Hirimyas 30 - Hanunuu

Ti manga Taratu Panginuun sa Kay manga Nasakupan

^1-2 Magkun ti Panginuun sa kan Hirimyas, “Aku, ti Panginuun, ti Diyus Israil, magsabi isurat nimu sa ribru ti tanan pagsabihun niku sa kanmu.

³ Dahil rumas-ug ti sirang ipabalik maan niku kang nasakupan Israil ag Huda ginan sa pagkabihag. Ipabalik niku sida sa daga ipinakaun niku sa kanda manga ginurang kuntay magkaapu nida. Aku, ti Panginuun, ti magsabi inda.”

^4-5 Inda waya ti pagsabihun Panginuun tungkul sa Israil ag sa Huda: “Madnugan ti huruyawan manga tawu balaw dahil sa baya nu unman sa masyadu pag dala.

⁶ May ipaingana aku sa kanyu. Mahimu aw manganak ti lalaki? Hayga mag-akitan niku ti manga lalaki magpanlapsi ag paghiyaptan kanda tiyan ga babayi magkaanak yi?

⁷ Masyadu gid madala nu rumas-ug yi tida pag sirang, unman gid inda may kaparihu. Udas kakurian manga lahi ni Hakub, dapat maribri sida sa uryan baliwa ginan sa tida pag kahamtangan.

⁸ Aku, ti Panginuun Makamaskihan, magsabi sa tida pag udas, balaw yi sida buwatun panawuhun manga taga iba nasyun. Bariun yi niku ti singkaw sa kanda manga liug ag lubadun yi niku kanda manga tarikada.

⁹ Manirbi yi sida sa kangku, sa Panginuun kanda Diyus, bag-u mamili aku kanda hari ginan sa linahi ni Dabid.

¹⁰ “Nakan danga kamu magkadala, ngatay magpanlubay, kamu manga linahi ni Hakub kang manugsirbi. Aku, ti Panginuun, magsabi bul-un niku kamu asan gin sa arayu pag rugar nu naan kamu pag binihag. Sa kanyu pagbalik, mangabuhi yi kamu mahusay, mahim-ung, bag-u udyi may pagkadalaan.

¹¹ Kaibahan niyu aku ag iribri niku kamu. Lubus gid niku wayakun ti manga nasyun kinalatan niku sa kanyu dapat balaw niku inda buwatun sa kanyu. Dapat balaw waydi inda kay ibug sabihun balaw niku kamu parusahan. Parig-anan niku kamu sa kang-ud. Aku, ti Panginuun, ti magsabi inda.”

^12-13 Magkun waya ti Panginuun sa kay manga nasakupan, “Ungud dilikadu yi kanyu manga biyag ag balaw yi umayad. Udyi may makaawat ngatay makabulung sa kanyu. Udyi diman may bulung para sa kanyu.

¹⁴ Nalimtan yi kamu manga kakampi niyu pag nasyun, udyi kamu pagbatiun nida. Ginira niku kamu parihu sa paggira kalaban. Masyadu kang parusa sa kanyu dahil masyadu ag mayamu kanyu kasalanan.

¹⁵ Danga kamu magdangup kuntay balaw yi mag-ayad kanyu biyag. Pagparusahan niku kamu dahil masyadu ag mayamu kanyu kasalanan.

¹⁶ “Dapat ipadamhak diman niku ti tanan pumadamhak sa kanyu, bag-u ti tanan kalaban niyu bihagun. Girahun diman ti tanan maggira ag mag-agaw kanyu manga kasiyunan, bag-u agawan diman manga kasiyunan sida.

¹⁷ Dapat bulungun ag paayadun niku kanyu manga biyag una yi pagsabihun iba kuntay kamu pag manga taga Hirusalim dinayu ag pinabay-anan. Aku, ti Panginuun, ti magsabi inda.”

¹⁸ Magkun waya ti Panginuun, “Utru niku ibalik ti kayamanan manga banwa sa linahi ni Hakub ag kaawaan niku sida. Ti banwa hanggan ti balay hari winayak ipatindug maan sa daan nagpatindugan.

¹⁹ Bag-u kumanta sida manga pasalamat ag manhuyaw sa kasulungan. Payamuun ag pakan-an niku sida kadayawan.

²⁰ Bumaliw maalwan kanda manga anak parihu kaybi sa un-an. Parig-unun niku sida sa atubangan niku, ag parusahan niku una si unu ti mag-api sa kanda.

²¹ Ti manga takinan nida ginan diman gid sa kanda. Ipakarani niku siya sa kangku, ag siya waydi pumakarani. Dahil unman may tawu pumanghas pumakarani sa kangku nu balaw niku siya pakaranihun. Aku, ti Panginuun, magsabi,

²² bumaliw nasakupan niku sida ag aku bumaliw kanda Diyus.

²³ Pagpatingi kamu! Kang pangagalit ga bagyu aw ngatay buhawi humampak sa ulu daut pag tawu.

²⁴ Balaw gid madura kang pangagalit tugka sa unman niku magkabwat kang gustu buwatun. Sa manga uryan sirang, masalman di niyu inda.”