Hirimyas 33 - Hanunuu

Ti manga Taratu Papalad

¹ Habang si Hirimyas ati di waya sa pirisuhan sa punduhan manga guwardiya sa balay hari, nagbagaw ti Panginuun sa kanya kadwa ginan.

² Inda ti pagsabihun Panginuun ti naglalang kalibutan hanggan ti naghistuda tunda sa kay nagkabugtangan — Panginuun kay ngaran:

³ “Pagtawag kawu sa kangku ag sagutun kawu niku, ipaburayhaw niku sa kanmu ti manga makadululaw ag lihim pag manga bagay balaw waya nimu alam.

⁴ Dahil aku, ti Panginuun, ti Diyus Israil, magkumun: Una dinaut yi ti manga balay sa Hirusalim ag ti balay hari sa Huda hampay buwatun pamalaknib sa alad batu hampay balaw inda maslud manga kalaban,

⁵ suldun diman inda manga taga Babilunya. Mayamu ti mamatay sa inda pag banwa dahil wayakun niku inda sa kang masyadu pag pangagalit sa kanyu. Pagdayuun niku inda pag banwa dahil sa kay kadautan nida.

⁶ “Dapat rumas-ug ti sirang paayadun niku inda pag banwa hanggan kay nasakupan. Mangabuhi sida abunda ag may kahusayan.

⁷ Pabalikun niku ti manga taga Israil ag taga Huda ginan sa pagkabihag, ipatindug niku utru kanda banwa parihu sa kaybi.

⁸ Lumpiyuhun ag patawadun niku sida sa tanan pag kasalanan pag buwatun nida laban sa kangku.

⁹ Nu mangyari yi inda, ti banwa Hirusalim makapakaun kadayawan sa kangku, hanggan kabayaan, ag kagalangan. Ti kada nasyun sa kalibutan takigan sa dala nu mabaritaan nida ti manga kaayadan, kaalwanan ag kahusayan itinunghul niku sa inda pag banwa.”

¹⁰ Magkun waya ti Panginuun, “Pagsabihun niyu kuntay mapung-aw ag unman may manga tawu ag manga hayup ti Huda ag Hirusalim. Dapat rumas-ug ti sirang madnugan maan sa inda pag manga rugar ti manga kabayaan ag kasulunggan.

¹¹ Masaydan maan ti kasulungan manga bag-u ipinaasawa, ag manga tawu magdara manga handug pasalamat sa Balay Diyus Panginuun. Sabihun nida, ‘Mamasalamat kita sa Panginuun Makamaskihan dahil mayad gid siya. Kay pangaawa balaw may katapusan.’ Ungud magbarayaan ti manga tawu dahil ibalik niku ti mayad pag kahamtangan sa inda pag daga parihu sa kaybi sa un-an. Aku, ti Panginuun ti magsabi inda.”

¹² Magkun waya ti Panginuun Makamaskihan, “Una mapung-aw inda pag daga taynguna unman may manga tawu ag manga hayup, rumas-ug ti sirang magkaimaw manga pasturan sa tanan banwa padarahan manga manug-alaga sa kanda manada.

¹³ Yumamu maan kanda manada sa manga banwa sa kabantudan, sa manga bakulud sa isalpan, sa Nigib, sa daga ni Binhamin, sa manga rugar sangput sa Hirusalim ag sa manga banwa Huda. Aku, ti Panginuun ti magsabi inda.”

¹⁴ Magkun waya ti Panginuun, “Rumas-ug ti sirang tupadun gid niku kang mayad pag taratu sa nasakupan Israil.

¹⁵ Sa tida pag udas, pamahalaun niku ti hari matadlung ginan sa linahi ni Dabid. Palantagun niya ti katadlungan hanggan ti katuwiran sa buu daga.

¹⁶ Ag tida diman pag udas maribri ti manga taga Huda, ag mangabuhi yi may kahusayan ti manga taga Hirusalim. Ti Hirusalim ingarnan, ‘Ti Panginuun Kanta Katadlungan.’ ”

¹⁷ Magkun waya ti Panginuun, “Si Dabid pirmi magkaimaw linahi humari sa nasakupan Israil.

¹⁸ Ag pirmi diman magkaimaw manga manughandug ginan sa lahi ni Libi manirbi sa kangku, manpakaun manga handug pag sunugun, handug sa pagdayaw, ag iba waya pag manga handug.”

¹⁹ Bag-u magkun ti Panginuun sa kan Hirimyas,

²⁰ “Nu kabitay balaw yi mabag-u ti kasunduan niku sa sirang ag sa yabi kuntay lumuwang sida sa tagka pag udas,

²¹ katunda diman ti kasunduan niku sa kan Dabid sa kang manugsirbi, kuntay pirmi magkaimaw hari ginan sa kay linahi. Katida diman sa manga manughandug sa lahi ni Libi, mansirbi diman sa kangku.

²² Payamuun niku ti manga linahi ni Dabid hanggan ti lahi ni Libi parihu sa manga pamgasan sa langit ag baras sa baybay dagat balaw mabilang.”

²³ Magkun waya ti Panginuun sa kan Hirimyas,

²⁴ “Balaw aw nimu nadnugan pagsurugun manga tawu ti nasakupan niku? Magkun sida, ‘Dinayu Panginuun ti duwa ka kaharian kay pinili.’ Nakan pagpuyaan nida kang nasakupan, udyi nida pagkilalan-un nasyun inda.

²⁵ Dapat pagsabihun niku balaw yi mauman kang kasunduan sa sirang ag sa yabi hanggan kang manga surundanun maghari sa langit ag sa daga,

²⁶ pumirmaminti diman ti kasunduan niku sa manga linahi ni Hakub ag sa kan Dabid sa kang manugsirbi. Pumili aku ginan sa linahi ni Dabid humari sa manga linahi nida ni Abraham, Isaak ag Hakub. Kaawaan gid niku sida ag pabalikun sa kanda sadili daga ginan sa pagkabihag.”