Hirimyas 34 - Hanunuu

Ti Pasandam sa kan Sidikyas

^1-2 Ginira ni Hari Nabukudunusur taga Babilunya ti Hirusalim ag ti manga banwa sa kay sangput. Kaibahan niya nan-gira ti tanan niya manga sundalu hanggan ti manga sundalu ginan sa manga kaharian kay magkasakupan. Sa tida pag udas, magkun sa kan Hirimyas ti Panginuun Makamaskihan, ti Diyus Israil, “Pag-ati kawu sa kan Hari Sidikyas sa Huda, sabihun nimu kuntay aku, ti Panginuun magkumun, ‘Ipakaun niku sa hari Babilunya inda pag banwa bag-u irubun niya inda.’

³ Balaw kawu makapalagiw sa kay manga kamang. Dakpun kawu ag ipakaun sa hari Babilunya. Umatubang kawu sa kanya hampay sintinsiyahan ag darahun kawu bihag atag sa Babilunya.

⁴ Dapat Hari Sidikyas, patingihi nimu kang taratu sa kanmu: Balaw kawu mamatay sa girahan,

⁵ bagkus ngap mamatay kawu may kahusayan. Kanmu nasakupan mansunug kamangyan hampay dayawun kawu, parihu sa kanda binwat sa paglubung sa kanmu manga ginurang un-an naghari sa kanmu. Himanglawun kawu nida, ag sabihun nida, ‘Tigbak yi kanmi hari!’ Mangyari gid inda, dahil aku, ti Panginuun, ti magsabi inda.”

⁶ Pagkatapus, nag-ati si Hirimyas sa Hirusalim, ag isinabi ti tanan inda sa kan Hari Sidikyas.

⁷ Maggira yi tida pag udas ti gurupu hari Babilunya sa Hirusalim, sa Lakis ag Asika. Inda wadi pag manga banwa sa Huda ti may manga alad batu.

Palpasan ti manga Panawuhun

⁸ May pagsabihun waya ti Panginuun sa kan Hirimyas katpung nagbuwat kasunduan si Hari Sidikyas sa tanan taga Hirusalim kuntay palpasan niya ti manga panawuhun.

⁹ Nagsugu si Sidikyas kuntay una si unu ti may manga panawuhun Hibriyu, babayi man ngatay lalaki kailangan nida palpasan. Balaw may kaparihu Hudiyu ti mamirmaminti panawuhun.

¹⁰ Ti tanan tawu, hanggan ti manga pinunu nagpasnu sa inda pag kasunduan, ag pinalpasan nida kanda manga panawuhun — lalaki man ngatay babayi.

¹¹ Dapat pagka sa uryan, nagbag-u kanda isip binuwat maan nida panawuhun kanda manga pinalpasan pag panawuhun.

^12-13 Nakan magkun ti Panginuun, ti Diyus Israil, sa kan Hirimyas, “Nagbuwat aku kasunduan sa manga ginurang niyu katpung pinalpasan niku sida sa daga Ihiptu, sa rugar nu naan sida pag binuwat panawuhun. Magkun aku sa kanda,

¹⁴ ‘Sa kada rumas-ug ti ikapitu pag timpu, kailangan palpasan niyu kanyu kaparihu Hudiyu ipinabili sa kanyu bilang panawuhun. Kailangan niyu sida palpasan pagkatapus nida magsirbi sa kanyu unum ka timpu.’ Dapat unman aku sinunud niyu manga ginurang.

¹⁵ Katpung sa nakalawuy pag manga sirang, nag-ampu kamu ag binuwat niyu ti matadlung sa kang magbantay. Nagpasnu kamu tanan kuntay palpasan kanyu manga kasimanwa kanyu binuwat panawuhun. Nagbuwat waya ngani kamu kasunduan sa kangku tungkul siyun ati gid ngap sa Balay Diyus nu naan niyu pagdayawun kang ngaran.

¹⁶ Dapat nagbag-u maan kanyu isip ag pinakay-a niyu aku. Binwat maan niyu panawuhun ti manga panawuhun kanyu pinalpasan, linugus maan niyu sida papalpas. niyu sida bumaliw panawuhun.

¹⁷ “Nakan aku, ti Panginuun magsabi dahil balaw niyu aku sinunud ag balaw niyu pinalpasan kanyu manga panawuhun manga kasimanwa niyu, pasibut-an niku kamu — mamatay sa girahan, sa lun-us ag sa sakit. Kamu buwatun niku mayagting sa magbantay tanan kaharian sa kalibutan.

^18-19 Ti manga may kangaranan sa Huda ag Hirusalim, ti manga kaawat sa balay hari, hanggan ti manga manughandug ag ti tanan nasakupan nagbuwat kasunduan sa kangku sa panab-anan paglakaw nida sa sinangsang ibun baka. Dapat unman nida tinupad kanda kasunduan sa kangku, nakan buwatun diman niku sa kanda ti binwat nida sa ibun baka.

²⁰ Ipakaun niku sida sa manga kalaban nida magkaibug mumatay sa kanda. Ag bumaliw karan-unun manga manuk hanggan maraisug pag hayup kanda manga bangkay.

²¹ “Ipakaun niku si Hari Sidikyas sa Huda hanggan kay manga takinan sa manga sundalu hari Babilunya, ti magkaibug mumatay sa kanda. Lang madi inmapas yi sida sa paggira sa kanyu,

²² suguun niku sida giraha maan kamu, sakupun ag sunugun. Buwatun niku mapung-aw ti manga banwa sa Huda ag udyi may mangulianan siyun. Aku, ti Panginuun, ti magsabi inda.”