Hirimyas 3 - Hanunuu

¹ “Nu ti usa ka babayi tayakan niya asawa, bag-u inda pag babayi utru maan mangasawa, balaw yi siya kailangan bawiun niya un-an asawa, dahil magpauring gid inda sa kanyu daga. Kamu pag manga taga Israil magkabuhi ga usa ka babayi baraydan. Mayamu kanyu pagmahalun pag manga diyus-diyusan. Una katida, tawagun di maan niku kamu pagbalik sa kangku. Aku, ti Panginuun, ti magsabi inda.

² “Bantayi niyu ti arabwat pag rugar nu naan asan kamu pag nagsamba sa kanyu manga diyus-diyusan. May rugar aw waya ati ti unman niyu inuringan? Pinayagting niyu ti daga dahil sa kadautan niyu. Kamu ga babayi baraydan matukawan sa saruy dalan mag-alagad lalaki. Parihu diman kamu sa usa ka mananakaw mag-alagad kay matakawan sa pangawakawaan.

³ Imaw kay dahilan nu hayga unman mag-uran sa udas tig-ururan. Dapat madi katida, maganit diman kanyu ulu parihu sa usa ka babayi baraydan, balaw yi magkay-a.

⁴ Taynguna pagsabihun niyu sa kangku, ‘Amang niku, kawu duy ti kaibahan niku ginan kaybi sa anak waya aku.

⁵ Pirmi yi lang aw kawu magkagalit sa kangku? Tugka kapira waya duy kawu pag magalit sa kangku?’ Inda ti pagsabihun niyu, dapat pagbuwatun diman niyu ti tanan daut pagburuwatun.”

Hinuwad Huda ti Israil

⁶ Katpung udas kay maghari ni Usyas, magkun sa kangku ti Panginuun, “Nakitan aw nimu ti binwat maradaya pag Israil? Sinmamba siya sa manga diyus-diyusan sa kada arabwat pag tagudtud hanggan sa sirung kada maraybung pag puun kayu. Siya ga babayi magpanguragin.

⁷ Kang hantup, nu mabuwat yi inda tanan, bumalik yi siya sa kangku, dapat unman siya binmalik. Ag nakitan inda niya maradaya pag patar-ari balaw may iba nu unman ti Huda.

⁸ Tinayakan niku ti Israil ag tinulak dahil sa magpanguragin, sa panab-anan pagsamba sa manga diyus-diyusan. Dapat madi katida, nakitan niku ti maradaya pag patar-ari ti Huda balaw ngap nadala. Nanguragin diman siya

⁹ sa panab-anan pagsamba sa manga diyus-diyusan batu hanggan kayu, nakan ngani inuringan niya ti daga. Pagbuwatun niya inda dahil unman siya nataranta sa pagsamba sa manga diyus-diyusan.

¹⁰ Ag ti pinakadaut waya, balaw buluntad nagbalik sa kangku ti maradaya pag Huda. Pabalhingu lang siya kuntay magbalik sa kangku. Aku, ti Panginuun, ti magsabi inda.”

¹¹ Bag-u magkun sa kangku ti Panginuun, “Una balaw matinupadun sa kangku ti Israil mas mayad waya siya kaysa maradaya pag Huda.

¹² Paglakaw kawu taynguna bag-u sabihun nimu inda sa Israil, ‘Aku, ti Panginuun, magsabi: Israil maradaya, pagbalik kawu, dahil maawaun aku. Balaw yi aku magalit sa kanmu hanggan aban.

¹³ Akua lang nimu kanmu kasalanan, kuntay naglaban kawu sa kangku, sa Panginuun nimu Diyus, hanggan sa pagsunud nimu sa tuhay pag manga diyus sa panab-anan pagsamba sa kanda sa sirung kada maraybung pag puun kayu. Akua nimu kuntay unman kawu nagsunud sa kangku. Aku, ti Panginuun, ti magsabi inda.’ ”

¹⁴ Magkun waya ti Panginuun, “Pagbalik yi kamu, kamu manga supakil pag anak, dahil kangku kamu. Bul-un niku ti usa ngatay duwa sa kanyu ginan sa kada banwa ngatay linahi ag darahun sa Israil.

¹⁵ Bag-u pakan-an niku kamu takinan gustu niku ti manugpanguna sa kanyu may kadunungan ag intindi.

¹⁶ Aku, ti Panginuun, ti magsabi rumas-ug ti sirang yumamu gid kamu sa ati pag daga, balaw yi niyu hanap-hanapun ti Kaban Kasunduan, ngatay isipun aw ngatay alalahanun inda. Ag balaw diman niyu kailangan mamuwat waya kay bag-u.

¹⁷ Sa tida pag udas, ingarnan niyu ti Hirusalim ‘Tukawan hari Panginuun.’ Bag-u ti tanan manga nasyun maniripnan sa Hirusalim hampay dayawun ti ngaran Panginuun. Udyi gid nida sundun ti gustu maraganit ag daut nida pag tagipusuun.

¹⁸ Sa ati pag manga sirang, ti manga nasakupan Huda hanggan ti Israil mirinsanan bumalik ginan sa pagkabihag sa kanaway muli sa daga ipinakaun niku sa kanda manga ginurang bilang maranahun.

¹⁹ Aku gid ngapu ti magsabi, ‘Magbaya gid aku kuntay baliwun kamu manga anak niku ag pakan-an marinu pag daga kuntay pinakamarinu pag pamana sa buu kalibutan.’ Ag ti hantup niku ingarnan niyu aku ‘Amang’ ag balaw yi kamu pablag sa kangku.

²⁰ Dapat kamu nasakupan Israil nandaya sa kangku, parihu sa babayi nandaya sa kay asawa. Aku, ti Panginuun, ti magsabi inda.

²¹ “May mag-adnugan yi manga iringayan sa arabwat pag rugar. Maglulumian ag magpaawa-awa ti nasakupan Israil dahil nagbaliw daut kanda magpangabuhi ag kinalimtan nida aku, ti Panginuun kuntay kanda Diyus.

²² Kamu pag manga anak niku magtalang, pagbalik kamu sa kangku ag itul-id niku kanyu pagkamaradaya.” Sinmagut sida, “Hu, pumakarani duy kami sa kanmu dahil kawu ti Panginuun nimi Diyus.

²³ Ungud salan duy ti pagsamba nimi sa manga diyus-diyusan sa manga bantud. Sa kanmu lang ti karibrihan Israil, Panginuun nimi Diyus.

²⁴ Ginan waya sa kanmi pag kaanak, ti manga makakaray-a pag diyus-diyusan imaw ti namakinabang sa manga binudlayan nimi manga kaumputan. Bin-ul kanda manga hayup hanggan kanda manga anak.

²⁵ Kailangan ngani duy kami patagu dahil sa kay-a dahil kami hanggan kanmi manga ginurang nagsalan sa kanmu, Panginuun nimi Diyus. Ginan waya sa pagkaanak nimi tugka kainda, unman duy kami sinmunud sa kanmu.”