Hirimyas 32 - Hanunuu

Namili Tanman si Hirimyas

¹ Ti Panginuun nagbagaw sa kan Hirimyas katpung ikasampulu pag timpu kay maghari ni Sidikyas sa Huda, pagka sa ika-18 pag timpu kay maghari ni Nabukudunusur sa Babilunya.

² Sa tunda pag udas, nasalikup ti Hirusalim manga sundalu Babilunya, ag si Purupita Hirimyas napirisu sa punduhan manga guwardiya sa balay hari sa Huda.

³ Pinirisu siya ati ni Hari Sidikyas dahil sa kay ipinaburayhaw. Dahil pagsabihun ni Hirimyas: “Inda ti pagsabihun Panginuun: Ipakaun niku inda pag banwa sa hari Babilunya ag sakupun niya.

⁴ Si Hari Sidikyas unman makaribri sa manga taga Babilunya, nu unman ungud iatubang siya sa hari Babilunya hampay sintinsiyahan.

⁵ Darahun niku si Sidikyas sa Babilunya ag pumirmaminti siya ati tugka sa matapus ti pagparusa sa kanya. Manlaban man kamu sa manga taga Babilunya, balaw diman kamu manalu. Aku, ti Panginuun, ti magbagaw inda.”

⁶ Magkun waya si Hirimyas, “Magkun sa kangku ti Panginuun kuntay

⁷ si Hanamil kay anak niku bapa ni Salum pumakarani sa kangku ag sumabi, ‘Biliha nimu kang tanman sa Anatut. Dahil kawu ti pinakaarani pag katawuhan niku, may karampatan ag katungkulan kawu hampay bilihun inda.’

⁸ “Parihu ngani sa kay pagsabihun sa kangku Panginuun, nag-atag sa kangku si Hanamil kang pinsan-suud ati sa punduhan manga guwardiya. Magkun siya sa kangku, ‘Biliha nimu kang tanman ati sa Anatut sa daga lahi ni Binhamin. May karampatan ag katungkulan kawu hampay mapasa-kanmu tida, nakan biliha yi nimu tida.’ ” Alam niku nalub-anan inda Panginuun

⁹ nakan binili niku tida pag tanman sa kan Hanamil sa halaga 17 ka bilug pilak.

¹⁰ Pinirmahan ag tinatakan niya ti manga kasuratan sa bilihan sa atubangan manga kastigus bag-u kinilu ti pilak bilang kabaydanan.

¹¹ Bag-u bin-ul niku ti manga kasuratan may tatak ag ti kupya unman may tatak nu naan nakasurat ti manga kasunduan sa bilihan.

¹² Ag ipinakaun niku inda sa kan Baruk kay anak ni Niryas kay laki ni Masiya, sa atubangan ni Hanamil ag manga kastigus nagpirma sa inda pag manga kasuratan, ag sa atubangan tanan manga Hudiyu matukawan sa punduhan manga guwardiya.

¹³ Sa atubangan nida sinabi niku kan Baruk,

¹⁴ kuntay inda ti pagsabihun Panginuun Makamaskihan, ti Diyus Israil, “Bul-a nimu ti manga kasuratan tinatakan ag balaw tinatakan, bag-u ipauli nimu sa anglit hampay unman inda madaut ag hampay dumugay inda aba pag panahun.

¹⁵ Dahil rumas-ug ti sirang mamililihan maan manga kasiyunan ti manga tawu sa inda pag rugar. Mamililihan sida manga balay, manga tanman, ag manga taranuman ubas. Aku, ti Panginuun Makamaskihan, ti Diyus Israil, ti magsabi inda.”

¹⁶ Pagkanatapus nipakaun niku ti kasuratan sa kan Baruk kay anak ni Niryas, nagdarangin aku.

¹⁷ “Panginuun Diyus, linalang nimu ti langit ag ti daga sa panab-anan nimu kamaskihan. Unman may una hintay pag bagay ti unman nimu mabwat.

¹⁸ Pag-ipakakit nimu ti pagmahal nimu sa linibu-libu, dapat pagparusahan nimu ti manga anak dahil sa kasalanan nida manga ginurang. May kadayawan kawu, pag Diyus, kanmu ngaran Panginuun Makamaskihan.

¹⁹ Pinakamarinu duy kanmu manga gayak ag makadululaw kanmu manga buwat. Mag-akitan nimu ti tanan pagbuwatun manga tawu ag pagbalusan duy nimu sida angay sa pag-ugaliun ag buwat nida.

²⁰ Nagbuwat kawu manga makadululaw ag lilingutan pag manga bagay ati sa Ihiptu, ag parargu nimu duy inda pagbuwatun tugka sitay sa Israil pagbuwatun ag sa iba manga nasyun. Sa panab-anan inda nagbaliw bantug duy kawu sa tanan rugar.

²¹ Sa panab-anan manga makadululaw ag manga lilingutan pag bagay hanggan sa kanmu kamaskihan, nadala duy ti manga taga Ihiptu ag pinalpasan nimu kanmu nasakupan Israilita sa Ihiptu.

²² Ipinakaun duy nimu sa kanda ti marinu ag abunda pag daga imaw kanmu itinaratu ipakaun sa kanda manga ginurang.

²³ Nagbaliw kanda inda dapat unman sida nagsunud sa kanmu ngatay sa kanmu manga kasuguan, bag-u balaw nida binuwat ti pag-ipabuwat nimu sa kanda. Nakan pinadaran-an nimu sida kadamhakan.

²⁴ Ag taynguna, pagtap-ukan daga manga taga Babilunya ti saruy alad batu Hirusalim hampay maslud ag maagaw nida ti banwa. Dahil sa girahan, lun-us, ag sakit naagaw manga taga Babilunya ti banwa angay diman sa sinabi nimu.

²⁵ Dapat lang madi katida, Panginuun Diyus sinugu nimu aku hampay bilihun ti tanman sa atubangan manga kastigus una arani yi maagaw manga taga Babilunya inda pag banwa.”

²⁶ Nakan magkun ti Panginuun sa kan Hirimyas,

²⁷ “Aku ti Panginuun, ti Diyus tanan tawu. May-imaw aw bagay balaw niku mabwat?

²⁸ Nakan tandai nimu, ipakaun niku inda pag banwa sa manga taga Babilunya ag sa hari nida sa kan Nabukudunusur bag-u mapasa-kanda inda.

²⁹ Irubun nida inda, hanggan ti manga balay kay bubung pagsunugan manga kamangyan para kan Baal ag pagsagdahan manga handug irinmun para tuhay pag manga diyus-diyusan subra niku pag-ikagalit.

³⁰ “Aku, ti Panginuun, ti magsabi ginan di waya kabag-u, unman yi may binuwat ti manga taga Israil hanggan ti taga Huda nu unman lunsay kadautan. Ginalit nida aku sa panab-anan nida manga buwat.

³¹ Ginan sa itinindug inda pag banwa tugka taynguna, paggalitun di aku manga nasakupan sitay. Nakan wayakun yi niku inda.

³² Paggalitun aku manga taga Israil ag taga Huda dahil sa daut pag buwatun nida — kanda manga hari ag takinan, manga manughandug ag purupita, hanggan ti tanan manga taga Hirusalim.

³³ Nagpakarayu sida sa kangku una pirmi niku sida pagtudluan. Dayu sida mamatingi ag dayu sida magpatudlu.

³⁴ Inuringan nida ti Balay Diyus niku nu naan pagdayawun ti ngaran niku. Ipinauli nida ati ti manga diyus-diyusan mayagting.

³⁵ Nagpatindug sida manga simbahan para kan Baal ati sa Luung Bin Hinum, ati diman nida pag-isagda sa kan Muluk kanda manga anak. Balaw niku inda pag-isugu sa kanda; balaw diman inda sinmulud sa kang isip kuntay buwata nida inda pag mayagting pag bagay imaw ti pinun-an kasalanan manga taga Huda.

³⁶ “Hirimyas, tutuu ti pagsabihun nimu ipakaun sa hari Babilunya inda pag banwa sa panab-anan girahan, lun-us ag sakit. Dapat taynguna, aku, ti Panginuun, ti Diyus Israil, magkumun:

³⁷ Tipunun niku ti manga nasakupan niku ginan sa tanan nasyun kinalatan niku sa kanda dahil sa kang masyadu pag galit sa kanda. Utru niku sida darahun sa inda pag rugar ag mangabuhi sida sa mahusay.

³⁸ Kilalan-un niku sida kang nasakupan, ag kilalan-un waydi nida aku kanda Diyus.

³⁹ Pakan-an niku sida pagkarausa hampay sambahun nida aku hanggan aban, para sa kanda sadili ikaayad ag sa kaayadan diman nida manga linahi.

⁴⁰ Mamuwat aku kasunduan unman may katugkaan sa kanda kuntay parargu aku magbuwat kaayadan sa kanda. Pakan-an niku sida maghinaum maggalang sa kangku hampay balaw yi sida pumakarayu sa kangku.

⁴¹ Kabayaan niku ti buwatan sida mayad ag buu tagipusuun niku sida patahanun sa inda pag daga.”

⁴² Magkun waya ti Panginuun, “Nu kabitay niku pinadarahan kadamhakan inda pag manga tawu, rumas-ug ti sirang padarahan diman niku sida kaayadan kang itinaratu sa kanda.

⁴³ Bag-u manmililihan maan manga tanman sa inda pag daga una taynguna maruku waya ag unman may magpangulian tawu ngatay hayup, dahil ipinakaun inda sa manga taga Babilunya.

⁴⁴ “Manmililihan maan manga tanman may pirmahan, tatakan ag kastigusan ti manga kasuratan sa bilihan. Buwatun inda sa daga ni Binhamin, sa manga rugar sa kalibut Hirusalim, sa manga banwa Huda, sa manga banwa sa kabantudan, ag tagudtud sa isalpan, hanggan sa Nigib. Mangyari inda dahil pabalikun niku kang manga nasakupan sa kanda daga ginan sa pagkabihag. Aku, ti Panginuun, ti magbagaw inda.”