnu ngatay nagsunud sa kangku.

¹⁶ Kay manga linahi ni Hunadab anak ni Rikab nagsunud sa isinugu sa kanda nida ginurang. Dapat kamu unman magsunud sa kangku.

¹⁷ Nakan aku, ti Panginuun Diyus Makamaskihan, ti Diyus Israil, magsabi: ‘Pagpatingi kamu! Kamu pag manga taga Huda ag Hirusalim. Paras-ugun niku sa kanyu ti pagsabihun niku pag kadamhakan laban sa kanyu. Nagpakihampang aku sa kanyu dapat unman kamu namatingi, nagtawag aku sa kanyu dapat unman kamu sinmagut.’ ”

¹⁸ Bag-u sinabihan ni Hirimyas ti magtal-anakan manga Rakabita tungkul sa sinabi Panginuun Makamaskihan, ti Diyus Israil, “Ungud pagsundun niyu ti tanan isinugu sa kanyu niyu ginurang ni Hunadab,

¹⁹ nakan nagtaratu aku si Hunadab kay anak ni Rikab balaw maduraan linahi sumirbi sa kangku. Aku, ti Panginuun Makamaskihan, ti Diyus Israil, ti magsabi inda.”