Hirimyas 31 - Hanunuu

Ti Pagbalik manga Israilita

¹ Magkun waya ti Panginuun, “Sa ati pag sirang, aku bumaliw Diyus buu Israil ag bumaliw pinili niku sida.

² Aku, ti Panginuun, magsabi alagaan niku ti manga nasawad buhi sa kanda habang magbaklay sida sa pangawakawaan. Bumalik aku hampay pakan-an paraharyan ti Israil.”

³ Kaybi sa kabag-u, ti Panginuun nagpakakit sa manga Israilita ag magkun, “Pagmahalun gid niku kamu balaw may katapusan pag pagmahal. Sa kang mayad nabubut-un, pag-ipakarani niku kamu sa kangku.

⁴ Utru niku kamu ipatindug, kamu pag manga taga Israil, parihu sa usa ka babayi tugnaw. Utru kamu manayaw sa kabayaan magpatnug kamu kanyu pamakaransing.

⁵ Utru kamu mananum ubas sa manga tagudtud Samarya ag pakinabangan niyu inda kay manga burak.

⁶ Rumas-ug ti sirang ti manga manugbantay sa banwa manhuyaw ati sa kabantudan Ipraim, ‘Abala kamu, atag kita sa Hirusalim agud mansamba sa Panginuun nita Diyus.’ ”

⁷ Magkun ti Panginuun, “Pagkanta kamu, paghuyaw para sa Israil, ti nasyun pagdayawun sa tanan nasyun. Pagdayaw kamu, paghuyaw, ‘Panginuun, iribri nimu kanmu manga nasakupan, ti manga nasawad buhi sa manga taga Israil.’ ”

⁸ Magkun diman ti Panginuun, “Pagpatingi kamu! Aku ti bum-ul sa kanda, tipunun niku sida ginan sa kanaway una naan ginan pag bahagi kalibutan. Kaibahan ti manga buta, ti manga lunu, katida diman ti manga magbuduy hanggan ti manga arani yi manganak. Daka pag gurupu ti muli.

⁹ Manlulumian sida sa kabayaan ag mandarangin habang paggiyahan niku sida pauli. Tabanun niku sida sa manga may bulbugan, lumakaw sida sa mayad pag dalan ag balaw sida madayaan. Dahil aku ti ama Israil, ag si Ipraim kang panganay pag anak.”

¹⁰ “Manga nasyun, patingihi niyu ti pag-itultul niku, bag-u ibarita niyu inda sa ararayu rugar: ‘Winayak niku ti manga taga Israil, dapat tipunun di maan niku sida ag alagaan parihu sa manug-alaga manga karanidu.’

¹¹ Iribri niku ti manga linahi ni Hakub sa kamang manga tawu subra makapangyarihan kaysa kanda.

¹² Umatag sida sa Bantud Siun ag manhuyaw sa kabayaan. Magbarayaan sida dahil sa manga papalad niku sa kanda. Bumaliw abunda ti manga tirigu, ti irinmun ubas, ti lana ulibu ag ti manga hayup nida. Miparihu sida sa halamanan pirmi pagdiligan ag udyi sida utru manrukuan.

¹³ Nu katida, kanda manga daraga hanggan manga kan-akan ag manga gurangun manayaw sa kabayaan. Ilisan niku kabayaan kanda maglulumian. Sa halip manrukuan sida, pakan-an ngap niku sida kasulungan.

¹⁴ Pakan-an niku mayamu pag handug ti manga manughandug. Busugun niku abunda pag papalad kang manga nasakupan. Aku, ti Panginuun, ti magbagaw inda.”

¹⁵ Magkun waya ti Panginuun, “May nadnugan lulumian ag hirinangbitun ginan sa banwa Rama. Paglumian ni Rakil kay manga anak. Maglumi siya ag dayi magtanggap kasulungan dahil namatay kay manga anak.”

¹⁶ Dapat magkun ti Panginuun, “Danga yi kawu maglumi dahil pirimyuhan niku kawu sa kanmu manga binuwat. Bumalik kanmu manga anak ginan sa daga manga kalaban.

¹⁷ Nakan may pag-asa di kawu sa pag-atubangun. Dahil bumalik kanmu manga anak sa kanda sadili daga. Aku, ti Panginuun, ti magsabi inda.”

¹⁸ Nadnugan niku ti hirinangbitun manga taga Ipraim. Magkun sida, “Panginuun kami duy ga manga ibun baka udwaya anad sa singkaw, dapat tinudluan duy nimu kami magsunud sa kanmu. Kawu ti Panginuun nimi Diyus, nakan ibalik yi nimu duy kami sa sadili nimi daga.

¹⁹ Nagpakarayu kami sa kanmu kaybi, pat-ay nag-ampu yi duy kami taynguna. Pagka naalaman nimi kuntay nagkasala kami, tinaptap duy nimi kanmi manga dubdub sa pag-ampu. Magkay-a kami sa kanmi manga binuwat kaybi sa kanmi kalay-awan.”

²⁰ Nagsagut ti Panginuun, “Kamu pag nasakupan Ipraim kang pagmahalun pag anak. Una pirmi aku magbagaw laban sa kanyu, pagbayaun di niku kamu. Maggagad di aku ag magkaawa sa kanyu.

²¹ “Pagpauli kamu tanda sa dalan. Tandai niyu kaayad kanyu paglakawan pag dalan dahil tunda diman pag dalan kanyu lakawan sa kanyu pagbalik. Israil parihu sa usa ka tugnaw pag babayi, pagbalik yi kamu sa kanyu manga banwa.

²² Kapira waya kamu pag bumalik sa kangku, manga anak niku magtalang? Mamuwat aku bag-u pag manga bagay sa kalibutan, babayi yi ti manginapin sa lalaki.”

Ti Rumas-ug yi pag Kaabundahan sa Israil

²³ Magkun ti Panginuun Makamaskihan, ti Diyus Israil, “Nu maibalik yi niku ti nasakupan Huda sa kanda daga ginan sa pagkabihag, kanda maan sabihun, ‘Papaladan mana Panginuun ti banal pag bantud Hirusalim ti pag-ulian niya.’

²⁴ Mangulianan ti manga tawu sa Huda ag sa manga banwa inda, hanggan ti manga manugtanman hanggan manga manug-alaga hayup.

²⁵ Dahil paharyun niku ti manga magkagasa, busugun niku ti manga magpanlumuy dahil sa lun-us. Nakan sabihun manga tawu,

²⁶ ‘Nipulaw aku, mayad gid kang turug.’ ”

²⁷ Magkun waya ti Panginuun, “Rumas-ug ti sirang payamuun niku ti nasakupan Israil ag Huda, hanggan kanda manga hayup.

²⁸ Sa kabag-u, winayak, dinaut, ag pinuil niku sida dapat sa uryan baliwa, utru bangunun niku sida ag ipatindug.

²⁹ Sa tida pag udas balaw yi sabihun manga tawu, ‘Nangaun maaslum pag ubas ti manga gurang, kay aslum nasamitan manga anak.’

³⁰ Bagkus ngap, nu si unu ti kinmaun maaslum pag ubas, siya lang ti makasamit kay aslum inda. Ti tawu nagkasala imaw lang ti mamatay.”

³¹ Magkun waya ti Panginuun, “Rumas-ug ti udas mamuwat aku bag-u pag kasunduan sa manga taga Israil ag taga Huda.

³² Balaw inda parihu sa un-an pag kasunduan kang binuwat sa kanda manga ginurang katpung giniyahan niku sida sa pagluwas sa Ihiptu. Una aku ga kanda asawa, balaw nida tinupad ti un-an nimi pag kasunduan. Aku, ti Panginuun, ti magsabi inda.”

³³ Magkun waya ti Panginuun, “Inda ti bag-u pag kasunduan kang buwatun sa manga taga Israil sa aratubangun pag udas: Ipauli niku ti manga kasuguan niku sa kanda manga naisipan ag isurat niku inda sa kanda manga tagipusuun. Aku bumaliw Diyus nida ag sida bumaliw manga nasakupan niku.

³⁴ Unman yi may manabi sa kay kasimanwa ngatay sa kay patar-ari kuntay kailangan niya kilalan-a ti Panginuun. Dahil sida tanan kumilala sa kangku, ginan sa pinakapugri tugka sa pinakamaunlad. Patawadun niku sida sa kanda manga daut binuwat, balaw yi niku alalahanun kanda manga kasalanan. Aku, ti Panginuun, ti magbagaw inda.”

³⁵ Magkun waya ti Panginuun, “Aku ti nagsugu sa init hampay magpakaun-rayaw sa buu sirang, hanggan sa bulan ag manga pamgasan magpakaun-rayaw sa buu yabi. Ag aku ti magkuyikaw sa dagat tugka sa maghagunung ti manga humbak. Aku ti Panginuun ti Makamaskihan sa tanan.

³⁶ Mintaras may langit ag kalibutan, pumirmaminti diman ti nasyun Israil hanggan waya aban.

³⁷ Nu kabitay balaw magkasukat ti langit ag balaw magkaalaman ti patakinan daga, katida diman, balaw niku pagdayuun ti tanan linahi Israil una mayamu yi kanda nabwat kasalanan. Aku, ti Panginuun, ti magbagaw inda.”

³⁸ Parargu pagsabihun Panginuun, “Rumas-ug ti udas ti banwa Hirusalim utru ipatindug ginan sa Bantayaw ni Hananil tugka sa Suuk Sabian.

³⁹ Ginan sa tida pag manga rugar, rargu ti katugkaan tugka sa tagudtud Garib bag-u paliku sa Guwa.

⁴⁰ Ti buu luung pagyamtan manga bangkay ag manga paruk nakatigana sa kangku, hanggan ti tanan manga tanman sa Luung Kidrun tugka sa sabian pag-ingarnan Kabayu sa butlakan. Inda pag banwa balaw yi gid mawayak ngatay magba maan.”